Փաստ ինֆո

ՀՀ արդարադատության նախարարության ներկայացուցիչը, թեև պնդում է, թե Վահե Միսակյանը դիտավորությամբ է ձգձգել Վազգեն Մանուկյանի դատավարությունը, սակայն գործի քննության արդյունքում այդպես էլ չպարզվեց՝ ինչ շարժառիթով։

«Փաստինֆո»-ի հաղորդմամբ՝ ԲԴԽ-ում այսօր ավարտվել է Երևանի ընդհանուր իրավասության քրեական դատարանի դատավոր Վահե Միսակյանին կարգապահական պատասխանատվության ենթարկելու վերաբերյալ ՀՀ արդարադատության նախարարության ներկայացրած միջնորդության քննությունը։

Ըստ ներկայացված միջնորդության՝ դատավորի նկատմամբ կարգապահական վարույթը հարուցվել է դատախազության հաղորդման հիման վրա՝ Վազգեն Մանուկյանի գործով իբրև դատավարական ժամկետների խախտման պատճառաբանությամբ։ Մասնավորապես, Մանուկյանը մեղադրվում էր իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր հնչեցնելու մեջ։ Դատավոր Միսակյանը, գործը ստանալով 2021 թվականի մարտին, դատավճիռ է հրապարակել 2024-ի հունիսին։ Նա Մանուկյանին մեղավոր է ճանաչել և դապարտել 400․ 000 ՀՀ դրամի չափով տուգանքի։ Նշենք, որ ավելի վաղ՝ ապրիլի 4-ի որոշմամբ դատավոր Վահե Միսակյանի նկատմամբ ԲԴԽ-ն խիստ նկատողություն է հայտարարել, որի «մարման» ժամկետը երկու տարի է, հետևաբար, չի բացառվում, որ խնդիր է դրված դատավորի լիազորությունները դադարեցնելու։

Այսօրվա նիստում դատավորը և նրա ներկայացուցիչ Արա Ղազարյանը ներկայացրին իրենց դիրքորոշումը՝ վարույթի վերաբերյալ։ Փաստաբան Արա Ղազարյանը նկատեց՝ լիազոր մարմինը չի ներկայացրել վերաբերելի և բավարար հիմքեր՝ դատավորին կարգապահական պատասխանատվության ենթարկելու հանրային անհրաժեշտությունը հիմնավորելու համար, իսկ մի շարք առանցքային հիմնավորումներում վկայակոչված փաստական հանգամանքներն իրականցությանը չեն համապատասխանում, դրանք հերքվել են։ Նրա խոսքով՝ որոշման մեջ չի կատարվել հանրային ու մասնավոր շահերի համադրում, փոխհավասարակշռում, չի վերլուծվել դատավորին կարգապահական պատասխանատվության ենթարկելու հանրային իրական պահանջի առկայությունը տվյալ գործի շրջանակներում։ Լիազոր մարմնի կարգապահական վարույթ հարուցելու անհրաժեշտությունը հիմնավորվում է դատաքննության երկարատևությամբ՝ առանց հաշվի առնելու օբյեկտիվ ու վերաբերելի հանգամանքներ՝ օրինակ` դատավորի ծանրաբեռնվածությունը, անձնական և մասնագիտական բարեվարքությունը, որոշման հնարավոր ազդեցությունը հանրային ու մասնագիտական հեղինակության վրա, վիճահարույց գործի՝ օրենքով սահմանված կարգով լուծված լինելու հանգամանքը, դատաքննության ողջամիտ ժամկետի իրավունքի խախտման մասին բողոքի բացակայությունը դատավարության մասնակիցների կողմից և ընթացիկ դատական գործի պայմաններում կարգապահական վարույթ հարուցելու իրավաչափությունը․«Արդյունքում կայացվել է կարգապահական վարույթ հարուցելու անհամաչափ որոշում, որը անհրաժեշտ չէ ժողովրդավարական հասարակությանը։ Նման հանգամանքում տեղի է ունեցել դատավոր Միսակյանի մասնավոր կյանքի, պատվի, բարի համբավի անձեռնմխելիության իրավունքի անհամաչափ միջամտություն, որը երաշխավորված է իրավունքով՝ ՀՀ Սահմանադրությամբ և Մարդու իրավունքների եվրոպական կոնվենցիայով»։ Շարունակելով ներկայացնել պատասխանը՝ Վահե Միսակյանը նկատեց, որ առաջին հայացքից խնդրահարույց է, եթե կարող էին չորս նիստով ավարտել քննությունը, ապա ինչու է այդքան երկար տևել, բայց արդյո՞ք արդարադատությունը միայն դատական նիստերի ընթացքում է իրականացվում։ Բացի այդ, Միսակյանը նկատեց, որ իրեն վերագրվում է դիտավորություն՝ նիստերի հետաձգման մեջ, սակայն ինքն այդպես էլ չտեսավ շարժառիթի մասին որևէ հիմնավորում։ Անդրադառնալով ծանրաբեռնվածությանը՝ Միսակյանը նշեց, որ ծանրաբեռնվածության բարձր ցուցանիշ ունի, ինչն ավելի վաղ ներկայացրել էր լիազոր մարմնին, իր վարույթում 160-ից ավել միայն քրեական գործեր կան, 2021թ սկսած իր դատական օրական նիստերը եղել են 6-8 նիստ, եղել են նաև միջնորդություններ, ողջամտորեն՝ այս ծանրաբեռնվածության պայմաններում նիստերը հետաձգվել են 2-3 ամիս ժամանակահատվածում, բացառություն չի եղել նաև նշված քրեական գործը։ Բացի այդ, այս գործը չի եղել կալանավորական, մեղադրյալը եղել է ազատության մեջ, հետևաբար, առաջնահերթություն է տրվել՝ կալանավորական գործերով առավել սեղմ ժամկետներում նիստեր նշանակելու առումով։ Միսակյանն ընդգծեց՝ դատական քննությունը միայն նիստեր նշանակելն ու դատական ակտ հրապարակելը, կայացնելը չէ, այդ պրոցեսին նախորդում է՝ ստացված գործի նյութերին ամբողջությամբ ծանոթանալը, պատրաստվելը, միջնորդություններ քննարկելը, լուծելը, օրենսդրությունն ուսումնասիրելը, առավել ևս, որ այս գործը մեծ պրակտիկա չուներ, վիճակվում էր՝ ազատ խոսքը, ինչը պարտավորեցնում էր լրացուցիչ ուսումնասիրություն իրականացնել։ Ծանրաբեռնվածությամբ պայմանավորված՝ դատավորը նաև արտաժամյա է աշխատել։

