Փաստ ինֆո

Ես սովորաբար նման դեպքերում ասում եմ 6-րդ պալատի այցելու, այնպես որ կարծում եմ, լավ է, որ Զախարովան ավելի խիստ հայտարարություններ չի ասել։ Այս մասին «Փաստինֆոյի» հետ զրույցում ասաց ռազմական փորձագետ Հայկ Նահապետյանը՝ անդրադառնալով ՀԱՊԿ-ի՝ ՀՀ անվտանգությանը սպառնալիք լինելու մասին ՀՀ վարչապետ Նիկոլ Փաշինյանի հայտարարությանը և դրան Մարիա Զախարովայի արձագանքին։

Զախարովան նշել էր, որ Հայաստանի վարչապետ Նիկոլ Փաշինյանի՝ ՀԱՊԿ-ի կողմից ՀՀ ինքնիշխանությանը սպառնացող վտանգի մասին հայտարարությունը հակասում է ողջախոհությանը։

Նահապետյանի դիտարկմամբ՝ Փաշինյանը նման հայտարարություն անելով կարո՞ղ է ցույց տալ ՀԱՊԿ-ում կայացված որևէ որոշում, որը կարող է ՀՀ-ի անվտանգությանը գոյությանը, տարածքային անվտանգությանն ու ինքնիշխանության համար սպառնալիք լինել։ «Գեթ մեկ որոշում կարո՞ղ է ցույց տալ։ Չկա նման բան։ Եթե չկա նման որոշում, ապա ինչպե՞ս կարող է ՀԱՊԿ-ը գործունեություն իրականացնել, որը նշված 4 թիրախներով վտանգ կներկայացնի ՀՀ-ի համար։

Փաշինյանը քնեց՝ արթնացավ նոր հիշե՞ց, որ ՀԱՊԿ-ը վտանգավոր է։ Ինքը շատ լավ հասկանում է, որ կենաց է ասել, նրա ասածը ներքին սպառման համար է։ Նա հող է նախապատրաստում նոյեմբերի 9-ի փաստաթղթի 9-րդ կետը չեղարկելու համար»,- ասաց Նահապետյանը։

Փորձահետը հիշեցրեց արտգործնախարար Արարատ Միրզոյանի հայտարարությունն առ այն, որ ճանապարհի վերահսկողությունը միջազգային պահնորդական կազմակերպությանն են տալու։

«Եթե ճանապարհի վերահսկողությունը ինքնիշխանության կորուստ է՝ ինչո՞ւ է վստահում այլ միավորի։ Ցանկացած պահնորդական կառույց իրավաբանական անձ է, ունի գրանցման հասցե, իսկ այդ գրանցման հասցեն երկրի մոլորակի ինչ-որ պետությունում է, ոչ թե Մարս մոլորակի վրա։ Այստեղից էլ հետևություն, ինչ -որ մի պետության կառույց է, իսկ դա չի կարող լինել պատահական երկրի կառույց։

Թեև դեռ անուն չի տրվել, բայց վստահեցնում եմ, որ դա ՆԱՏՕ-ական երկիր է լինելու, և հետևաբար ծառայելու է այլ երկրի հատուկ ծառայությունների համար, իսկ հավաքական առումով՝ արևմուտքի համար։ Փաշինյանը պարզապես բառախաղի միջոցով փորձում է մարդկանց ինչ-որ բաներ համոզել, այնպես, ինչպես 15 օր առաջ փորձում էր համոզել, որ վերահսկողությունն ու մոնիթորինգը նույն բաներն են»,- նշեց փորձագետը։

Նահապետյանը հիշեցրեց, որ Փաշինյանը ԱԺ ամբիոնից հայտնել էր, որ միջազգային մի շարք կառույցներ ՀՀ-ում մոնիթորիգ են անում. «ասում է՝ թող դա էլ մոնիթորինգ անեն միջազգային կառույցները։ Դա տգիտություն է, վերահսկողությունը գործառույթ է, որը կարող է պրոցես կանգնեցնել, մինչդեռ մոնիթորինգը դիտարկում է նշանակում, այսինքն իրավիճակի արձանագրում է ու չի կարող իրավիճակի վրա ազդել։

Հաջորդ տգիտությունն այն է, որ նա ասում է, թե նոյեմբերի 9-ի հայտարարությամբ ՌԴ-ն հավակնում է տարածքի վերահսկողության, մինչդեռ դա այդպես չէ։ Նոյամբերի 9-ի փաստաթղթում տարածքի վերահսկողության մասին խոսք չկա, տրանսպորտային կապուղիները տարածք չեն, որը պետք է վերահսկվի։

Երրորդ կեղծիքն այն է, որ միջազգային պահնորդական կառույց է իրականացնելու ենթակառույցների վերահսկողությունը, դա նշանակում է, որ կոնկրետ երկրից եկած կազմակերպության է տալոի վերահսկողությունը։ Փաշինյանը դրսից եկած կազմակերպությանը վերահսկողություն է տալիս, քանի որ միջանցք չի կարող տալ, որովհետև Նոյեմբերի 9-ին փաստաթղթում միջանցք բառ չկա»,- արձանագրեց փորձագետը։

Աղբյուր` Փաստինֆո