Փաստ ինֆո

Ներկա իշխանությունը, իսկ իշխանություն ասելով հիմնականում նկատի ունենք առաջին դեմքին, շատ հստակ գիտի, թե ինչ է ուզում։ Ուզում է սեփական իշխանությունը պահել, և այն հնարավորինս երկարաձգել ուզում է ցանկացած իշխանություն։

Այս մեկը սակայն՝ ոչ միայն հայության կյանքի գնով է ուզում, այլև՝ Հայաստանի՝ պետության կենսունակության ու գոյության գնով։ Հայաստանի լինելը իր չլինելն է, իսկ ինքը մտածում է՝ եթե ես չեմ լինելու՝ Հայաստանն էլ չի լինի։ Մի խոսքով՝ ինձանից հետո թեկուզ ջրհեղեղ․․․ Այսպես են մտածում Նիկոլն ու իր շրջանակը։

Իսկ ի՞նչ է ուզում հավաքական ընդդիմությունը։

Բայց որպեսզի պարզենք, թե ի՞նչ է ուզում հավաքական ընդդիմությունը, նախ պիտի պարզենք՝ կա՞ արդյոք հավաքական ընդդիմություն։

Ակնհայտ է՝ այսօր չկա այն։ Ինչ-որ պահ, իշխանափոխության, Փաշինյանի հեռացման համատեքստում կողք-կողքի հայտնվեցին նույն սրահում անհամատեղելի հին ու նոր կուսակցություններ, քաղաքական ուժեր։ Բայց այսօր ընդդիմությունը փսորված է, տարրալուծված է և, ըստ ամենայնի, կարծես նույնիսկ իր անելիքը չգիտի։

Իսկ այդ վիճակը շատ ցայտուն է, տեսանելի...

Ընդ որում, տեսանելի ոչ միայն քաղաքական մտածողությամբ անձանց համար, այլև՝ հանրության․․․
Գիտեք, տեսանելի է նաև այն տխուր հանգամանքը, որ քաղաքական դեմքերը և ուժերը որոշակի հակասությունների պատճառով չկարողացան կոնսոլիդացվել և քաղաքական կերպարի՝ վարչապետի թեկնածուի բեռան տակ մտավ Սրբազանը:

Սրբազանի վերջին՝ հեռուստատեսային ուղերձից և հմեկապետրոսական հարցազրույցից հետո մի տեսակ հակասական կարծիքներ են հայտնվում...

Ի վերջո, քաղաքական այր չլինելով՝ նա այսօր քաղաքական հայտ է ներկայացրել: Միայն թե կարծես դեռ պատրաստ չէ դրան, պատրաստ չէ հակառակ տեսակետ լսելուն, սուր հարցադրումներ անող լրատվամիջոցների հարցերին պատասխանելուն...վերջապես՝ քննադատական խոսք լսել նույնպես պիտի սովորել:

Ոչ միայն Սրբազանի, այլև ողջ թիմի ուշադրությունն ենք ուզում հրավիրել հետևյալ խնդրին: Տեսեք, մենք ներկա իշխանությանը բազմիցս և շարունակ քննադատում ենք ձեռքի հետ, ոտքի վրա պետություն «ղեկավարելու» համար: Իրապես, այս առումով վիճակը խայտառակ է՝ սկսած կադրերից, կադրերի բացակայությունից, ավարտած՝ մենիշխանության դրսևորմամբ, ազգադավ քաղաքականությամբ:

Փաստորեն, տվյալ դեպքո՞ւմ էլ գործ ունենք ընդդիմության հընթացս արվող քայլերի հետ...

Ի վերջո, օդում կախված հարցը, թե ո՞վքեր են Սրբազանի կողքին կանգնածները, ի՞նչ պատասխանատվություն են նրանք ստանձնել...

Քննադատության թիրախում այսօր Սրբազանն է, բայց չէ՞ որ դրա պատճառը մեծ հաշվով իր թիմն է:

Թիմն է, որ պիտի հաշվարկ արած լիներ հարցազրույց տալ-չտալու, տալու դեպքում հնարավոր հարցերի շրջանակի , դրանց պատրաստ լինելու, հակադարձելու, չձախողվելու կարևորությանը, եւ, ընդհանրապես, իշխանության թատրոնին Սրբազանի մասնակցությունը։

Իհարկե, հեռու ենք այն մտքից, թե միտումնավորության դրսևորումներ կան Սրբազան շարժման և Սրբազանի շուրջ, բայց...

Աղբյուր` Փաստինֆո