Փաստ ինֆո

Սյունիքի նախկին մարզպետ Մելիքսեթ Պողոսյանի որդին՝ սպանության փորձի մեջ մեղադրվող Կարեն Պողոսյանը, ազատության մեջ է՝ շնորհիվ նախկին մեկ այլ մարզպետ՝ Սուրիկ Խաչատրյանի՝ Լիսկայի, որդու։

Ինչպես արդեն տեղեկացրել ենք՝ Մելիքսեթ Պողոսյանի որդու՝ Կարեն Պողոսյանի, վերաբերյալ քրեական գործն արդեն երկու տարի է, ինչ Սյունիքի մարզի ընդհանուր իրավասության դատարանի վարույթում է, սակայն գործով «սայլը» տեղից տևական ժամանակ չէր շարժվում։ Գործը կա՛մ դատավորների՝ վարույթից վարույթ է տեղափոխվել, կա՛մ դատական նիստերն են հաճախ հետաձգվել։ Այժմ գործը գտնվում է հիմնական դատալսումների փուլում։ Թե ինչ հունով է ընթանում քննությունը՝ դեռևս պարզ չէ, սակայն, ինչպես պարզվում է՝ գործով երեք տուժողները, այդ թվում՝ Սուրիկ Խաչատրյանի որդին, որոշել են «գողական» գնալ։ «Փաստինֆո»-ն տեղեկացավ, որ գործով տուժողներից որևէ մեկը «բողոք» չունի Պողոսյանի դեմ՝ այդպիսով նպաստելով նրա ազատության մեջ մնալուն։

Ուշագրավ է նաև այն հանգամանքը, որ սպանության փորձի մեղադրանքով մեղադրյալն ազատության մեջ է, թեև դեպքից անմիջապես հետո դիմել էր փախուստի, թաքնվել քննությունից, գտնվել հետախուզման մեջ, ապա՝ վերադարձել, կալանքի տակ գտնվել շատ կարճ ժամանակ և կրկին հայտնվել ազատության մեջ։

«Փաստինֆո»-ն փորձել է մեկնաբանություն ստանալ նաև պաշտպանության կողմից, սակայն պաշտպանը խոստացել է հարցերին պատասխանել ավելի ուշ։ Վերջինիս մեկնաբանությունը ստանալու դեպքում այն կներկայացնենք։

Հիշեցնենք, որ 2021թ հուլիսի 14-ին՝ ժամը 01.00-ի սահմաններում Գորիս քաղաքում Սյունիքի մարզպետ Մելիքսեթ Պողոսյանի որդու՝ 33-ամյա Կարեն Պողոսյանի և Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի միջեւ առաջացած վիճաբանությունը վերածվել էր ծեծկռտուքի, հնչել էին կրակոցներ, կային տուժածներ։ Դեպքի առթիվ հարուցվել է քրեական գործ ՀՀ քրեական օրենսգրքի (2003թ ) 34-104-րդ հոդվածի 1-ին մասով, 258-րդ հոդվածի 4-րդ մասով և 235-րդ հոդվածի 1-ին մասով՝ սպանության փորձի, զենքի գործադրմամբ խուլիգանության և ապօրինի կերպով հրազեն պահելու հատկանիշներով:

Կարեն Պողոսյանը մեղադրվում է ՀՀ քրեական օրենսգրքի 44-155-րդ հոդվածի 2-րդ մասի 7-րդ կետով և ՀՀ քրեական օրենսգրքի 335-րդ հոդվածի 1-ին մասով։

Մասնավորապես, ըստ մեղադրանքի՝ Կարեն Պողոսյանը չպարզաված ժամանակահատվածում և հանգամանքներում ապօրինի կերպով ձեռք է բերել, պահել և կրել ակոսափող ինքնաձիգ, ինչպես նաև՝ այլ անձանց կյանքի համար վտանգավոր եղանակով, երկու կամ ավելի անձանց ապօրինաբար կյանքից զրկելու՝ սպանելու եղանակով, ապօրինի կերպով ձեռք բերած ակոսափող ինքնաձիգից արձակել է կրակոցներ, փորձելով սպանել Տիգրան Խաչատրյանին, Հարութ Վարդանյանին և Մելիք Բարսեղյանին։

Նշենք, որ թեև Կարեն Պողոսյանի մեղադրանքը ծանր է, վերջինս արդեն տևական ժամանակ է, ինչ ազատության մեջ է, նրա նկատմամբ որպես խափանման միջոց է ընտրված ստորագրությունը՝ չհեռանալու մասին, ընդ որում, սա այն դեպքում, երբ Կարեն Պողոսյանը նախկինում արդեն փորձել է թաքնվել քննությունից, ամիսներ շարունակ գտնվել հետախուզման մեջ։ Դեպքից շուրջ երեք ամիս անց միայն՝ 2021թ սեպտեմբերին ինքնակամ ներկայացել է ՔԿ, դատարանը վերահաստատել է նրա նկատմամբ ընտրված խափանման միջոց կալանավորումը, ինչից հետո Կարեն Պողոսյանը տեղափոխվել է «Արմավիր» ՔԿՀ, որտեղ, սակայն կարճ ժամանակ է մնացել։ Կալանավորման ժամկետը լրանալուց հետո դատարանը չի բավարարել կալանքի ժամկետը երկարացնելու մասին քննիչի միջնորդությունը, և, ըստ այդմ, ՔԿ-ն գտել էր, որ չհեռանալու մասին ստորագրություն խափանման միջոցը բավարար է Կարեն Պողոսյանի վարքագիծը զսպելու համար։ Դատարանները հետագայում անփոփոխ են թողել այս խափանման միջոցը։

Հեղինակ՝ Իզաբել Սահակյան

Աղբյուր` Փաստինֆո