Փաստ ինֆո

Բլոգեր, Ադրբեջանի բանտային դժոխքին քաջածանոթ Ալեքսանդր Լապշինը «Փաստինֆոյի» հետ զրույցում անդրադարձել է Ադրբեջանի գլխավոր դատախազ Քյամրան Ալիևի հայտարարությանը, թե Արցախի Հանրապետության նախկին ղեկավարությանը ներկայացվել են ծանր մեղադրանքներ, որով ներգրավված են մեծ թվով տուժողներ։

Բլոգերն ընդգծել է, որ նախաքննությունը չափազանց երկար է տևել։ «Ադրբեջանական օրենքով դրա համար հատկացվում է 4 ամիս, բայց ինչպես հայտնի է՝ այդ մարդիկ գերեվարվել են 2023 թ-ի սեպտեմբերին և ուղիղ մեկ տարի անց Ադրբեջանում որոշեցին դատավարությունը սկսել»,-ասաց Լապշինն ընդգծելով, որ գործը դատարան ուղարկելուց հետո՝ առավելագույնը երկու ամիս անց սկսվում է դատավարությունը։

Նա ընդգծեց, որ անձնական փորձից ելնելով՝ շատ բան կարող է պատմել Ադրբեջանի դատական համակարգի մասին։ «Իրականում, ես ընդհանրապես չեմ դիտարկում Ադրբեջանի դատական համակարգը որպես հենց դատական համակարգ։ Իմ սուբյեկտիվ կարծիքով՝ Ադրբեջանի դատական համակարգը «համակարգ» անվանելով մենք բարձրացնում ենք Ադրբեջանի արդարադատության համակարգի ստատուսը, որն իրականում գոյություն չունի»։

Նա հիշեցրեց, որ իրեն Ադրբեջանում դատում էին 2011 թ-ին Արցախ այցելության համար։ «Ես մասնակցել եմ 11 դատական նիստի, բոլոր այդ դատական նիստերը բացարձակ ֆարս էին, սկսած քննիչներից, մինչև պաշտպանը, որն ինձ պարզ ասում էր, որ այս դատը պետք է Ալիևի իշխանությունն ամրապնդելու համար։ Հենց սա է առանցքային պահը, այն ամենն ինչ արվում է Ադրբեջանում՝ արվում է Իլհամ Ալիևի և իր ընտանիքի PR-ի համար, որը թալանում է հարուստ Ադրբեջանը»։

Նա ընդգծեց, որ Արցախի, ինչպես իրենք են ասում ՝ «ազատագրումը» բավարար չէ, քանի որ Ադրբեջանի ժողովուրդը շարունակում է ապրել աղքատության ու վախի մեջ, քանի որ այնտեղ տնտեսական իրավիճակը օր օրի ավելի է վատթարանում՝ նրանց հարկավոր է թշնամի գտնել՝ ի դեմս հայերի։

«Այսինքն, բոլոր այդ դատավարությունները պետք են նախևառաջ Ալիևին՝ սեփական ժողովրդի շրջանում հեղինակությունն ամրապնդելու համար։ Հիմա ինչ սպասել այս դատավարությունից, կարծում եմ, սա շատ երկար պրոցես է լինելու, որը նրանք երկարաձգելու են, ինչպես սերիալը։ Իմ դեպքում՝ 11 դատական նիստ է եղել, իսկ Արցախի ռազմաքաղաքական ղեկավարության դեպքում կլինի մինչև 30-40 դատական նիստ։

Դա սերիալ է, Ադրբեջանի իշխանություններն ապրում են անվերջանալի սերիալային տրամաբանությամբ, նրանք նաև լավագույնս կլուսաբանեն յուրաքանչյուր սերիան, կարծես դա ինչ -որ նոր բան է։ Իմ դեպքում 11 դատական նիստերից յուրաքանչյուրը տևում էր 5-10 րոպե, բայց բոլորը լրագրողների ներկայությամբ էր, խնդիրն էր դրված հնարավորինս ձգել «Լապշին-Ադրբեջան» տարեգրությունը՝ շեղելու համար ադրբեջանական հասարակությանը իրական խնդիրներից։

Նույնը նաև հիմա է լինելու։ Սկզբունքորեն ամեն բան պարզ է, դա լինելու է շատ երկար դատական պրոցես, ենթադրում եմ Ադրբեջանի դատախազները ֆիլմեր են նայել «Նյուրեմբերգյան դատավարության» մասին և վստահ են, որ Արցախի ռազմաքաղաքական ղեկավարությունը ֆոշիստական Գերմանիայի ղեկավարության նման մի բան է, որոնց դատում էին 2-րդ համաշխարհային պատերազմից հետո։ Նրանք դա այդպես ներկայացնելու են իրենց ժողովրդին և փորձելու են նաև դա ներկայացնել ամբողջ աշխարհին։ Դե ամբողջ աշխարհի դեպքում, ոչինչ չի ստացվի, բայց դա ազդեցություն է ունենալու կիսագրագետ Ադրբեջանի ժողովրդի վրա։ Ինչ մնում է Ադրբեջանի գրագետ հատվածին, ապա նրանք այդ ամենին զզվանքով են նայում, հասկանալով, որ դա շոու է։

Թե ինչով կավարտվի այդ շոուն՝ կախված է Իլհամ Ալիևից։ Եթե նա որոշի, որ իր արատավորված համբավը մաքրվել է ու իրեն նորից հզոր լիդեր են համարում՝ կարծում եմ, որոշակի զիջումների կգնա ու այդ մարդկանց բաց կթողնեն»։

Աղբյուր` Փաստինֆո