Փաստ ինֆո

Արդեն մի քանի օր է պատերազմական բախումները ոճային փոփոխություն են գրանցել, փոխվել է աշխարհագրությունը. թիրախում ոչ միայն Հարավային Լիբանանն է կամ Բեյրութի հարավային արվարձանները, այլեւ՝ Բեքքան, Հերմեկը։ Այս մասին «Փաստինֆո»-ին ասաց Լիբանանում «Ազդակ» օրաթերթի խմբագիր, հրապարակախոս Շահան Գանտահարյանը։

Նրա փոխանցմամբ՝ հարվածներն ուղղված են այն հատվածներին, որտեղ «Հեզբոլլահը» հենակետեր ունի։ Զոհերի թիվը և տուժածների թիվն աճել է, որովհետև գործողությունները, թեեւ թիրախային են, բայց ավելի ընդարձակ տարածք են ընդգրկում։

«Չենք կարող ասել, որ բաց պատերազմի տեսքով է ընթանում, Գազայում կիրառված մեթոդը Լիբանանի դեպքում չի կիրառվում, բայց թիրախներին հարվածելիս նաև տուժում է շրջակայքը»,- ասաց մեր զրուցակիցը։

Նրա բնութագրմամբ՝ Իսրայելը փորձում է ինչ-որ տեղ նաև խուճապ ստեղծել` հոգեբանական, տեղեկատվական պատերազմ է։

«Հիբրիդային պատերազմի յուրօրինակ տարբերակ է այս պահի դրությամբ»,- ասաց «Ազդակ» օրաթերթի խմբագիրը։ Ինչ վերաբերում է լիբանանահայությանը, ապա նրանք նույն խնդիրներն ունեն, ինչ-որ Լիբանանի մյուս քաղաքացիները, ինչը մեծամասամբ սոցիալական բնույթ է։ Այս պահին նյութապես և ֆիզիկապես չեն տուժել, բայց խնդիրներ ունեն տնտեսվարող հայերը, որոնք առևտրական ինչ-ինչ գործեր ունեն Լիբանանի հարավում, - ասաց Գանտահարյանը։

Լիբանանի հարավային հատվածում իսրայելական օդուժի հարվածների հետևանքով զոհերի թիվը, այս պահի դրությամբ, հասել է 558-ի, վիրավորներինը՝ 1835-ի։ Այս մասին մամուլի ասուլիսում հայտնել է Լիբանանի առողջապահության նախարարի պաշտոնակատար Ֆիրաս Աբյադը։

«Զոհերի թվում կան 50 երեխաներ և 94 կանայք, զոհվել են նաև շտապօգնության չորս աշխատակիցներ, նրանց մեքենաները խոցվել են ավիահարվածների հետևանքով»,- ասել է Աբյադը:

Աղբյուր` Փաստինֆո