Փաստ ինֆո

13 անուն դասագրերը, որոնք դպրոցներին սեպտեմբերի 1-ից չի հատկացվել՝ այս տարի չեն էլ տրամադրվելու, քանի որ 13 անուն դասագրքերի մշակման համար կամ մրցույթին մասնակցելու մասնագիտական խումբ չի եղել, կամ դիմած խմբերը չեն հաղթահարել համապատասխան շեմը։ Արդյունքում դասագրքերը չեն գրվել։ Այս մասին «Փաստինֆոյի» հետ զրույցում ասաց կրթության փորձագետ Ատոմ Մխիթարյանը։

«Խնդիրը մի փոքր մեղմելու համար նախարարությունը որոշում է կայացրել որոշ դասարանների և առարկաների հին դասագրքերը օգտագործել, որոնք չեն համապատասխանում նոր չափորոշիչներին։ Սա կարող է կես քայլ առաջ համարել և խելամիտ որոշում, որովհետև ավելի լավ է երեխաները ունենան հին դասագրքեր, քան ընդհանրապես դասագրքեր չունենան, մինչդեռ կան առարկաներ, որոնց համար ոչ միայն նոր դասագրքրեը չկան, այլև հին դասագրքերը թույլ չեն տալիս որպեսզի օգտագործեն։ Խոսքը, մասնավորապես, վերաբերում է 10 –րդ դասարանի «Հայոց պատմություն» առարկային»։

Մխիթարյանը նշեց, որ, այսպես կոչված, չափորոշիչները, որոնք ընդունվել ու գործարկվում են արդեն 2 տարի, էապես տարբերվում են այն չափորոշիչներից, որոնք գործում էին մինչ այս, և դասագրքրեը պետք է համապատասխանեն դրանց։

«Ամենամեծ տարբերությունը հենց «Հայոց պատմության» կամ արդեն փոփոխված «Հայաստանի պատմության» դասագրքերին է վերաբերում, չափորոշիչները էական փոփոխություններ են կրել, ուստի անհնար է հին դասագրքերով ուսումնասիրել առարկան»։

Հիշեցնենք, որ ԿԳՄՍ նախարար Ժաննա Անդրեասյանը մամուլի ասուլիսում հայտարարել էր, որ դասագրքի բացակայության պատճառով այդ առարկան կանցնեն թղթապանակով՝ այն անվանելով փորձարկում։

Հարցին, թե ի՞նչ թղթապանակով ու բովանդակությամբ են դպրոցներում այս առարկան անցնում՝ փորձագետը նկատեց, որ դա ոչ միայն աշակերտների, այլև ուսուցիչների համար եւս ընկալելի չէ, նրանք չգիտեն, թե ինչպես վարվել ու ինչ սովորեցնել երեխաներին։

«Ես հասկանում եմ, որ այդ թղթապանակները վերաբերում են չափորոշիչների բնութագրերին, որոնք առկա են, բայց դրանք այնքան համառոտ ու կարճ գրված բաներ են, որ չի կարելի համարել դասագիրք։ Ստացվում է, որ այդ և մյուս առարկաները, որոնց դասագրքերը չկան, երեխաները ուղղակի չեն սովերելու դպրոցում։ Սա տիրող համատարած անգրագիտության պայմաններում ևս մեկ հարված է մեր կրթությանը։

Հիմնականում չկան 10-րդ դասարանի դասագրքերը, իսկ այդ դասարանի երեխաները վաղը մյուս օրն ավարտելու են դպրոցը և փաստի առաջ են կանգնելու, քանի որ երբ ավարտեն դպրոցը և ուզենան դիմել բուհ՝ պարզվելու է, որ թեստերի մեջ կան հարցեր, որոնք իրենք պետք է ուսումնասիրած ամցած լինեին 10-րդ դասարանում»։

Անդրադառնալով երկրորդ դասարանից «Թվային գրագիտության» առարկայի դասավանդմանը՝ առանց դասագրքերի, որտեղ հանձնարարությունը տրվում է տեսանյութերի հիման վրա, ուստի նաև պարտադրվում է երկրորդ դասարանի երեխաներին ունենալ սմարթֆոններ՝ նա ընդգծեց, որ հիմնավոր ուսումնասիրություն չկա Հայաստանի դպրոցների և ընդհանրապես բնակավայրերի ինտերնետ հասանելության վերաբերյալ, բայց բոլորս էլ ծանոթներ ու ընկերներ ունենք և գիտենք, որ խնդիր է ոչ միայն ինտերնետի հասանելիությունը և որակը հատկապես սահմանամերձ ու բարձր լեռնային բնակավայրերում, այլև համապատասխան տեխնիկայի բացակայությունը, քանի որ շատ երեխաներ կամ նրանց ծնողները ունեն շատ հին հեռախոսներ, որոնցով չեն կարող համապատասխան նյութերը դիտել, չունեն կամ շատ հին համակարգիչներ ունեն, ընդ որում՝ դպրոցները նույնպես չունեն կամ ունեն հին տեխնիկա։ Փոխարենը դպրոցները ստանում են հեծանիվներ՝ որպեսզի երեխաները դասերը պարապելու փոխարեն հեծանիվ քշեն ու առաջիկայում մասնակցեն վարչապետի հետ հեծանվավազքին»։

Աղբյուր` Փաստինֆո