Փաստ ինֆո

Ադրբեջանցի նախկին պաշտոնյայի հայտարարությունը երկու տեսանկյունից պետք է դիտարկել։ Այդ հայտարարությունն ինձ համար որևէ արժեք չունի, այն քարոզչական է և որևէ իրական գործընթաց դրա տակ լինել չի կարող։

Այս մասին «Փաստինֆոյի» հետ զրույցում ասաց «Պատիվ ունեմ» խմբակցության քարտուղար Հայկ Մամիջանյանն՝ անդրադառնալով Ադրբեջանի նախկին արտգործնախարար Թոֆիգ Զուլֆուգարովի հայտարարությանը, ըստ որի՝ Բաքուն Հայաստանից ակնկալում է փոխհատուցում՝ տարածքներ՝ գումարի փոխարեն։

Մամիջանյանն ընդգծեց, որ պատմության մեջ չի հիշում տարածքային փոխհատուցման դեպք միջազգային հարաբերությունների և միջազգային իրավունքի տեսանկյունից

«Բայց կարծում եմ, լավ կլինի, որ Ադրբեջանի նախկին ԱԳ նախարարի խոսքը ուշադիր կարդան ՀՀ այսօրվա կառավարիչները և համադրեն Ալիևի ու Ադրբեջանի գործող պաշտոնյաների ռազմական, ագրեսորական և հակահայկական հռետորաբանության հետ ու հասկական, թե արդյո՞ք միջազգային դատարաններից ՀՀ-ն ընդդեմ Ադրբեջանի հայցերի հետ կանչը լա՞վ գաղափար է, թե՞ վատ, ամեն գնով ՝ բոլոր ադրբեջանական պահանջները կատարելու գնով դատարկ բովանդակությամբ և ընդամենը անունով խաղաղության պայմանագրի ստորագրում մուրալը լա՞վ գաղափար է, թե՞ վատ , Ադրբեջանի պահանջներին տուրք տալով ԵԱՀԿ Մինսկի խմբի լուծարման գաղափարի համահեղինակ դառնալու վերաբերյալ հստակ դիրքորոշում բարձրաձայն չհայտնելը լա՞վ գաղափար է, թե՞ վատ։ Առաջին հերթին՝ ՀՀ կավարիչները պետք է հետևություններ անեն»։

Նշենք, որ Զուլֆուգարովը հայտարարել է, որ Ադրբեջանն ու Հայաստանը բանակցում են խաղաղության շրջանակային սկզբունքների շուրջ, իսկ հետո կանցնեն հումանիտար հարցերին և օկուպացիայի համար Հայաստանի քաղաքական պատասխանատվությանը։

«Եթե Հայաստանը չհամաձայնի փոխհատուցում վճարել, Ադրբեջանը կարող է դիմել միջազգային դատարան։ Տարածքային փոխհատուցման տարբերակը նույնպես հնարավոր է, եթե Հայաստանը չկարողանա վճարել պահանջվող գումարը,- ասել է նա։

Աղբյուր` Փաստինֆո