Փաստ ինֆո

Հակոբ Օշականի անվան թիվ 172 հիմնական դպրոցի աշակերտները դասերը կշարունակեն հեռավար անցկացնել, քանի դեռ չկան իրականացվող փորձաքննությունների եզրակացությունները։ Այս մասին «Փաստինֆոյի» հետ զրույցում ասաց Երևանի քաղաքապետի մամլո խոսնակ Հայկ Կոստանյանը։

«Այս պահին մասնագիտացված կազմակերպության կողմից իրականացվում են ինժեներա- երկրաբանական փորձաքննություններ՝ տարածքի գրունտի կառուցվածքը, ինչպես նաև շինարարական աշխատանքների և դպրոցում զգացված ցնցումների միջև կապը պարզելու համար, իրականացվում է նաև շենքի սեյսմակայության ուսումնասիրություն»։

Հարցին, թե քննարկվում է դպրոցի շենքը քանդելու կամ վերակառուցելու հարց ՝ Կոստանյանն ասաց, որ այս պահին դեռ եզրակացություն չունեն և հնարավոր չէ ասել, թե շենքն ինչ կարգի վնաս է կրել կամ չի կրել սեպտեմբերի 6-ին տեղի ունեցածի արդյունքում։

Երեւանի քաղաքապետի խոսնակը հաստատեց, որ դպրոցի հարեւանությամբ 35 հարկանի շենք կառուցելու թույլտվություն այս պահին չկա։ «Փաստինֆո»-ի հարցին, թե արդյոք ընկերությունը քաղաքապետարանից թույլտվություն ստացե՞լ է 35 հարկանի շինարարության համար՝ Կոստանյանն ասաց, որ շինությունները «Ռենշին ընկերության սեփականությունն է, որը դիմել է քաղաքապետարանին՝ դրանք քանդելու թույլտվություն ստանալու համար։ «Այս պահին որևէ շենք կառուցելու թույլտվություն չունեն, իրականացվում են քանդման աշխատանքներ։ Ինչ վերաբերում է պայթյուններին՝ նման բան չի եղել, հստակ նախագծով ներկայացված է, թե ինչ աշխատանքներ են իրականացնելու»։

Նշենք, որ ընկերության պաշտոնական կայքում տեղադրված է Երևանի Բաղրամյան ֊ Օրբելի փողոցների խաչման հատվածում ՝ ընդհանուր 35,000 քմ տարածքի վրա իրականացվելիք շինարարական աշխատանքների նախագիծը, ըստ որի՝ կստեղծվի «քաղաք՝ քաղաքում» կոնցեպտով առաջին mixed-use բնակելի համալիրը։

«Փոսի» դպրոցի մոտ «ֆանտաստիկ» շինարարություն է. երեխաները դպրոց չեն գնում, Քաղաքապետարանն ասում է՝ շինարարությունն ի՞նչ կապ ունի

Աղբյուր` Փաստինֆո