Փաստ ինֆո

Այն ողբերգությունը որ տեղի ունեցավ մեկ տարի առաջ Արցախում, ցավոք հայ ազգի համար այդպես էլ դաս չհանդիսացավ։ նախ մենք պետք է հստակ հասկանանք, ընմռնենք, որ տեղի ունեցածը, ինչպես էլ այն անվանենք, ցեղասպանություն, թե էթնիկ զտում, թե բռնի տեղահանում՝ դա հանդիսանում է մեկ դար առաջ տեղի ունեցած մեծ եղեռնի շարունակությունը։ Այս մասին Արցախի վրա հարձակման և Արցախի համաթափման տարելիցին Եռաբլրում ասաց Արցախի Ազգային Ժողովի նախագահի պաշտոնակատար Գագիկ Բաղունցը։

«Խոսելով երկրի անվտանգության մասին, որը երկու բաղադրիչ է ենթադրում՝ հզոր բանակի ստեղծում և զուգահեռ խաղաղության օրակարգ, իշխանությունները շեշտը դնում են միայն խաղաղության օրակարգի վրա, հույսներս դնելով որ դրանով կարելիէ ապահովել երկրի անվտանգությունը։ Մինչդեռ ես այսօրվա իշխանությունների քաղաքականությունը նմանեցնում եմ այսպես կոչված «Շվեդական սինդրոմին», երբ զոհը փորձում է սեր ըմբռնում դրսևորել ահաբեկչի նկատմամբ, մինչդեռ հստակ կարելի է ասել, որ նման դրսևորումը Թուրքիայի և Ադրբեջանի նման հարևանների դեպքում, չի կարող արդյունք տալ։ Այսինքն, մենք այլ կերպ պետք է կառուցենք մեր արտաքին քաղաքականությունը»։

Դիտարկմանը, թե պարբերաբար մեղադրանքներ են հնչում, որ Արցախը չկա, քանի որ ԱՀ նախագահ Սամվել Շահրամանյանը փաստաթուղթ ստորագրեց՝ Բաղունցն ասաց՝ փաստաթուղթն իրավական ուժ չունի, իսկ դրա ստորագրումը ստիպված քայլ է եղել 120,000 արցախցիների կյանքը փրկելու և Արցախից դուրս բերելու համար։
«Ոչ ոք Արցախի Ազգային Ժողովը ցրելու կամ լուծարելու իրավասություն չուներ։ Անգամ նախագահը, այս քայլը կատարվել է արցախահայությանը փրկելու նպատակով։ Մենք շարունակում ենք կրել մեր պատասխանատվությունը արցախահայության հանդեպ և անելու ենք ամեն ինչ, որպեսզի և քաղաքական իրավուքնները ապահովենք և սոցիալ տնտեսական խնդիրների լուծմանն առավելագույնս նպաստենք»։

Ինչ վերաբերում է ՀՀ իշխանությունների կողմից Արցախի նախագահի և արցախցի այլ պաշտոնյաների դեմ իրականացված գործողություններին ու արված հայտարարություններին, Բաղունցը նշեց՝ իր համար զարմանալի է, որ պետական մակարդակով կատարվում են քայլեր, որոնք կարելի է այլ հարթակում լուծել՝ փոխըմբռնման ու բանակցությունների միջոցով՝ հաշվի առնելով համապատասխան իրավական ակտերը։ «Նման պարտիզանական գործողությունները վայել չէ որևէ պետական կառույցի: Հայ ազգի երկու հատվածների միջև անընդունելի է նման պահվածքը, վերաբերմունքը: Քաղաքական կամք և պատասխանատվություն է պետք ՀՀ իշխանությունների կողմից, որպեսզի մենք ծաղրածու չդառնանք ամբողջ քաղաքակիրթ աշխարհի առջև: Մենք հստակ կարող ենք ասել, որ արցախյան կողմը պատրաստ է բոլոր տեսակի քաղաքակիրթ հարաբերություններին»:

Անդրադառնալով արցախցիների՝ ԼՂ վերադարձի և առհասարակ Արցախի հարցը փակելուն՝ Բաղունցը նշեց, որ այդ հարցը հնարավոր չէ փակել և խնդիրն իրենք մշտապես պահելու են օրակարգում։

Հարցին՝ որքանով է բավարար համարում ՀՀ իշխանությունների ջանքերն՝ ուղղված Բաքվում պահվող Արցախի ռազմաքաղաքական ղեկավարության ազատ արձակմանը, նա պատասխանեց․ «Բավական է ասել, որ այնպիսի հզոր հնարավորություն, որ ունի ՀՀ իշխանությունը՝ բանակցային գործընթացքում առանցքային խնդիրներից մեկը դարձնել Արցախի ռազմաքաղաքական ղեկավարության վերադարձը, չի օգտագործվում, ինչը կարծում եմ լուրջ բացթողում է»։

Նա նշեց, որ իրենք ևս որոշակի քայլեր են ձեռնարկում այդ ուղղությամբ և չնայած շատ ավելի թույլ մեխանիզմներ ունենալու հանգամանքին, այնուամենայնիվ փորձում են հարցն անընդհատ օրակարգում պահել՝ միաժամանակ հիշեցնելով, որ բոլորովին վերջերս են հայտարարություն տարածել այս թեմայով, ինչպես նաև հանդիպել Միջազգային քրեական դատարանի նախկին գլխավոր դատախազ Լուիս Մորենո Օկամպոյի հետ։

Աղբյուր` Փաստինֆո