Փաստ ինֆո

«Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը մեղադրանքը չի ընդունում։ Այս մասին «Փաստինֆո»-ի հետ զրույցում ասաց Սերոբ Գասպարյանի պաշտպան Գուրգեն Գրիգորյանը։

Ինչպես արդեն տեղեկացրել ենք՝ ՔԿ-ն երեկ հայտարարել է՝ իշխանության յուրացման նախապատրաստման ենթադրյալ դեպքի մասին։ Ըստ ՔԿ-ի՝ շուրջ երեք տասնյակ խուզարկությունների, հարցաքննությունների արդյունքում՝ բավարար փաստական տվյալներ են ստացվել, որ ՀՀ քաղաքացիներ Ս.Գ.-ն, Ա.Ե.-ն, Ա.Հ-ն, Ե.Ս.-ն, Ա.Ս-ն, ինչպես նաև ԼՂ նախկին բնակիչներ Ա.Մ.-ն Ա.Ս.-ն, ինքնությունները դեռևս չպարզաբանված այլ անձանց հետ նախնական համաձայնությամբ, խմբի կազմում, կատարել են իշխանությունը յուրացնելու նախապատրաստություն, այն է՝ դիտավորությամբ ստեղծել են ՀՀ իշխանությունը զավթելու՝ բռնություն գործադրելու և բռնություն գործադրելու սպառնալիքի միջոցով ՀՀ կառավարության լիազորություններին տիրանալու համար պայմաններ, ինչի համար նշված անձինք, նախնական համաձայնությամբ, ՀՀ իշխանությունը զավթելու նպատակով, վարձատրության՝ յուրաքանչյուրին ամսական շուրջ 220.000 ՌԴ ռուբլի վճարի դիմաց, ՌԴ-ում եռամսյա հավաքներ անցնելու և դրա ընթացքում նոր ծանր զինատեսակներին ծանոթանալու, դրանց կիրառման հմտություններ ուսանելու, ապա ՀՀ վերադառնալուց հետո մարտական հերթապահություն իրականացնելու, ինչպես նաև գիտելիքները այլ անձանց փոխանցելու պատրվակով, 2024 թվականի ընթացքում հավաքագրել են ՀՀ մի շարք քաղաքացիների և Լեռնային Ղարաբաղի մի շարք նախկին բնակիչների: Քրեական վարույթի շրջանակներում երեք անձ կալանավորվել է, յոթ անձի նկատմամբ քրեական հետապնդում է իրականացվում։ Կալանավորված անձանցից մեկը Սերոբ Գասպարյանն է։

Գասպարյանի պաշտպան Գուրգեն Գրիգորյանը «Փաստինֆո»-ի հետ զրույցում ասաց, որ Սերոբ Գասպարյանն իր մեղքը չի ընդունում, հաստատապես համոզված են՝ նման բան չի եղել։

«Սերոբ Գասպարյանը հաստատապես որևէ կապ չունի մեղադրանքում շարադրված տեքստից ոչնչի հետ»,- ասաց փաստաբանը։

Ինչ վերաբերում է իրականացված խուզարկություններին, փաստաբանը, զերծ մնալով նախաքննական գաղտնիք հրապարակելուց, միայն նշեց, որ Սերոբ Գասպարյանի կամ նրա ընտանիքի անդամներից որևէ մեկի մոտ հնարավոր չէ, որ լինի այնպիսի իր, առարկա, որը անթույլատրելի կամ հակաօրինական է, հաստատապես նման բան չկա, բացառվում է։ Անդրադառնալով պաշտոնապես տարածված հաղորդագրությանը՝ Գրիգորյանը նշեց, որ նկարագրված գործողությունները վերլուծելով, թե քանի մարդ պետք է հավաքագրվեր, ինչ ժամանակահատվածում իրականացվեր, ապա միայն հաշվելով պարզ է, որ ներկայացված գործողությունների համար ոչ թե 3-6 ամիս ժամանակ է պետք, ինչպես նշում են, այլ՝ 2 տարի։

«Չի կարելի վարույթն իրականացնող մարմնին հանրությանը ներկայացնել հանգամանքներ, որոնք պարզ հաշվարկի դեպքում էլ՝ հասկանում ես, որ դա չի համապատասխանում իրականությանը։ Դրա համար պետք չէ լինել ոչ տնտեսագետ, ոչ հաշվապահ»,- ասաց փաստաբանը՝ նշելով, որ վարույթն իրականացնող մարմնի կողմից նկարագրված հանգամանքներն իրականությանը չեն կարող համապատասխանել․ «Վարույթն իրականացնող մարմնի վերլուծությունն առնվազն ճիշտ չէ»։ Գուրգեն Գրիգորյանն ընդգծեց, որ Սերոբ Գասպարյանն այն անձնավորությունը չէր, որ հնարավորություն ունենար նման բան կազմակերպելու, ինչպես նաև՝ անհնարին էր կատարել այն, ինչի մասին նշում է վարույթ իրականացնող մարմինը՝ խոսելով հավաքագրումից։

Պաշտպանը հայտնեց, որ պատրաստվում են վերաքննիչ բողոք ներկայացնել՝ կալանավորման որոշման դեմ՝ արձանագրելով, որ բացակայում են կալանքի հիմքերը։

Նշենք, որ Ս. Գասպարյանը ազատամարտիկ Ռուստամ Գասպարյանի եղբայրն է, որը որդու հետ նահատակվեց 44-օրյա պատերազմի ժամանակ՝ հայրենիքը պաշտպանելիս։

Հեղինակ՝ Իզաբել Սահակյան

Աղբյուր` Փաստինֆո