Փաստ ինֆո

Ես և մեր խմբակցությունից մի քանի պատգամավորներ ստացել ենք հրավերներ՝ մասնակցելու Մյուռոնօրհնեքի արարողությանը, մենք կմասնակցենք արարողությանը: Այս մասին «Եռաբլուր» զինվորական պանթեոնում լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։

«Ես չգիտեմ՝ ինչպես է ընտրվել: Կարծեմ այնտեղ բոլոր պատգամավորները չեն հրավիրված, հրավիրված են խորհրդի ղեկավար կազմից եւ մի քանի ճանաչված պատգամավորներ»,-ասաց նա:

Հարցին՝ ինչպես է գնահատում, որ այդ արարողություններին հրավիրված են նաև իշխանության ներկայացուցիչները, Օհանյանն ասաց. «Ես Հայ առաքելական եկեղեցին հարգում եմ, ինքս հավատավոր եմ, քրիստոնյա եմ և գտնում եմ, որ մեր եկեղեցու որոշումները համահունչ են այն իրականությանը, որոնք կան: Ես չեմ քննարկում, թե իրենք ինչ են որոշել, ինչու են հրավիրել, բայց այն, որ Հայ առաքելական եկեղեցու նկատմամբ իրականացվում է հայ ժողովրդին ոչ վայել, ոչ բարոյական շարժումներ, գործողություններ՝ ինձ համար դա անընունելի է»:

Հարցին՝ իրեն չի՞ կաշկանդում, որ իշխանության ներկայացուցիչների հետ միասին նույն միջոցառմանը ներկա գտնվելը՝ նա պատասխանեց, որ իրենք տարբեր միջոցառումների են ներկա գտնվում։ «Միաժամանակ, նույն ԱԺ-ում, նույն նիստերի դահլիճում նստած աշխատում ենք: Ինչո՞ւ պետք է ես կաշկանդվեմ այն հոգևոր, եկեղեցական միջոցառմանը, իշխանությունը լինի, իսկ ես չլինեմ, թող իրենք չլինեն: Ես իմ պարտքը կատարելու եմ և գնալու եմ»:

Աղբյուր` Փաստինֆո