Փաստ ինֆո

Երևանի օդում փոշու քանակությունը 5-6 անգամ գերազանցում է նորման, օդի աղտոտվածության բոլոր հնարավոր սահմանները մենք հատել ենք։ Այս մասին «Փաստինֆոյի» հետ զրույցում ասաց բնապահպան Սիլվա Ադամյանն՝ անդրադառնալով Երևանի քաղաքապետ Տիգրան Ավինյանի հայտարարությանը։ Ինչպես արդեն հայտնել ենք՝ քաղաքապետարանի գործակարգավարական խորհրդակցության ժամանակ Ավինյանը լեգենդ է որակել հնչող մտահոգություններն առ այն, որ Երևանում օդի որակը շատ վատն է։ Ըստ նրա՝ քաղաքապետարանի 117 սարքերը հերքում են դա, մինչդեռ «Հիդրոօդերևութաբանության և մոնիտորինգի կենտրոն» ՊՈԱԿ-ի հրապարակած տվյալները վկայում են հենցի օդի աղտոտվածության մասին։ Ավինյանի կարծիքով՝ ամենամեծ խնդիրն այն է, որ երկու պետական հիմնարկ իրարամերժ տեղեկություն են տալիս։

Բնապահպանը նշում է, որ քաղաքում անկառավարելի շինարարական աշխատանքներ են իրականացվում՝ քաղաքապետարանը, քաղաքաշինության կոմիտեն տրամադրում են բոլոր անհրաժեշտ թույլտվությունները հետագա շինարարական աշխատանքների համար, ուստի պետք է հնարավորինս մեղմ ներկայացնել քաղաքի իրական էկոլոգիական իրավիճակը։ «Քաղաքապետարանը, ցանկանալով հետագայում էլ շարունակել էս խայտառակ վիճակը շինարարության ոլորտում, տալ թույլտվություններ, այսօր նման հերքումներով է հանդես գալիս ու փորձում իրավիճակը խեղաթյուրել, այստեղ ես կոռուպցիոն ռիսկեր եմ տեսնում»։

Ադամյանը ընդգծեց, որ «Հիդրոօդերևութաբանության և մոնիտորինգի կենտրոն» ՊՈԱԿ-ը բավական լավ հագեցած է սարքավորումներով և, որ կարևոր է՝ ունի նաև փորձ օդի աղտոտվածության մոնիթորինգի բնագավառում։ «Ես ուզում եմ հստակ լինի, թե ինչու է քաղաքապետը այսօր փորձում օբյեկտիվ տվյալները խեղաթյուրել ու համոզել, թե հիդրոմետի տվյալները լավը չեն, իսկ իրենցը՝ ճիշտ են։ Քանի որ որոշում է կայացվել հիդրոմետի տվյալները հրապարակային դարձնել՝ ես համոզված եմ, որ երևանի քաղաքապետրանում խնդիր է դրվել այդ տվյալները ստվերել։ Մինչդեռ, քաղաքապետը չունի մասնագիտական կրթություն ունեցող մարդիկ և չի կարող հստակ տվյալներ ներկայացնել»;

Նրա դիտարկմամբ՝ քաղաքապետն այս քայլով փորձում է այնպես անել, որ Երևանում կանգ չառնեն շինարարական աշխատանքները։

«Ես հորդորում եմ Շրջակա միջավայրի նախարարությանը, Առողջապահության նախարարությանը, նաև «Հիդրոօդերևութաբանության և մոնիտորինգի կենտրոն» ՊՈԱԿ-ին, որպեսզի իրեն հանդես գան հայտարարությամբ և ցույց տան իրական պատկերը, որն իրոք՝ Երևան քաղաքում վախեցնող է»,- եզրափակեց բնապահպանը։

Աղբյուր` Փաստինֆո