Փաստ ինֆո

Հայաստանը կասկածի տակ է դնում ինքն իրեն, իր գոյությունը։ Պատկերացնո՞ւմ եք , արտասահմանից ներդրողը նայի ու տեսնի, թե ինչպես են ՀՀ-ում վարվում սեփականության իրավունքի հետ, ռիսկ կանի՞ գալ ներդրում անել, որ վաղն ասեն, թե սա է սխալ եղել, նա է սխալ եղել։ «Փաստինֆո»-ի հետ զրույցում ասաց Գրողների միության նախագահ Էդվարդ Միլիտոնյանը՝ անդրադառնալով ՀՀ գլխավոր դատախազության նախօրեին տարածած հայտարարությանը, որով կասկածի տակ է դրվել Հայաստանի ստեղծագործական միությունների գույքի օրինականությունը։ Ավելին՝ նշել էր, որ հարուցվել են քրեական վարույթներ, հայցեր ներկայացվել վարչական դատարան՝ վիճարկելով մի շարք գույքի նկատմամբ գրողների, նկարիչների միությունների սեփականության իրավունքը։

Էդ. Միլիտոնյանի փոխանցմամբ՝ դատախազությունը վիճարկում է ոչ միայն ստեղծագործական միությունների գույքը, այլ շուրջ 27 հազար գույքի մասին է խոսվում հայցադիմումներում։

«Թեեւ միությունների շենքերը պետական չեն եղել, բայց իրենք պնդում են, թե անկախ Հայաստանի գերագույն խորհուրդն ինչ-որ որոշում ունի, որով պետական շենքերը պետք է պետությանը մնային», - ասաց Գրողների Միության նախագահը՝ դատախազության քայլերը որակելով սեփականության իրավունքի կոպիտ խախտում, ինչն ընդունված չէ քաղաքակիրթ աշխարհում։

«ԳԽ-ի 1990թ. այդ որոշման հետ միությունների շենքերը կապ չունեն, այդ որոշումը ԽՍՀՄ պետական շենքերին է վերաբերել, եւ ոչ թե ստեղծագործական միություններին։ Կադաստրի կոմիտեն հիմքերը նայել է, հաստատել ու տվել սեփականշնորհման վկայական։ Հիմա ՀՀ դատախազությունը Կադաստրի պետական կոմիտեին է քարշ տալիս Վարչական դատարան, որ գլխին խփի , ասի ձեր անցյալը սխալ է, որ մեր ամեն ինչն անցյալում սխալ է եղել, ամբողջ Հայաստանի կադաստրային իավունքը զրոյացվում է։ Հայաստանը կասկածի տակ դնում ինքն իրեն, իր գոյությունը։ Պատկերացնո՞ւմ եք, արտասահմանից ներդրողը նայի ու տեսնի, թե ինչպես են ՀՀ-ում վարվում սեփականության իրավունքի հետ, ռիսկ կանի՞ գալ ներդրում անել , որ վաղն ասեն, թե սա է սխալ եղել, նա է սխալ եղել»,- ասաց պարոն Միլիտոնյանը։

Նա առաջարկեց ուսումնասիրել սեփականության իրավունքը պաշտպանող կոնվենցիաները հարց ուղղել ՀՀ-ում հավատարմագրված եվրոպական երկրների դեսպաններին, թե ինչ կլինի, եթե իրենց երկրում կպնեն սեփականության իրավունքին։

«Դու ինչպե՞ս ես 25 տարի առաջվա սեփականության իրավունքը կասկածի տակ դնում, երբ գործ է արվել, գույքահարկեր են տրվել, պայմանագրեր են կնքվել, ներդրումներ են արվել, հիմա այդ ներդրողները և՞ս պետք է տուժեն։ Ագամ բարոյական հարցերը չեն հետաքրքրում ոչ մեկի։ Ի՞նչ բարոյականություն, ի՞նչ ավանդույթ, ի՞նչ գրականություն... Իսահակյանն է ներդրում արել այս շենքի կառուցման մեջ , ինքն է առաջին նախագահը եղել , շենքը կիսատ է մնացել, ինքն ավարտել է՝ իր միջոցներով, Ի՞նչ դեմքեր են մտել այստեղ, ի՞նչ միջավայր է ստեղծել միությունը, իսկ ո՞վ է դա հաշվի առնում։ Բարոյական հարցեր չկան, կա միայն այն, որ պետությունը պետք է վերցնի ինքը որոշի Դուք մա՞րդ եք , թե մարդ չեք»,- ասաց Միլտոնյանը՝ ավելացնելով, որ այս մոտեցմամբ առաջնորդվելու դեպքում նաեւ քաղաքացիներից պետք է պահանջեն 90-ականներին սեփականաշնորհված բնակարանները, ովքեր դրանք ստացել էին պետությունից։
«Դե որ այդպես է՝ թող պետական տները, որոնք թույլ տվեցին մարդկանց սեփականաշնորհել, հետ խլեն, էսպես ո՞նց կլինի»,- ասաց Միլիտոնյանը։

Աղբյուր` Փաստինֆո