Փաստ ինֆո

«Ալիև կոչվածը պետք է հիշի, որ մենք իրեն պետք է պատժենք որպես ռազմական հանցագործի», - «Փաստինֆո»-ին ասել է Երկրապահ կամավորական միության անդամ, «Կոռնիձոր» ջոկատի հրամանատար Արա Խուդավերդյանը՝ արձագանքելով արհեստածին Ադրբեջանի ղեկավարի հայտարարությանը՝ ավելացնելով թե «ղարաբաղյան կլանը Մոսկվայի հետ բերեց դրան»։

Ինչպես արդեն հայտնել ենք՝ նախօրեին ագրեսոր Ադրբեջանի ղեկավարը հերթական պահանջն է ներկայացրել Հայաստանին, այն է՝ ներողություն խնդրել ու պատժել արցախյան գոյամարտի մասնակից ազատամարտիկներին։

Բաքվի պահանջները կատարում է Կոռնիձորի Արոյի պաշտպանած Նիկոլ Փաշինյանի իշխանությունը, սակայն նա սլաքներն ուղղեց այլ ուղղությամբ՝ ասելով, թե այս վիճակին բերել է «ղարաբաղյան կլանը՝ Մոսկվայի հետ»։

«Փաստինֆո»-ի հարցին, թե ում նկատի ունի «ղարաբաղյան կլան» ասելով՝ Ա. Խուդավերդյանը խուսափեց անհատականացնելուց՝ ասելով, թե «էշն էլ իրեն ձևով է հասկանում, ես խելոքների համար եմ խոսում»։

Նա խոստովանեց, որ վերջին անգամ Արցախում եղել էր 2020 թվականին՝ պատճառաբանելով, թե դրանից հետո ճանապարհը փակ է եղել, հետեւապես նաեւ 2023 թվականի սեպտեմբերի 19-ին Արցախում չի եղել, չի տեսել այնտեղ տիրող մթնոլորտը։ Նկատենք, որ ճանապարհը 2020 թվականից հետո փակ չի եղել, այլ 2022 թվականի դեկտեմբերից, իսկ մինչ այդ Նիկոլ Փաշինյանը, որը ստորագրել էր նոյեմբերի 9-ի հայտարարությունը, տվել էր իր համաձայնությունը, որ փոխվի Լաչինի միջանցքով ճանապարհը։ Այլ հարց է, որ Նիկոլ Փաշինյանն ու իր քաղաքական թիմը 2020 թվականից հետո այլեւս չեն մեկնել Արցախ, քանի որ այդպես էր պահանջել Բաքուն։

«Փաստինֆո»-ի դիտարկմանը, որ 2023 թ-ին Հայաստանը մենակ թողեց արցախցիներին՝ Խուդավերդյանը չհամաձայնեց՝ ասելով, թե «Լաչինը փակեցին, որ Հայաստանից չգան, չօգնեն»։ Մինչդեռ նախքան 2023 թվականի սեպտեմբերի 19-ի ագրեսիան Նիկոլ Փաշինյանն արդեն իսկ հայտարարել էր, որ Արցախի դեմ նոր ագրեսիա սանձազերծվելու դեպքում Հայաստանը չի օգնի, քանի որ Արցախը համարում է Ադրբեջանի մաս։

Այսօր ՔՊ-ի իշխանական աթոռներին մոտ կանգնած Կոռնիձորի Արոն թիրախավորեց թիրախավորեց ու վիրավորական արտահայտություններ հնչեցրեց գերության մեջ գտնվող Արցախի ռազմաքաղաքական նախկին ղեկավարությանը՝չխնայելով անգամ Նիկոլ Փաշինյանի հետ իր բոլոր քայլերը համաձայնեցնող Արայիկ Հարությունյանին, որի Արցախի նախագահ ընտրվելը մեծ ոգեւորությամբ էր ընդունել Նիկոլ Փաշինյանը. «Արայիկ ա , ինչ ա, էն գերության մեջ ծափ տվողը, բունկերային անասունները, որոնք գտնվում են հիմա Բաքվում, իրանց սրած բիզը, իրանց վզին դայաղ եղավ, մեկն էլ կար անթրաշ, որ գոռում էր Ղարաբաղն անկախ ա Հայաստանի հետ կապ չունի»։

Նա նշեց, թե 150 հոգի գնդակահարման ենթակա մարդ է տեսնում։ Իսկ ինչու 2023 թ-ին Հայաստանը մենակ թողեց արցախցիներին «Փաստինֆո»-ի հարցապնդմանն ի պատասխան Կոռնիձորցի Արոն ասաց. «Ի՞նչ օգներ Հայաստանը, հասնեին Գորիս ,Կոռնիձորում կանգնեին նայե՞ին, օգնեցին, սնունդ ուղարկեցին, բայց ճանապարհը փակ էր»:

Արցախը Ադրբեջանի մաս ճանաչելու Փաշինյանի հայտարարությունները ԵԿՄ անդամը շրջանցեց, իսկ Ադրբեջանից հայ գերիներին չվերադարձնելը բացատրեց այն հանգամանքով, որ Ալիևը դա անում է, որ խամաճիկի նման ինչպես ցանկանա, այնպես մատները շարժի։

Աղբյուր` Փաստինֆո