Փաստ ինֆո

Օգոստոս ամսվա կտրվածքով Երևան քաղաքում տեղադրված օդի մոնիթորինգի 85 կայաններից ստացված տվյալների համաձայն, օդում p.m 2,5 կամ մանրահատիկ փոշու պարունակությունը կազմել է 12.3 միկրոգրամ/մ.խ, ինչը չի գերազանցում օրենսդրությամբ սահմանված սահմանային թույլատրելի կոնցենտրացիան՝ 35 միկրոգրամ/մ.խ.: Այս մասին զեկուցվեց Երևանի քաղաքապետարանի հերթական գործակարգավարական խորհրակցության ժամանակ:

Նշվեց, որ այս պահին տեղադրված սարքերի թիվը ավելացել է և կազմել 117 սարք:

Քաղաքապետ Տիգրան Ավինյանն արձանագեց, որ այստեղ ամենամեծ խնդիրն այն է, որ երկու պետական մարմին՝

Հիդրոօդերևութաբանության ՊՈԱԿ-ը և մենք իրարից տարբերվող տվյալներ ենք տալիս:

«Ես օնլայն տեսնում եմ մեր սարքերի տվյալները: Այն, ինչ տալիս են մեր սարքերը, ավտոմեքենաների սարքերով էլ հաստատվում են: Այսինքն, այն տարաբնույթ քննարկումները և այն լեգենդը, որ Երևանում օդի որակը շատ վատն է, մասնավորապես, շատ փոշոտ է, իսկ փոշու հիմնական ցուցիչը p.m 2,5 ցուցիչն է, որը այս սարքերով արդեն որերորդ ամիսն է կամ ցածր փոշոտվածություն են ցույց տալիս, կամ միջին փոշոտվածության ամենացածր շեմը: Որևէ՝ տրամաբանական հիմնավորում և պատճառ չեմ կարողանում գտնել, բացի այս մեթոդաբանական տարբերություններից: Խնդրում եմ հասկանալ, թե ինչումն է տարբերությունը, քանի որ 117 սարք չեն կարող միասին սխալ տեղեկատվություն տալ»,-ասավ նա՝ երևանցիներին հորդորելով Yerevan.am կայքում հասանելի բոլոր սարքերի տվյալներին ինքնուրույն ծանոթանալ։

Աղբյուր` Փաստինֆո