Փաստ ինֆո

1920թ․ ՀՅԴ-ն կանգնել է իշխանություն զիջելու և հող զիջելու երկընտրանքի առջև, զիջել՝ իշխանությունը։ Միակ բանը, որ ՀՅԴ-ն զիջել է, եղել է իշխանությունը, բայց դուք դա չեք հասկանա։ Այս մասին ԱԺ-ում հարցուպատասխանի ընթացքում ասաց Քրիստինե Վարդանյանը, ապա հիշեցրեց Փաշինյանի տարիներ առաջ արված հայտարարության ձայնագրությունը՝ փոխզիջումների վերաբերյալ, որում Փաշինյանը հայտարարել էր․ «Չի կարող խոսք լինել փոխզիջումների մասին մի իրավիճակում, երբ Ալիևը ատամները սրած ամեն օր լկտիաբոր հոխորտում է Հայաստանի եւ հայ ժողովրդի հասցեին: Փոխզիջման համար պետք է լինի փոխզիջման մթնոլորտ, իսկ Ալիևի կողմից ագրեսիվ պահվածքի մթնոլորտում խոսել փոխզիջման մասին նշանակում է խոսել ՀՀ և ԼՂՀ-ի կապիտուլյացիայի մասին»:

«Դուք մի քայլ էլ առաջ գնացիք սրանից և ասացիք, որ ոչ միայն փոխզիջում չկա, այլ ասացիք՝ մեր նպատակն այն չէ, որ Ադրբեջանը բան զիջի»: Այսինքն այս բանակցություններում զիջող միակ կողմը մենք ենք այն մթնոլորտում, որը նկարագրեցիք: Ասացեք, ընդունո՞ւմ եք, որ սա կապիտուլյացիա է, Ձեր իսկ ձևակերպմամբ: Նաև ուզում եմ անդրադառնաք այն կետին, որը չի համաձայնեցվել, որովհետեւ ՄԱԿ-ի ամբիոնից Ջեյհուն Բայրամովը խոսում էր ռևանշիզմի բացառման մասին, այսպես կոչված, փախստականների վերադարձի մասին: Արդյոք էդ չհամաձայնեցված կետը վերաբերում է այդ հարցերից որևէ մեկին»,- ասաց Քրիստինե Վարդանյանը, ինչին ի պատասխան Փաշինյանը հիշեցրեց Եռաբլուր այցելության օրը իր արած գրառումը։

«Եթե ուշադիր եք եղել, ես հրապարակային նաև Քննիչ հանձնաժողովում խնդրին անդրադարձել եմ 1996 թվականից սկսած գործընթացներից: Երբ ձեր գործընկերը ցիտում էր եւ ասում էր՝ սա էսօրվա խոսակցության նյութ չի: Այո, ինչը ես այդտեղ ասել եմ՝ ճիշտ եմ ասել: Եվ դա է պատճառը, որ փոխզիջումները տեղի չեն ունեցել եւ հանգեցրել են պատերազմի: Հարցի էությունն այն է, որ ես այս ամբիոնից մի քանի անգամ հայտարարել եմ, որ Ղարաբաղի հարցը իր էությամբ թոկի ձևով Հայաստանի վզին գցած՝ պարանի գործառույթով են օգտագործել շատ երկրներ, և այն փոխզիջումները, որոնք 2016 թվականի օգոստոսից դրված են եղել բանակցությունների սեղանին, եղել են հետևյալի մասին, որ ՀՀ-ն չպետք է գոյություն ունենա, Հայաստանի վզից գցած պարանը պետք է ձգել ու մի մոտիկ տեղից կապել»,- հայտարարեց նա:

Անդրադառնալով պնդումներին, թե ԼՂ-ն և Հայաստանը կապիտուլյացիայի են ենթարկվել՝ Փաշինյանն ասաց. «Ի՞նչ կապիտուլյացիայի մասին եք խոսում, բա կապիտուլյացիա եղած երկրում ո՞նց է ընտրություն եղել, դուք էլ մանդատ եք ստացել, եկել ստեղ նստել եք, հարց եք տալիս, աշխատավարձ եք ստանում։ Դուք և հայաստանյան ու ոչ հայաստանյան հովանավորները ամեն ինչ անում էիք, որ 2021 թվականի ապրիլ-մայիսին ՀՀ-ում ընտրություններ տեղի չունենան, որ այն փաստացի լուծարվի»:

Աղբյուր` Փաստինֆո