Դատավորը, եզրափակելով պատասխանի ներկայացումը, նշեց, որ փաստացի հերքվում են լիազոր մարմնի պնդումները, թե ինքը ջանասիրություն չի ցուցաբերել, գործը վերաքննիչ դատարանում է, բողոք չի ներկայացրել դատախազությունը, իսկ պաշտպանության կողմը չի վիճարկել գործի քննության ողջամիտ ժամկետների խախտում։

Արա Ղազարյանն իր եզրափակիչ ելույթում նկատեց՝ միջազգային մարմինների կողմից բազմիցս նշվել է, որ կարգապահական վարույթները նպատակը ոչ թե պատժելը կամ անձին համակարգից հեռացնելն է, այլ՝ վարքագիծ փոխելը։

«Բոլորս գիտենք, որ ՀՀ-ում դատավորները ծանրաբեռնված են, բայց անտրտունջ աշխատում են, ինչպես՝ պարոն Միսակյանը։ Հիմա, եթե ԲԴԽ-ն որոշի կարգապահական պատասխանատվության ենթարկել, ապա խնդրում ենք հիշել, որ պարոն Միսակյանը պետք է համակարգին»,- ասաց Արա Ղազարյանը՝ նշելով, որ հնարավո՞ր է արդյոք հասնել այնպիսի որոշման, որ և վերաբերմունքի փոփոխություն լինի, և չկորցնենք այս արժեքավոր մարդուն, որովհետև նա բարձր ցուցանիշներ է ցուցաբերել, անցել ճանապարհ՝ 20 տարի ամենացածր աստիճանից հասնելով նվաճումների։ Ղազարյանն ընդգծում է՝ Միսակյանը վարքագծի խախտում թույլ չի տվել, գուցե՝ ինչ-որ տեղ հապաղել է, բայց արդյոք դրա հանրային հետաքրքրվածությունն ու անհրաժեշտությունն այնքան սուր է, որ տույժ նշանակվի, թե կարելի է բավարարվել քննարկումով։

«Պետք է պահել դատավորին համակարգում, քանի որ նա արժեք է, պետությունը նրա վրա ռեսուրս է ծախսել»,- նշեց Ղազարյանը՝ ընդգծելով, որ այստեղ առկա չէ վարքագծի խախտում, կա՝ մեծ ծանրաբեռնվածություն և գուցե հաշվարկները որ ճիշտ անել։

Վահե Միսակյանն էլ եզրափակիչ ելույթում նկատեց՝ մոտիվացիա, միտում չի ունեցել ձգձգելու, ինքն առնվազն իր հետ ազնիվ է, կան գործեր, որոնք երկար են քննվում, փորձում է հնարավորինս պահել այդ բալանսը, կան նույնիսկ գործեր, որոնք այլ դատավորներից են փոխանցվել․ «Ես իրավիճակին համարժեք եմ արձանագնքել, փորձել եմ ամեն ինչ անել, որ նիստերը չհետաձգվեն։ Նիստերը հետաձգվել են օբյեկտիվ անհրաժեշտությամբ»։

ԲԴԽ-ում գործի քննությունն ավարտվեց։ Խորհուրդը հեռացել է խորհրդակցական սենյակ՝ որոշում կայացնելու, որը կհրապարակվի սեպտեմբերի 30-ին, ժամը՝ 11։15-ին։

Հեղինակ՝ Իզաբել Սահակյան

Աղբյուր` Փաստինֆո