Փաստ ինֆո

«Արթմեդ» ԲԿ-ից փախուստի դիմած Կոնստանտին Հունանյանը՝ «Ալավերդյանցի Կոկո»-ն, ավելի քան երեք տարի կալանքի տակ է՝ Շենգավիթում 28-ամյա Կյաժ Աշոտի սպանության գործով։ Այժմ, ինչպես «Փաստինֆո»-ն տեղեկանում է ՔԿԾ հասարակայնության հետ կապերի բաժնի պետ Նոնա Նավիկյանից, Հունանյանի գտնվելու վայրը պարզելու ուղղությամբ ձեռնարկվում են մեծածավալ օպերատիվ-հետախուզական և փնտրողական միջոցառումներ։

Հիշեցնենք, որ «Արթմեդ» ԲԿ-ում փախուստի է դիմել կալանքի տակ գտնվող քրեական հեղինակություն «Ալավերդցի Կոկոն»։

ՔԿԾ-ից մեզ հետ զրույցում հաստատեցին, որ «Արթմեդ» բժշկական կենտրոնում ստացիոնար բուժում ստացող կալանավորված անձ Կ.Հ.-ն հոկտեմբերի 1-ին՝ ժամը 13:00-ի սահմաններում, հիշյալ կենտրոնից դիմել է փախուստի:

«Դեպքի առթիվ հաղորդում է տրվել ՀՀ ՆԳՆ Երևան քաղաքի վարչության Նոր Նորքի բաժին: Կ.Հ.-ի գտնվելու վայրը պարզելու ուղղությամբ ձեռնարկվել են մեծածավալ օպերատիվ-հետախուզական և փնտրողական միջոցառումներ»,- մեզ հետ զրույցում հայտնեց Նոնա Նավիկյանը։

Նշենք, որ Կոնստանտին Հունանյանը կալանքի տակ է Շենգավիթում հայտնի «Ռիմա Թրեվել» ՍՊԸ-ի սեփականատեր՝ 28-ամյա Աշոտ Պետրոսյանի՝ «Կյաժ Աշոտի», սպանության գործով։

Հիշեցնենք, որ Աշոտ Պետրոսյանի՝ «Կյաժ Աշոտի» աղմկահարույց սպանությունը տեղի է ունեցել 2020թ հունիսի 9-ին՝ Շենգավիթում. Աշոտ Պետրոսյանի և մի խումբ անձանց միջև տեղի ունեցած վիճաբանության ընթացքում փոխադարձ կրակոցներ էին արձակվել միմյանց ուղղությամբ, որի ընթացքում վիճաբանության Աշոտ Պետրոսյանը ստացել է հրազենային վիրավորում, ինչի հետևանքով «Շենգավիթ» ԲԿ-ում մահացել է։

Դեպքի առթիվ քրեական գործ էր հարուցվել, որի շրջանակներում մեղադրանք է առաջադրվել 7 անձի։ Ըստ մեղադրանքի՝ Կոնստանտին Հունանյանը ապօրինի կերպով ձեռք է բերել և կրել ակոսափող հրազեն հանդիսացող կարճափող ատրճանակ, մի խումբ անձանց՝ Կամո Խաչատրյանի, Սամվել Քրմոյանի, Համլետ Թորոսյանի, Տիգրան Հակոբյանի, Դավիթ Թադևոսյանի և գործով չպարզված անձանց հետ շատերի կյանքի համար վտանգավոր եղանակով սպանել է Աշոտ Պետրոսյանին, իսկ այնուհետև՝ ձեռք է բերել, պահել և կրել ակոսափող հրազեն հանդիսացող ինքնաշեն գնդացիր-ատրճանակ, 1975թ գործարանային արտադրության ակոսափող հրազեն հանդիսացող «ПМ» տեսակի ատրճանակ և ռազմամթերք հանդիսացող փամփուշտներ։ Համլետ Թորոսյանը մեղադրվում է ապօրինի կերպով ակոսափող հրազեն ձեռք բերելու և պահելու, ինչպես նաեւ մի խումբ անձանց հետ Աշոտ Պետրոսյանին սպանելու մեջ, Կամո Խաչատրյանը՝ ակոսափող հրազեն պահելու, կազմակերպված խմբի կողմից Պետրոսյանին սպանելու, ինքնաշեն գնդացիր-ատրճանակ և փամփուշտներ ձեռք բերելու և պահելու, Տիգրան Հակոբյանը՝ «АКМ» տեսակի ինքնաձիգ հրազեն ձեռք բերելու, կրելու, կազմակերպված խմբի կազմում սպանություն կատարելու, Դավիթ Թադևոսյանը և Սամվել Քրմոյանը՝ ապօրինի կերպով ակոսափող հրազեն ձեռք բերելու, կրելու, ինչպես նաև՝ սպանություն կատարելու, իսկ Վարդգես Այվազյանը մեղադրվում է Աշոտ Պետրոսյանի սպանությանն օժանդակելու մեջ։ Վերջիններիս նկատմամբ որպես խափանման միջոց է ընտրվել կալանավորումը։

Գործով նախաքննությունն ավարտվել է դեռևս 2021թ․-ին։ Գործը շուրջ երեք տարի է, ինչ Երևանի ընդհանուր իրավասության քրեական դատարանի դատավոր Վարդան Լ․ Գրիգորյանի վարույթում է։

Կյաժ Աշոտի սպանության գործով մեղադրյալները կմնան կալանավորված

Հեղինակ՝ Իզաբել Սահակյան

Աղբյուր` Փաստինֆո