Փաստ ինֆո

Անցած գիշեր Արեգակի վրա բռնկում է տեղի ունեցել, այն ընթացիկ ցիկլում հզորությամբ երկրորդն է դարձել: Այս մասին հայտնում է ՌԻԱ Նովոստին՝ վկայակոչելով Ռուսաստանի գիտությունների ակադեմիայի Տիեզերական հետազոտությունների ինստիտուտի արեգակնային աստղագիտության լաբորատորիայի ղեկավար Սերգեյ Բոգաչովին։

«Այս գիշեր՝ Մոսկվայի ժամանակով ժամը 01:20-ին, Արեգակի վրա բացառիկ խոշոր պայթյուն է գրանցվել։ X7. 1 մակարդակի բռնկումը տեղի է ունեցել Արեգակի սկավառակի գրեթե հենց կենտրոնում՝ Երկրի վրա առավելագույն ազդեցության տարածքում», — ասել է գիտնականը:

Նա պարզաբանել է, որ ընթացիկ արեգակնային ցիկլի սկզբից սկսած, այսինքն՝ վերջին յոթ տարիների ընթացքում, ավելի հզոր պայթյուն է գրանցվել միայն 2024 թվականի մայիսին։ Այնուհետև ռեկորդային մագնիսական փոթորիկների ֆոնին, որոնք հասել են ամենաբարձր՝ հինգերորդ աստիճանին, տեղի է ունեցել X8.7 մակարդակի իրադարձություն։

Մասնագետները նկատել են վերջին երկու օրվա ընթացքում արեգակնային ակտիվության աճը, սակայն նրանց համար, այնուամենայնիվ, անակնկալ է եղել, որ նման հզոր պայթյունի համար Արեգակը կկարողանա էներգիա կուտակել: Վերջին երկու շաբաթվա ընթացքում Արեգակի վրա նկատվել է հանգիստ մթնոլորտ, իսկ սեպտեմբերի 14-ից ի վեր ամենաբարձր աստիճանի ոչ մի բռնկում տեղի չի ունեցել:

Գիտնականը պարզաբանել է, որ ակտիվ կենտրոնը, որտեղ տեղի է ունեցել պայթյունը, Երկրի ազդեցության գոտում կլինի ևս հինգ օր:

Աղբյուր` Փաստինֆո