Փաստ ինֆո

Իսրայելում իրավիճակն այս պահին հանգիստ է, նախօրեին միայն հյուսիսային շրջաններն էին հրթիռահարվում։ Այս մասին «Փաստինֆոյի» հետ զրույցում ասաց Պետախ Տիկվայի իսրայելահայերի «Նաիրի» միության նախագահ, «Իսրայելահայեր» թերթի գլխավոր խմբագիր Արտյոմ Չերնամորյանը։

«Այն իրավիճակը, որ ցույց են տալիս իրանական հեռուստաընկերություններով ֆեյք է, մենք այս պահին Իսրայելում ենք և, եթե այստեղ նման ավերածություններ լինեին՝ կիմանայինք։ Մեկ հրթիռ ընկել է դպրոցի բակում, Թել Ավիվում նաև կան ավերված շենքեր։ Ինչ մնում է զոհերին և վիրավորներին՝ Իսրայելի որևէ քաղաքացի չի զոհվել, զոհվել է մեկ պաղեստինցի, որի գլխին ընկել է օդում խոցված հրթիռի մնացորդի մի մեծ կտոր։ Այդ անձը անօրինական կերպով Իսրայելում գտնվող պաղեստինցի է, որը եբրայերեն չի իմացել ու չի հասկացել, որ օդային տագնապ է ու պետք է թաքստոցում լինել։ Հայերի շրջանում զոհեր ու վիրավորներ այս անգամ չեն եղել»։

Անդրադառնալով լայնածավալ պատերազմի մասին կանխատեսումներին՝ նա ընդգծեց, որ ժամանակին ինքը կանխատեսում էի, որ Իսրայելը Լիբանան է մտնելու։ «Այն ժամանակ մարդիկ կարծում էին Իսրայելը նման քայլի չի գնա, բայց Իսրայելի տարածքը պարբերաբար հրթիռահարվում էր ու ակնհայտ էր, որ Իսրայելը միջոցներ է ձեռնարկելու։ Ավելին, Իսրայելի հյուսիսից այս պահին տարհանված է ավելի քան 75 000 մարդ»։

Նա ընդգծեց, որ այս պահին բարդ է կանխատեսել, թե Իրանի հակամարտությունը որքանով կարող է խորանալ։ «Իրանը բավական անկանխատեսելի է։ Այն, որ Իրանը Իսրայելին կհարվածի՝ մեզ համար ակնհայտ էր, բայց չէինք սպասում որ դա այսքան ուշ տեղի կունենա։

Առաջին անգամ երբ սպանվեց գեներալ-լեյտենանտ Ղասեմ Սոլեյմանիին՝ մենք Իրանի հարվածին սպասեցինք 3 ամիս, 3 ամիս անց միայն Իրանը պատասխան հարված հասցրեց, այս անգամ Իրանի նախագահի սպանությունից հետո սպասեցինք մոտ մեկ ամիս։ Իրանը բազմաթիվ ապտակներից հետո՝ որոշեց պատասխել միայն հեռախոսների ու փեյջերների պայթյուններից ու Հասան Նասրալայի սպանությունից հետո։

Կարծում եմ, այստեղ հիմա ամեն բան կախված է նրանից, թե Իսրայելն ինչպես կպատասխանի։ Կարծում եմ, առաջին անգամ պատասխանը բավական սիմվոլիկ էր, թեև ես նաև Ռաիսի մահը նույնպես կապում Իսրայելի պատասխանի հետ, Ադրբեջանի նախագահը Ռաիսին կանչեց Ադրբեջան ու չգիտես ինչու՝ 3 ինքնաթիռներից միայն 1-ի մոտ տեսանելիության հետ կապված խնդիրներ առաջացան, այն էլ հենց այն ուղղաթիռին, որում Իրանի ողջ վերնախավն էր։ Հիմա կարծում եմ Իսրայելի պատասխանից է կախված, թե արդյոք կբռնկվի նոր պատերազմ, ամեն դեպքում, դա Իրանին ձեռնատու չէ։ Իրանն հայտարարել է, որ Իսրայելի դեմ նոր գործողություններ չեն անելու, բայց ապրենք՝ կտեսնենք։

Եթե Իսրայելը ԱՄն-ի հետ որոշի հարվածել Իրանի միջուկային օբյեկտներին՝ սա կբերի լայնածավալ պատերազմի, ու այս անգամ լուրջ պատերազմի կհանգեցնի Իսրայելի ու Իրանի միջև։ Ես չեմ կարծում, որ նման բան լինի, որովհետև առջևում ԱՄՆ-ի ընտրություններն են։ Չեմ կարծում, որ ընտրությունների նախաշեմին նախագահ Բայդենը ու ԱՄՆ-ի կառավարությունը կորոշի գնալ այս քայլին և աջակցել Իսրայելին՝ հարվածներ հասցնել Իրանին։

Եթե անկեղծ՝ ինձ համար հիմա ամենակարևորը Հայաստանի պահպանումն է։ Այս պահին ՀՀ կառավարությունը պետք է լինի չափազանց աչալուրջ, ժամ առ ժամ զինվի ու ամեն ինչ պետք է արվի, որ Ադրբեջանն այն քաոսային իրավիճակից չօգտվի, եթե Իսրայելը հարվածի՝ Իրանը կարող է հարվածներ հասցնել Իսրահելի հենակետերին Ադրբեջանում։ Այս քողի ներքո Ադրբեջանը կարող է նաև Հայաստանի վրա հարձակվել, որը գիշեր ցերեկ պատրաստվում է հարձակման»։

Աղբյուր` Փաստինֆո