Փաստ ինֆո

Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, արդեն երրորդ դատական նիստն է, ինչ ՍԴ նախկին նախագահ, ՍԴ դատավոր Հրայր Թովմասյանը ներկայացնում է իր պաշտպանական ճառը։ Այսօրվա նիստն ընթանում է բավականին լարված մթնոլորտում։ Հրայր Թովմասյանը , ներկայացնելով ճառը, հիշատակեց Փաշինյանի խոսնակի հայտարարությունն այն մասին, որ «եթե չհամաձայնվի, հրաժարական չտա, թող հետո չփոշմանի, որ քրեական գործեր կհարուցվեն իր վրա»։ Թովմասյանի դիտարկմամբ՝ խոսնակը խոսում է ոչ թե իր, այլ վարչապետի անունից։

«Որ ուրիշ ոչինչ չլիներ, սա բավարար է, որ հիմնավորվի սա քաղաքական հետապնդում է»։

Նա նկատեց, որ քաղաքական հետապնդման մասին են վկայում նաև իշխանության ներկայացուցիչ գործիչների կողմից քրգործի դետալների մասին խոսելը, երբ դեռ ինքն էլ մանրամասներ չգիտեր առաջադրված մեղադրանքի մասին, մամուլից է իմացել, որ ինքը հրավիրվելու է քննչական ծառայություն, մինչդեռ այս գործի քննությունը պետք է լիներ գաղտնի՝ չվարկաբեկելու Սահմանդրական դատարանի հեղինակությունը։

«Ինձ հրավիրել են քննչական, միտումնավոր սպասեցրել են ընդհանուր սպասասրահում, որպեսզի բոլորը կարոանան ինձ այնտեղ տեսնել։ Ես կրկնում եմ, որ իմ փոխարեն կարող էր լինել ցանկացած անձ, այստեղ կանգնած»,-նշեց նա։

Նախագահողը զգուշացրեց Թովմասյանին, որ կարող է սահմանափակել ճառի ժամանակահատվածը՝ նշելով, որ Թովմասյանը կրկնում է իր նախկինում արված հայտարարությունները․ «Շուրջ 30 րոպե Դուք կրկնում եք նախորդ երկու նիստերում Ձեր ճառում մեջբերված հանգամանքները։ Դատարանը պարզաբանում է, որ Ձեր իրավունքներից պետք է օգտվել բարեխղճորեն, դատարանը կարող է Ձեր վարքագիծը գնահատել որպես իրավունքի չարաշահում, եթե շարունակեք կրկնել նույն հանգամանքները կամ մեջբերել հանգամանքներ, որոնք քննության առարկա չեն»։ Նախագահողը հիշեցրեց իր՝ նախկինում հնչեցրած հայտարարությունը, որ 132 դատական նիստից 73-ը չեն կայացել պաշտպանության կողմի վարքագծով պայմանավորված, ինչից հետո այլ մարտավարություն մշակեց՝ պատշաճ մասնակցում են, բայց ճառի ներկայացման ներքո շարունակում են չարաշահել լիազորությունները։ Նախագահողը նշեց, որ տպավորություն է, որ դատական նիստերի ձգձգումն արդեն տեղի է ունենում այլ ենթատեքստով, պարբերաբար կրկնում են։ Թովմասյանին դատարանը թույլ չտվեց հայտարարությամբ հանդես գալ՝ նշելով, որ շարունակի ճառը ներկայացնել, իսկ Թովմասյանի պաշտպան Միհրան Պողոսյանն առարկեց նախագահողի գործողությունների դեմ՝ նշելով, որ դատավորը կանխակալ վերաբերմունք ունի։ Թովմասյանի և նախագահողի միջև վիճաբանություն առաջացավ, դատարանը թույլ չտվեց՝ հայտարարությամբ հանդես գալ, հորդորեց՝ ձայնը իջեցնել։ Թովմասյանն էլ հայտարարեց․ «Դուք Ձեր ձայնը իջեցրեք»։ Դատարանն էլ սանկցիա կիրառեց Թովմասյանի նկատմամբ՝ նկատողության տեսքով, զգուշացրեց՝ եթե դատարանին զուգահեռ շարունակի խոսել, ձայնը բարձրացնել, կկիրառվի սանկցիա, այդ թվում՝ նիստերի դահլիճից հեռանալու տեսքով։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո