Փաստ ինֆո

Գերասիմ Վարդանյանի վերաբերյալ գործը քրեաքաղաքական է, հետևաբար, նաև որոշումները պետք է ակնկալենք, որ լինելու են քրեաքաղաքական՝ այն ճնշումների պարագայում, որոնք առկա են ՀՀ-ում՝ ԲԴԽ-ի, գործադիրի կողմից։ Տեսել ենք, որ ոչ իշխանահաճո որոշման համար դատավորի են կալանավորել, աշխատանքից ազատել։ Այս մասին «Փաստինֆո»-ի հետ զրույցում ասաց Վարդանյանի պաշտպան Սերգեյ Հարությունյանը։

Ինչպես արդեն տեղեկացրել ենք՝ երեկ Երևանի ընդհանուր իրավասության քրեական դատարանը մեկ ամսով երկարացրել է Գերասիմ Վարդանյանի կալանքի ժամկետը։

«Գերասիմ Վարդանյանի կալանքի ժամկետը երկարացնելու որևէ հիմք առկա չէ։ Նախորդ անգամ, երբ դատարանը մեկ ամսով էր երկարացրել կալանքի ժամկետը, դրանից հետո ոչ միայն որևէ էական, այլև՝ ողջամիտ հիմքեր չեն երկարացել՝ կալանքը երկարացնելու։ Հետաքրքրական է, որ երկու օր առաջ Վերաքննիչ դատարանը մերժել էր և՛ մեր բողոքը, և՛ դատախազության բողոքը՝ համարելով, որ նորմալ է, որ մեկ ամսով էր երկարացվել, ոչ թե՝ երկու ամսով, ինչը պետք է մեծ դեր խաղար առաջին ատյանի դատարանի համար, բայց ունենք այն, ինչ ունենք»,- նշեց փաստաբանը։

Կալանքի ժամկետը մեկ ամիս երկարացնելուց հետո ևս մեկ ամսով երկարացնելու  դատավորի որոշումը, ըստ փաստաբանի, տպավորություն է ստեղծում, որ երկու կողմերին բավարարելու մարտավարություն է, բայց փաստացի ստացվում է այն, որ մարդն արդեն երեք ամսից ավել անազատության մեջ է։

Ինչ վերաբերում է Վարդանյանի մասնակցությամբ իրականացված գործողություններին, ապա  փաստաբանը նշեց, որ ի սկզբանե գործը շինծու է, որևէ ողջամիտ և լուրջ հիմնավորում չկա, ինչ իրականացվում է քննչականի կողմից՝ իմիտացիոն բնույթի է, որևէ ողջամիտ ապացույց չկա, որը կհիմնավորի Վարդանյանին մեղսագրվող արարքի հիմնավորվածությունը։

«Գործ ունենք հերթական քաղաքական հետապնդման հետ, որով փորձում են վրեժխնդիր լինել Գերասիմից և ՀՅԴ-ից։ Գործը պահվում է, որ ցանկացած ժամանակ մարդկանց ձերբակալեն, կալանավորեն, ցանկության դեպքում ՝ ՀՅԴ ղեկավարությանը՝ լրատվականներին օգտագործելով հեղինակազրկելու փորձի համար։ Սա առաջին դեպքը չէ»,- նշեց Հարությունյանը։

Բացի այդ, փաստաբանը խնդրահարույց է գնահատում այն հանգամանքը, որ հերթական անգամ իրավապահ համակարգը հետամուտ չի լինում՝ պարզելու, թե որտեղից է հայտնվել տարածված ձայնագրությունը։

«Ունենք տխուր պրակտիկա, որ իշխանահաճո լրատվականում հայտնվում է ինչ-որ ձայնագրություն, որը հիմք են ընդունում իրավապահները, քրեական վարույթ նախաձեռնում, անձինք կալանավորվում են, որոշ ժամանակահատված մնում անազատության մեջ, հետագայում՝ արդարացվում, բայց փաստը մնում է այն, որ մարդիկ ամիսներով, եթե ոչ տարիներով ՝ մնում են անազատության մեջ»,- ասաց Հարությունյանը՝ նշելով, որ չկա դեպք, երբ այդ պայմաններում քննիչը պատասխանատվության ենթարկվի․ «Չունենք նմանատիպ դեպք, ունենք՝ խտրական արդարադատություն և ո՛չ քննիչը, ո՛չ դատախազը, ո՛չ բռնություն գործադրած ոստիկանը երբևէ այս ժամանակահատվածում չեն ենթարկվել պատասխանատվության, որովհետև եթե որևէ մեկը ենթարկվի պատասխանատվության, ապա իրավապահ համակարգը, որն ապօրինություններ է գործում, կերերա և ապօրինի հրաման ստանալուց առաջ յուրաքանչյուրը կմտածի՝ արդյոք անել դա, թե՝ ոչ, չէ՞ որ իր կոլեգաներից մեկը դա արել էր և քրեական պատասխանատվության ենթարկվել կամ գոնե պաշտոնից ազատվել»։

