Փաստ ինֆո

ՀՀ արդարադատության նախարարի պաշտոնից Գրիգոր Մինասյանի հրաժարականի հարցը բարձրացրած ՀՀ ԱԺ «ՔՊ» խմբակցության պատգամավոր Արփի Դավոյանը խուսափում է խոսել պատճառների մասին։

Ինչպես արդեն հայտնել ենք՝ ՔՊ խմբակցության պատգամավորները նախաձեռնել էին ստորագրահավաք նրա հրաժարականի պահանջով ու այն ներկայացրել Փաշինյանին, իսկ այսօր արդեն Գ. Մինասյանը հայտարարեց իր հրաժարականի մասին։
«Մենք կատարել ենք մեր վերահսկողական գործառույթը և դա մանրամասնելու համար երկար ժամանակ է պետք, երկար խոսելն այս պահին նպատակահարմար չեմ համարում»,- ԱԺ-ում լրագրողների հարցերին ի պատասխան ասել է Ա. Դավոյանը։

Լրագրողի հարցին, թե արդյո՞ք այդ դեպքոում մարդիկ իրավունք ունեն կարծել, որ Գրիգոր Մինասյանը ճիշտ է ասում, որ անձնական դրդապատճառներ կան, խարդավանքներ կան՝ Դավոյանն արձագանքեց՝ « Ես ասում եմ այն, ինչ տեղի է ունեցել և չեմ մեկնաբանում նմանատիպ խոսակցությունները։ Այդ մտահոգությունները մեկ օր չեն ի հայտ եկել, կամ երկու օր, որովհետև երբ գործընթաց է տեղի ունենում և ուսումնասիրում ենք բազմաթիվ կարծիքներ և փաստեր, դա ժամանակատար է, հետևաբար ասել, որ երեկ որոշվեց և երեկ քննարկվեց, ճիշտ չէ»։

Նա հրաժարվել է մանրամասնել, թե ինչ փաստեր են եղել Գ. Մինասյանի հրաժարականի համար ու նշել, որ արդարադատության նախարարի պաշտոնը շատ կարևոր պաշտոն է և այնտեղ գտվող մարդը պետք է քաղաքական թիմից լինի։

Աղբյուր` Փաստինֆո