Փաստ ինֆո

«Հայաստան» խմբակցության պատգամավոր Աննա Գրիգորյանն այսօր կառավարության հետ հարցուպատասխանի ժամանակ ասաց, որ Փաշինյանն այսօր ևս մեկ անգամ հաստատեց, որ Արցախը մեր վզին կախված թոկ էր, որից ինքն ազատվեց։ «Բայց միթե հիմա էլ չկա այն գիտակցումը, որ Արցախը Ադրբեջանի կազմում ճանաչելուց հետո, Արցախում էթնիկ զտում իրականացնելուց հետո Ադրբեջանը չի կանգնել։ Արցախը թոկ չէր մեզ վզին, Արցախը մեր հպարտությունն էր ու դուք էլ այդ կարծիքն ունեիք, հետո ինչ, որ հիմա քաղաքական նպատակահարմարությունից ելնելով հիմա ուրիշ բան եք ասում»,-ասաց Գրիգորյանն՝ ընդգծելով ՄԱԿ-ի ամբիոնից այդպես էլ չլսեց, որ Փաշինյանը խոսի Արցախում էթնիկ զտման մասին, մինչդեռ դա հայ ժողովրդի պատմության մեջ ամենաողբերգական իրադարձություններից մեկն էր։

«Խոսեցիք ՀՀ օկուպացված տարածքների մասին, գերիների մասին, անգամ հումանիտար խնդիր չբարձրացրեցիք այդ ամբիոնից, մինչդեռ Բայրամովը ձեզ եկավ ու պատասխանեց, որ դեռ Սահմանադրություն փոխեք, հետո էլ 300 հազար ադրբեջանցիների վերադարձի հարց կա։ Չկա՞ էն գիտակցումը, որ Ադրբեջանը կարմիր գիծ չի քաշում, չկա այդ կարմիր գիծը։ Ոնց էր հնարավոր էդ ամբիոնից ելույթ ունենալ ու չխոսել գերիների մասին»,-ասաց Գրիգորյանը՝ պահանջելով ներկայացնել այն կետը, որի շուրջ սկզբունքային համաձայնություն ձեռք չի բերվում։

Նիկոլ Փաշինյանը պատասխանեց, որ ինքը չի ասել, որ ԼՂ-ն Հայաստանի վզին թոկ էր, այլ ասել է, որ ԼՂ հարցն օգտագործվել է որպես թոկ Հայաստանի վզին, այդ թվում՝ Հայաստանի ներսում։

«Երբ երկրում տարբեր տարիների տարբեր խնդիրներ կային, ամեն բան բացատրվում էր «դե Ղարաբաղ ենք պահում, բանակ ենք պահում» ձևակերպմամբ։ Հետո երևաց, թե ինչ է պահվել ու ինչ տրամբանությամբ է պահվել»։
Անդրադառնալով ՄԱԿ-ում ելույթին, նա նշեց, որ սա ՄԱԿ-ի ամբիոնից իր 4-րդ ելույթն էր, որն ուներ այլ տրամաբանությունը։ «Ես որոշում եմ կայացրել, որ այս ելույթը պետք է ունենա այս տրամաբանությունը, որովհետև էս է էսօր համապատասխանում ՀՀ պետական շահերին։ Ինչ մնում է խաղաղության պայմանագրի բովանդակությանը՝ դրա մասին հանրությանը թափանցիկ ձևով ասել ենք՝ պահելով դիվանագիտական կոռեկտությունը»։

Նա նաև ընդգծեց, որ ՀՀ ժողովուրդն ուզում է այն, ինչի մասին ինքը խոսում է։

Աղբյուր` Փաստինֆո