Նշենք, որ Գերասիմ Վարդանյանի և մի շարք դաշնակցականների նկատմամբ քրեական հետապնդումներ են իրականացվում՝ «Տավուշը հանուն հայրենիքի» շարժման մասնակցության համար իբրև քաղաքացիներին նյութապես շահագրգռելու մեղադրանքով, մինչդեռ, պաշտպանության կողմը պնդում է՝ հետապնդումներ իրականացվում են սահմանադրականության հետ խնդիր ունեցող հոդվածով, որը խնդրահարույց է՝ թե՛ իրավական որոշակիության, թե՛ համաչափության տեսակետից, թե հավաքների ազատության սահմանադրական ու կոնվենցիոնալ իրավունքների տեսանկյունից։

Ըստ այդմ, Խորհրդարանական ընդդիմությունն դիմում էր ներկայացրել ՍԴ՝ ՀՀ քրեական օրենսգրքի 236-րդ հոդվածի 2-րդ մասի՝ «նյութապես շահագրգռման» մասով` Սահմանադրությանը համապատասխանության հարցով։

«ՀՀ-ն փորձում է ավելի «ժողովրդավար» լինել, քան՝ իրական ժողովրդավարական երկրներն են, որովհետև նմանատիպ հոդված ո՛չ ԱՄՆ-ում կա, ո՛չ Ֆրանսիայում, ո՛չ եվրոպական զարգացամ այլ երկրներում։ Եվրոպական կառույցները տեսակետ էին հայտնել, որ հոդվածը պետք է ապաքրեականացվի, ինչի հիման վրա Խորհրդարանական ընդդիմությունը դիմել է ՍԴ, բայց վստահաբար կարող եմ ասել, որ ՍԴ-ն որևէ ընթացք, համենայն դեպս արագացված՝ չի տա, քանի որ այն չափազանց ձեռնտու է իշխանություններին, ցանկացած ժամանակ այդ հոդվածով կարող են յուրաքանչյուր ընդդիմադիրի քրեական պատասխանատվության փորձել ենթարկել, ազատությունից զրկել, իսկ նման մոնտաժված ձայնագրություններ միշտ էլ կարող են հայտնվել, երբ, օրինակ, մարդը ընտանիքի անդամների հետ զրույցում կարող է ասել՝ որքան գումար է պետք՝ երեխայի պարապմունքի համար, երեխայի հատվածը կհեռացնեն, կտեղադրեն միտինգ բառը, կկալանավորեն»,- նշեց փաստաբանը՝ հավելելով, որ ՍԴ-ում գործի քննությունը կձգձգվի, առաջիկայում այդ հոդվածը չափազանց ձեռնտու է իշխանություններին, ինչպես՝ ժամանակին վիրավորանքն էին քրեականացրել։
Սերգեյ Հարությունյանը, ամփոփելով զրույցը, նշեց, որ հերթական քաղաքական հետապնդումներն են, ինչը վստահաբար երկար է տևելու, շարունակվելու, քանի որ իշխանությունը միայն դրա վրա է հենվում՝ իշխանությունը պահելու համար։

Հիշեցնենք, որ Գերասիմ Վարդանյանի նկատմամբ քրեական հետապնդում է իրականացվում հանացանցում հայտնված, ապա՝ իշխանական ԶԼՄ-ներում հրապարակված ձայնագրության վերաբերյալ նախաձեռնված քրեական վարույթով։ Մասնավորապես, ըստ ՔԿ-ի՝ ձայնագրություններում իբրև խոսք է գնում հավաքներին մասնակցության համար անձանց նյութապես շահագրգռելու մասին։ Դեպքի առթիվ ՀՀ քննչական կոմիտեի Վայոց ձորի մարզային քննչական վարչությունում, ՀՀ քրեական օրենսգրքի 236-րդ հոդվածի 2-րդ մասի հատկանիշներով, նախաձեռնվել է 6 քրեական վարույթ։ ՀՅԴ Վայոց Ձորի մարզային գրասենյակում և մի շարք հասցեներում խուզարկություններ է իրականացվել։

Հեղինակ՝ Իզաբել Սահակյան

Աղբյուր` Փաստինֆո