Փաստ ինֆո

Տեղ – Կոռնիձոր - Ստեփանակերտ նոր ճանապարհը պետք է փոխարիներ Բերձորի միջանցքին, դատապարտվել է անգործության։

Հիշեցնենք, որ 2022 թվականի գարնանը Ադրբեջանը հայտարարեց, թե արդեն շահագործման է հանձնում Բերձորի միջանցքի այլընտրանքային ճանապարհը, ինչին «նոյեմբերի 9»-ի հայտարարությունը ստորագրած Նիկոլ Փաշինյանը չառարկեց ու համաձայնեց, որ ճանապարհը փոխվի, թեեւ այն պետքէ տեղի ունենար 3 տարի անց, ավելին՝ հայկական կողմը չէր ավարտել շինարարությունը։ Արագ մրցույթ հայտարարվեց ու սկսվեց շինարարությունը։

Տեղ համայնքի քպական ղեկավար Դավիթ Ղուլունցը 2022 թվականին «Փաստինֆո»-ի հետ զրույցում ասել էր, թե նոր ճանապարհի կառուցմամբ սահմանամերձ համայնքները կարող են շահել.

«Հայկական կողմից կառուցվող ճանապարհը միջպետական ճանապարհ կդառնա, ժողովուրդն իրենց բերքն ու բարիքը կվաճառեն»,-ասել էր նա։ Ճանապարհի հետ առեւտրային մեծ հույսեր էին կապում նաեւ Կոռնիձորում։ Արցախահայության բռնի տեղահանումից մեկ տարի անց «Փաստինֆո»-ն փորձեց պարզել, թե Փաշինյանի կառուցած «միջպետական» ճանապարհը որքանով է նպաստել Կոռնիձորի զարգացմանը։

Կոռնիձոր գյուղի վարչական ղեկավար Արշակ Կարապետյանի փոխանցմամբ՝ այդ ճանապարհը գործել է մի քանի ամիս միայն, իսկ հիմա չի գործում։

«Փաստինֆո»-ի հարցին, թե կոռնիձորցիներին ասվում էր, որ լավ կլինի, առևտուր կլինի, հիմա լա՞վ է, առեւտուր անո՞ւմ են՝ Կարապետյանը կիսաձայն պատասխան տվեց. « Հիմա ի՞նչ առևտուր, աշխատո՞ւմ է այդ ճանապարհը, որ առևտուր էլ լինի։ Շատ արցախցիներ Բերձորը հանձնելուց հետո, բռնի տեղահանման այդ ծանր ճանապարհն անցնելիս , նորակառույց ճանապարհով առաջին անգամ էին անցնում»։

Ըստ համայնքի ղեկավարի՝ նրանցից շատերը մինչ բլոկադան Հայաստանից Արցախ մեկնածներից հետաքրքրվել էին ճանապարհի որակի մասին ու մտահոգություն հայտնել, թե ձորով կառուցած ճանապարհն արդյո՞ք ձմռանն անցանելի կլինի։

Այդ հարցի պատասխանը ոչ ոք չիմացավ, քանի որ ճանապարհը պատրաստ լինելուց հետո առաջին ձմռանը բլոկադայի արդյունքում չգործեց այնքան ժամանակ մինչև դարձավ բռնի տեղահանման համար միակողմանի ուղի՝ 2023 թվականի սեպտեմբերին։

Ավելի վաղ հաղորդել էինք, որ Մ-12 - Տեղ-Կոռնիձոր ավտոճանապարհի մոտ 11.8 կմ հատվածի վերակառուցում 2022 թ. իրականացվելիք շինարարական աշխատանքների, տեխնիկական և հեղինակային հսկողության ծառայությունների համար նախատեսվում է հատկացնել 5,551,808,100.0 ՀՀ դրամ, որից՝ շինարարական աշխատանքների համար՝ 5,463,772,110.0 ՀՀ դրամ, տեխնիկական հսկողության համար՝ 54,052,443.0 ՀՀ դրամ և հեղինակային հսկողության համար։ Այլ խոսքով՝ Փաշինյանի կառավարության կառուցած նոր միջանցքը դարձավ արցախահայության գաղթի ճանապարհը, ինչից հետո այն փակվեց։

Աղբյուր` Փաստինֆո