Փաստ ինֆո

ՍԴ նախկին նախագահ, ՍԴ դատավոր Հրայր Թովմասյանի գործի քննությունն ավարտվեց։ Երևանի ընդհանուր իրավասության քրեական դատարանը՝ դատավոր Տաթևիկ Գրիգորյանի նախագահությամբ, հեռացել է խորհրդակցական սենյակ՝ վճիռ կայացնելու։ Վճիռը կհրապարակվի սեպտեմբերի 20-ին, ժամը՝ 15։00-ին։

«Փաստինֆո»-ի հաղորդմամբ՝ դատարանում վերջին խոսքի ընթացքում նշեց, իր համար միանշանակ է՝ անկախ ինչ դատավճիռ էլ, որ կայացվի, այս դատավճիռը չի սահմանափակվելու միայն Հրայր Թովմասյանով, սա այլ երևույթների շարունակություն է ունենալու։

«Այս դատավճռով պայմանավորված՝ սուբյեկտային կազմը կարող է էականորեն փոփոխվել, և վստահեցնում եմ, որ մի օր, երբ, չեմ կարող ասել, բայց ես էլ եմ էդ առումով դիմելու, որ էս գործի բոլոր մանրամասները առաջին կաշառք տալու օպերատիվ տվյալից մինչև դատաքննության փուլում ինձ համար ոչ այնքան հասկանալի երևույթները , ողջամիտ ժամկետում գործի քննության համար կարող են անգամ րոպեները նշանակություն ունենալ, այս ամբողջը դառնալու է քննարկման առարկա։ Անկախ ելքից՝ սրանք ունենալու են իրենց հետևանքները նաև այդ մարդկանց համար, թե ով, ինչ մասնակցություն է ունեցել էս ամբողջին։ Անգամ, եթե ես կպարտվեմ, ամոթ չէ, ամոթ է անարդարության դեմ չպայքարելը, եթե մեղադրանք ներկայացվեր միայն իմ սուբյեկտիվ անձին, այս պայքարը վերաբերվելու էր բացառապես Հրայր Թովմասյանին, միգուցե կշեռքի մյուս նժարին դրված արժեքը լիներ Հրայր Թովմասյանին առնչվող ինչ-որ բան, կարող է և էս ամբողջը շատ շուտ ավարտված լիներ»։Թովմասյանի խոսքով՝ ինքը դատվում է, դատարանի առաջ կանգնել է միայն նրա համար, որ համարձակություն է ունեցել՝ բարձրաձայնելու այն, ինչը մնացածը չէին ասում, այն ժամանակ չցանկացան, չվստահեցին, հիմա էլ ամեն ինչ կորցված չէ, դեռ ունենք հնարավորություն՝ ինչ-որ մի բան պահելու։

«Եթե նախորդ կանխատեսումս իրականացավ՝ Արցախի կորուստն էր, հիմա՝ ավելի մեծ բան կա դրված, որը կարող է կորսվել։ Ես պնդում եմ, հրապարակային չեմ ասի՝ ինչու եմ այստեղ, ինձ դատում են՝ հենց դա տեսնելու համար, բայց մարդկային պատմությունը լի է դրանով։ Ոչ ոք ինձ չհամարի զոհ, ես զոհ չեմ և այս դատավճիռն էլ իմ մասին չէ, ես ինչ նպատակ ունեի այս դատական պրոցեսի ընթացքում հասնելու, հասել եմ»,- ասաց Թովմասյանը։

Պաշտպան Արամ Օրբելյանը ևս մեկ անգամ պնդեց՝ պահանջում է արդարացնել Թովմասյանին։ Հանրային մեղադրողը, հիշեցնենք, պահանջում է յոթ տարի ժամկետով ազատազրկման դատապարտել Թովմասյանին։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։

Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո