Փաստ ինֆո

Երևանի Հակոբ Օշականի անվան թիվ 172 դպրոցի փորձաքննության արդյունքները չեն բավարարել պետական գերատեսչություններին և կրկնակի փորձաքննության կարիք է առաջացել։ Այս մասին «Փաստինֆոյի» հետ զրույցում ասաց Երևանի քաղաքապետի խոսնակ Հայկ Կոստանյանը։

Նա տեղեկացրեց, որ քաղաքապետարանը փորձաքննությունը վստահել էր մասնավոր կազմակերպությանը։ «Կազմակերպությունը, որ մենք դիմել էինք սեյսմիկ ռիսկի գնահատում և վերջնական ամփոփ պատկեր տալու համար, արձանագրությունը փոխանցել է մեզ։ Մենք այն փոխանցել ենք ՆԳՆ փրկարար ծառայությանը, որը գտել է, որ կատարված սեյսմիկ գնահատումը որոշակի հարցերի պատասխաններ չի տվել։ Հետևապես, ՆԳՆ ենթակայությամբ «Սեյսմիկ ծառայության» ՊՈԱԿ-ը ևս մեկ անգամ անցկացնելու է սեյսմիկ ռիսկի գնահատում , որից հետո երբ ՆԳՆ-ն էլ իրենց եզրակացությունը տա, արդեն այդ վերջնականի գնահատումից հետո մենք կկարողանանք ասել, թե մեր քայլերը որոնք են. արդյոք, պատասխանը կլինի այն, որ ամեն բան նորմալ է և անվտանգության տեսանկյունից որևէ խնդիր չկա ու երեխաները կկարողանան դադարեցնել հեռավար ուսուցումը և անցնել նորմալ դասապրոցեսի, թե այլ լուծում կգտնենք։ Ամեն դեպքում՝ մենք այդ պատասխանից ելնելով պետք է հասկանանք, թե որոնք են մեր գործողությունները»,- ասաց խոսնակը

Հարցին, թե արդյոք հարևան շինարարական աշխատանքները որևէ կերպ ազդել են դպրոցի սեյսմակայությունյան վրա թե ոչ՝ քաղաքապետարանի պաշտոնյանի հայտնեց, որ այս ուղղությամբ փորձաքննությունը պատասխան չի տվել։ «Կազմակերպությունն այս մասով որևէ եզրակացություն չի տրամադրել»,- ասաց նա։

Հիշեցնենք, դեպ սեպտեմբերի առաջին շաբաթվա ընթացքում դպրոցն անցել էր հեռավար ուսուցման, քանի որ տնօրենը դպրոցում կոնստրուկցիաների շարժ էր նկատել։

Շատերը դպրոցում ցնցումները կապում էին հարևան շինարարության հետ, եւ քաղաքապետարանից այս ժամանակ «Փաստինֆո»-ին հայտնել էին, որ դպրոցում արձանագրված ցնցումներն ու շինարարության հետ կապը հասկանալու համար նշանակվել են ինժեներա- երկրաբանական փորձաքննություններ, բայց հարցի պատասխանը, պարզվում է, չկա, թեեւ փորձաքննությունն ավարտվել է։

Աղբյուր` Փաստինֆո