Փաստ ինֆո

Հակոբ Օշականի անվան թիվ 172 հիմնական դպրոցում աշակերտները շարունակում են դասերը հեռավար անցկացնել այն բանից հետո, երբ դպրոցում անսպասելի ցնցումներ են զգացել։

Հարևան շենքերից մեկի բնակիչ Սայիդա Պողոսյանը «Փաստինֆո»-ին ասաց, որ միայն այսօր են «Սեյսմիկ պաշտպանության տարածքային ծառայություն» ՊՈԱԿ-ից եկել ուսումնասիրելու վիճակը, գնահատելու վտանգավորության աստիճանը։

«Բայց ամեն բան խիստ գաղտնի են պահում և ոչ մեկի ոչինչ չեն ասում։ Մեր կասկածները միանշանակ շինարարության հետ է կապված»,- նշեց բնակչուհին։

Նրա փոխանցմամբ՝ հարևան 4 շենքերի բնակիչները ստորագրահավաք են իրականացրել և պնդում են, որ կառուցվելիք շենքերը շատ բարձր են ու վտանգավոր։ «Բայց մինչև վերջ էլ ոչ մի տեղեկություն չունենք։ Այստեղ՝ փոքր տարածքի վրա նախատեսում են կառուցել 5 հատ 35 հարկանի շենք, թեև ասում են շինթույլտվությունը միայն նոյեմբերին կարող է լինել, սակայն շինարարությունն արդեն սկսված է»։

Հիշեցնենք, օրեր առաջ «Փաստինֆոն» հաղորդել էր, որ Հ. Օշականի անվան դպրոցի, հանրությանն առավել հայտնի «փոսի» դպրոցի աշակերտները դպրոց չեն գնում։ Ծնողներն ահազանգել էին, որ աշակերտները դասի չեն գնում՝ իրենց բնորոշմամբ՝ դպրոցի մոտակայքում ընթացող «ֆանտաստիկ, դարակազմիկ» շինարարության պատճառով, որը վտանգավոր է համարվում դպրոցի շենքի համար։ Երեւանի քաղաքապետարանից «Փաստինֆո»-ին հաստատել էին, որ դպրոցում այս պահին հեռավար ուսուցում է տեղի ունենում։

«Օրեր առաջ դպրոցի տնօրենը դպրոցում ինչ-որ ցնցում, շարժ է զգացել կոնստրուկցիաների։ Ինքը օրենքով սահմանված կարգով տեղյակ է պահել համապատասխան կառույցների, այդ թվում՝ փրկարար ծառայությանը։ Վերջիններիս կողմից ուսումնասիրություն է արվել ու որոշվել է անվտանգության նկատառումներով բոլոր դեպքերում պետք է ժամանակավորապես դադարեցնել ֆիզիկապես դասապրոցեսների անցկացումը և անցնել հեռավար դասավանդման»,- «Փաստինֆո»-ին հայտնել էին քաղաքապետարանից՝ նշելով, որ դպրոցը 1997 թ-ից 3-րդ աստիճանի վթարայնություն ունի, եւ քանի դեռ ուսուցումը հեռավար է արվում, դպրոցում պետք է երկրաբանական և այլ տեսակի ուսումնասիրություն անե՝ հասկանալու կոնստրուկցիաների շարժը։

Սայիդա Պողոսյանը, արձագանքելով քաղաքապետարանին, նկատեց, որ շենքը միայն 1959 թ.—ին է կառուցվել և հազիվ, թե այդ տարիներին կառուցած շենքերն այդքան վտանգավոր լինեին, եթե, իհարկե խորը ցնցումներ տարածքում չլինեին։ «Կարծում եմ՝ 2 շաբաթից իրավիճակն ավելի վատ կլինի, եթե այսօր չկասեցնեն շինարարությունը, ընդ որում, ոչ միայն դպրոցի հարցն է, այլև հարևանությամբ 4 շենքերի և արխիվի շենքի խնդիրն է»,- ընդգծեց մեր զրուցակիցը։

Աղբյուր` Փաստինֆո