Փաստ ինֆո

Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, այսօր կայացել է ՍԴ նախկին նախագահ, ՍԴ դատավոր Հրայր Թովմասյանն ավարտեց պաշտպանական ճառի հրապարակումը՝ արձանագրելով, որ դատարանն իրեն թույլ չի տվել լիարժեք իրացնելու իր ճառը։

«Փաստինֆո»-ի հաղորդմամբ՝ այսօրվա նիստում Հրայր Թովմասյանը շարունակել է ներկայացնել պաշտպանական ճառը, որում անդրադարձ է կատարվել նաև գործում առկա ցուցմունքներին, նախագահողը, սակայն, ընդհատել է՝ պահանջելով ճառը ներկայացնել օրենքին համապատասխան։ Ճառի ընթացքում իրավիճակը լարվեց, Հրայր Թովմասյանին դատարանը թույլ չտվեց հայտարարությամբ հանդես գալ։

«Սենց ենք շարունակելու, ես ավարտելու եմ իմ ճառը, եկեք վերջակետ դնենք, վերջացնենք, ինչ եք ուզում ինձնից։ Ի՞նչ պարոն Թովմասյան, թողելու եք ավարտել, թե՝ ոչ»,- ասաց Հրայր Թովմասյանը, ինչին արձագանքելով դատարանը սանկցիա կիրառեց նրա նկատմամբ՝ հայտարարելով նկատողություն։

«Ինչ ուզում եք կիրառեք, հետո՞»,- արձագանքեց Թովմասյանը, ապա շարունակեց՝ ուրիշ բան է ասում, թողեն՝ ավարտեն, ասում է՝ միտումնավոր չեն բերել և ներկայացրել դատարանին վկային, ստացվում է՝ միակ վկան, որ ասել է՝ իրեն տեսել է՝ չկա, այժմ պնդում է, որ հատուկ չկա։

Դատարանը հաջորդիվ կրկին ընդհատեց, հորդորեց՝ ամփոփել ճառը։ Հրայր Թովմասյանն էլ նշեց՝ ավարտում է ճառը, արձանագրում՝ թույլ չեն տվել իրացնել իր ճառը։

«Արձանագրում եմ, որ Դուք ինձ թույլ չեք տվել լիարժեք իրականացնելու իմ ճառը, ես այլևս ասելիք չունեմ, գտնում եմ, որ այս դատարանը կողմնակալ դատարան է, աշխարհում չկա որևէ դեպք, որ վաղեմության ժամկետն անցած գործով մարդուն յոթ ժամ պարտադրեն ճառ հրապարակել և անգամ ընդմիջում չտալ, տասնյակ այլ գործեր հետաձգեն՝ այս գործի համար։ Ինձ հայտնի չէ Ձեր վարքագծի դրդապատճառները, հայտնի կդառնա՝ դատական ակտից հետո։ Դատարանն իր գործողություններով խոչընդոտել, միջամտել է և թույլ չի տվել իրացնել իր ճառը, պետք է ավարտջական ճառում անդրադառնար մի շարք ցուցմունքների, գնահատականների, բայց չի անում, որովհետև դատարանը խոչընդոտում է»,- հայտարարեց Թովմասյանը։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո