Փաստ ինֆո

Իշխանությունն իբրև զավթելու գործը, որով կալանավորված է «Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը, հարուցվել է ՔՊ-ական պատգամավոր Արմեն Խաչատրյանի հաղորդման հիման վրա։ Սերոբ Գասպարյանի պաշտպանական խմբի անդամ Ալեքսանդր Կոչուբաևը «Փաստինֆո»-ի հետ զրույցում նշեց, որ որքան էլ տարօրինակ հնչի պնդումը, բայց Գասպարյանի նկատմամբ հետապնդումը քաղաքական չէ։

«Պարզապես, պատգամավոր Արմեն Խաչատրյանը ԱԱԾ-ին տեղեկացրել է, որ այս խեղճ անձանց տարել են ՌԴ, որ վերապատրաստեն և գան՝ զինված հեղաշրջում կատարեն։ Գործի ակունքը սա է, ոչ ծանրակշիռ ՕՀՄ-ներ են եղել, ոչ փաստական ծանրակշիռ տվյալներ են եղել, որ անձինք նման գործողություններ են արել։ Այսինքն՝ պատգամավոր Արմեն Խաչատրյանն ԱԱԾ-ին ասել է՝ տեսե՞լ եք այս տղերքին տարել են ինչ անեն, այս պայմաններում ի՞նչ անի ՔԿ-ն, բա գործ չհարուցի՞։ Գործը քաղաքական է այն ասպեկտով, որ որոշ պաշտոնյաներ ցանկացել են հատուկ ընդգծել իրենց ծառայությունն՝ իշխանություններին։ ՔԿ-ն էլ ՝ առանց ստուգելու հիմքը՝ հարուցել է»,- նշեց փաստաբանը՝ հավելելով, որ դժբախտաբար նախաքննական գաղտնիքով կաշկանդված են, շատ խոսել չեն կարող, բայց վարույթի հիմքում ծիծաղ առաջացնող փաստական տվյալներ են։ Նա ևս մեկ անգամ ընդգծեց, որ Սերոբ Գասպարյանի մեղադրանքն ապօրինի է, բայց քաղաքական չէ, որովհետև գործը հարուցվել է ոչ թե քաղաքական իշխանության ցուցումով, այլ՝ ինչ-որ պաշտոնյայի՝ կիսատեղեկության հիման վրա։

«Ոչ զենք կա հայտնաբերված, ոչ գրագրություն կա հայտնաբերված, իսկ Մարիա Զախարովան էլ պատասխանել է, որ սա հերթական ֆեյք նյուզն է, այսինքն՝ հերթական ֆեյք քրեական գործն է։ Դա է պատճառը, որ մենք հարկադրված արդարություն ենք փնտրում «օտար» ափերում, դիմել ենք՝ Լավրովին, Բելոուսովին, Կոպիրկինին, որ հաստատեն՝ մերոնք ձեր մոտ եկե՞լ են վերապատրաստման, որ գան զինված հեղաշրջում կատարեն, ունե՞ն այնպիսի ռազմաբազա, ինչի մասին ՔԿ-ն խոսում է հաղորդագրությամբ»,- նշեց Կոչուբաևը՝ հավելելով, որ այս հարցերի պատասխանները ստանալուց հետո գործը փակուղում կհայտնվի, Գասպարյանն էլ՝ հերթական տեղեկատվական սպեկուլյացիայի զոհը դարձավ, որովհետև Արմեն Խաչատրյանը մեջների «ամենահայրենասերն» էր․ «Զինված հեղաշրջումն էլ երկու 70-ն անց պապիկները պետք է կատարեին, որոնց Սերոբ Գասպարյանը տարել էր ՌԴ՝ վերապատրաստման։ Լպրծուն գործելաոճ ընդամենը, թե «պարոն վարչապետ, տեսեք ինչ հետևողական ենք մենք, ինչ տվյալ ստացանք՝ տվեցինք ԱԱԾ-ին, ԱԱԾ-ն էլ ինչպիսի հետևողականությամբ բացահայտեցին դեպքը, իրենք խնդիրը ստեղծել են, իրենք՝ բացահայտել, իրենք էլ՝ քննում են»։

Դիտարկմանը, որ փաստացի մեղադրում են ՌԴ-ին, Կոչուբաևը նշեց՝ նման միտում տեսել է, բայց այն անձինք, որոնք այդ մասին խոսում են՝ ՌԴ ուժը չեն պատկերացնում։

«Եթե ՌԴ-ն ցանկանար այստեղ զինված հեղաշրջում աներ, ապա վստահաբար 70-նն անց պապիկների միջոցով չէր անի։ Բացի այդ, հստակ երևում է, որ արտաքին դիվանագիտության տեսանկյունից՝ մեր պաշտոնյաները, թող ներեն ինձ, իմբիցիլ են, եթե ասում են՝ 70 տարեկան պապիկների միջոցով ՌԴ-ում զինված հեղաշրջում էր նախապատրաստվում»,- նշեց փաստաբանը՝ հավելելով, որ 70 տարեկան պապիկների ցուցմունքների հիման վրա՝ հայ-ռուսական հարաբերությունները կասկածի տակ առնելը նորմալ չէ։

Կոչուբաևը վստահեցրեց՝ նախաքննական գաղտնիքի շղարշը բարձրացնելուց հետո բոլորը լիաթոք ծիծաղելու են։

Հիշեցնենք, որ ՔԿ-ն սեպտեմբերի 18-ին հայտարարել է՝ իշխանության յուրացման նախապատրաստման ենթադրյալ դեպքի մասին։ Ըստ ՔԿ-ի՝ շուրջ երեք տասնյակ խուզարկությունների, հարցաքննությունների արդյունքում՝ բավարար փաստական տվյալներ են ստացվել, որ ՀՀ քաղաքացիներ Ս.Գ.-ն, Ա.Ե.-ն, Ա.Հ-ն, Ե.Ս.-ն, Ա.Ս-ն, ինչպես նաև ԼՂ նախկին բնակիչներ Ա.Մ.-ն Ա.Ս.-ն, ինքնությունները դեռևս չպարզաբանված այլ անձանց հետ նախնական համաձայնությամբ, խմբի կազմում, կատարել են իշխանությունը յուրացնելու նախապատրաստություն, այն է՝ դիտավորությամբ ստեղծել են ՀՀ իշխանությունը զավթելու՝ բռնություն գործադրելու և բռնություն գործադրելու սպառնալիքի միջոցով ՀՀ կառավարության լիազորություններին տիրանալու համար պայմաններ, ինչի համար նշված անձինք, նախնական համաձայնությամբ, ՀՀ իշխանությունը զավթելու նպատակով, վարձատրության՝ յուրաքանչյուրին ամսական շուրջ 220.000 ՌԴ ռուբլի վճարի դիմաց, ՌԴ-ում եռամսյա հավաքներ անցնելու և դրա ընթացքում նոր ծանր զինատեսակներին ծանոթանալու, դրանց կիրառման հմտություններ ուսանելու, ապա ՀՀ վերադառնալուց հետո մարտական հերթապահություն իրականացնելու, ինչպես նաև գիտելիքները այլ անձանց փոխանցելու պատրվակով, 2024 թվականի ընթացքում հավաքագրել են ՀՀ մի շարք քաղաքացիների և Լեռնային Ղարաբաղի մի շարք նախկին բնակիչների: Քրեական վարույթի շրջանակներում երեք անձ կալանավորվել է, յոթ անձի նկատմամբ քրեական հետապնդում է իրականացվում։ Կալանավորված անձանց թվում Սերոբ Գասպարյանն է, արցախցի Արմեն Մնացականյանը, որը Ռոստովից ՀՀ էր ժամանել՝ եղբորորդու զոհվելու տարելիցին մասնակցելու նպատակով։

Հեղինակ՝ Իզաբել Սահակյան

Աղբյուր` Փաստինֆո