Փաստ ինֆո

ԲԴԽ-ն շարունակում է խախտել Երևանի ընդհանուր իրավասության քրեական դատարանի՝ լիազորությունները դադարեցված դատավոր Դավիթ Հարությունյանի՝ լսված լինելու իրավունքը։ «Փաստինֆո»-ի թղթակցի հաղորդմամբ՝ ԲԴԽ-ում գրավոր ընթացակարգով և դռնփակ ռեժիմով քննվում է Դավիթ Հարությունյանի գործի վերանայման դիմումը, սակայն՝ կրկին առանց դատավորի մասնակցության։ Դատավորը փորձել է մուտք գործել ԲԴԽ՝ հայտնելով, որ ցանկանում է մասնակցել իր վերաբերյալ գործի քննությանը, սակայն նրան կրկին թույլ չեն տվել անգամ մասնակցել նիստին՝ պատճառաբանելով, որ նիստը դռնփակ է։ Լրագրողների հետ զրույցում Դավիթ Հարությունյանը նշեց, որ ԲԴԽ-ն խուսափում է արձանագրել, որ նիստը դռնփակ է, մինչդեռ, ընթացակարգերի վերաբերյալ չկա որևէ հստակություն, հնարավոր չէ կանխորոշել, թե ինչ ընթացակարգեր են կիրառվում։ Հարությույանը հիշեցրեց նաև Կարեն Անդրեասյանի հայտարարությունը, թե զարմանում է, թե ինչու է հասարակության մոտ տպավորություն ստեղծվում, որ ԲԴԽ-ն չի ցանկանում կատարել ՍԴ պահանջները, ինչի մասին փաստարկ է ՀՀ ԱՆ ներկայացուցիչ, նախարարի խորհրդական Արտյոմ Սուջյանի հայտարարությունը, թե ՍԴ-ն կատարել է արձանագրումներ, որի լիազորությունը չի ունեցել։ Նշված հարցազրույցը սոցիալական ցանցերում «հավանել» է նաև Գրիգոր Մինասյանը։

Ինչ վերաբերում է իրեն ուղղված հարցադրումներին, ապա Հարությունյանը հայտնեց, որ զեկուցող է բացարկման ենթակա Երանուհի Թումանյանցը, ով առաջարկել էր ԲԴԽ-ին հղել երկու հարց՝ ինչ տեղեկություններ է ունեցել, որ ցանկացել է հայտնել ԲԴԽ-ին, որ չի հայտնել։

Հիշեցնենք, որ դատավոր Դավիթ Հարությունյանը դիմում է ներկայացրել ԲԴԽ՝ պահանջելով վերանայել իր վերաբերյալ գործը՝ հիմք ընդունելով ՍԴ որոշումը, որով արձանագրվել է ԲԴԽ-ի կողմից դատավորի իրավունքների խախտումը։

Մասնավորապես, դատավոր Դավիթ Հարությունյանի լիազորությունները ԲԴԽ-ն դադարեցրել է 2023թ․ հուլիսի 3-ին։ Կարգապահական վարույթը դատավորի նկատմամբ նախաձեռնել էր ՀՀ ԱՆ-ն՝ ապրիլի 7-ին հրավիրված Դատավորների ընդհանուր ժողովի օրը լրագրողների հետ ունեցած ճեպազրույցի մասին։ Տվյալ օրն ընդհանուր ժողովի օրակարգում ԲԴԽ դատավոր-անդամի ընտրության հարցն էր։ Դրա նախօրեին ԲԴԽ նախագահ Կարեն Անդրեասյանը՝ մամուլի քարտուղարի անունից հաղորդագրություն էր տարածել, որով, ըստ էության, փորձել էր ուղղորդել դատավորներին ընտրությունից առաջ։ Դատավորն անթույլատրելի էր համարել ԲԴԽ-ի հայտարարությունը՝ նշելով, որ որևէ մեկն իրավունք չունի նման արտահայտություն թույլ տալ՝ որևէ թեկնածուի հասցեին, նման հայտարարության հեղինակը բարեվարքության խնդիր ունի։ Անդրադառնալով հարցին՝ արդյո՞ք կա ուղղորդում իշխանությունների կողմից, Հարությունյանը նշել էր. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է»։ Նա նաև նշել էր, որ 20-ից ավելի դատավորի լիազորություն տարբեր եղանակով անօրինական կերպով դադարեցվել են։

Դատավորին կարգապահական պատասխանատվության ենթարկելու մասին միջնորդությունը ԲԴԽ-ում քննվել է մի շարք առերևույթ խախտումներով։ ԲԴԽ-ն նախ կամայականորեն որոշել էր դռնփակ ռեժիմով քննել միջնորդությունը, ապա՝ սանկցիա կիրառել և նիստերի դահլիճից հեռացրել դատավորին, ինչից հետո խոչընդոտել է նաև նրա փաստաբանների մասնակցությունը։ Ավելին, անգամ ձայնագրություն է տարածվել, թե ինչպես է ԲԴԽ նախագահ Կարեն Անդրեասյանը հորդորում կարգադրիչներին փակել դուռը, արագ ավարտում է գործի քննությունը, մինչդեռ, նույն պահին Դավիթ Հարությունյանի փաստաբանները գտնվել են ԲԴԽ շենքում և ցանկանում էին մասնակցել նիստին։ Դատավոր Դավիթ Հարությունյանը խախտված իրավունքները վերականգնելու համար դիմել է ՄԻԵԴ, որտեղ նրա գանգատը քննվում է առաջնահերթության կարգով։ Միևնույն ժամանակ, դատավորը դիմում էր ներկայացրել ՍԴ, որը 2024թ․ մայիսի 21-ին որոշում է կայացրել, որ այս գործով հրապարակայնության սկզբունքին, դատական սանկցիա կիրառելուն վերաբերող նորմերը ԲԴԽ-ն Հարությունյանի նկատմամբ այլ մեկնաբանությամբ է կիրառել։ Դատական օրենսգրքի համաձայն՝ Բարձրագույն դատական խորհուրդն իրավունք ունի վերանայել դատավորին կարգապահական պատասխանատվության ենթարկելու հարցի մասին իր որոշումը նոր երևան եկած կամ նոր հանգամանքներով: Տվյալ դեպքում Սահմանադրական դատարանի որոշումը նոր հանգամանք է։

Հեղինակ՝ Իզաբել Սահակյան

Աղբյուր` Փաստինֆո