Փաստ ինֆո

Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, այսօր շարունակվեց ՍԴ նախկին նախագահ, ՍԴ դատավոր Հրայր Թովմասյանի գործով վերջինիս պաշտպանական ճառի հրապարակումը, որը կրկին ընդմիջվեց, այս անգամ՝ աշխատանքային օրվա ավարտի կապակցությամբ։

Նշենք, որ Հրայր Թովմասյանն արդեն երկրորդ նիստն է, ինչ՝ պաշտպանական ճառով է հանդես գալիս՝ խոսելով քրեական գործի քաղաքական դրդապատճառների, ինչպես նաև՝ թույլ տրված խախտումների, ասել է թե՝ ապօրինությունների մասին, ինչը պետք է հանգեցնի գործի կարճման, միևնույն ժամանակ, Թովմասյանը նշում է՝ իրեն մեղսագրվող արարքը չի կատարել։

Այսօրվա նիստում Թովմասյանը հիշեցրեց, որ իշխող քաղաքական ուժի կողմից ՍԴ-ի վերաբերյալ քաղաքական քննադատություններն առավելապես սկսեցին հնչեցվել և անձնավորված մոտեցում ցուցաբերվել այն ժամանակ, երբ ՍԴ-ում կոնկրետ անձի կողմից դիմումներ են ներկայացվել և ընդունվել համապատասխան որոշումներ։

«2019-ի մայիսի 18-ին առաջին ատյանի դատարանի կողմից կայացվում է որոշում կոնկրետ անձի կալանքը որպես խափանման միջոց փոխելու և նրան ազատ արձակելու որոշում: Նույն թվականի մայիսի 19-ին վարչապետը դիմում է հանրությանը կոչով դատարանների, այդ թվում ՍԴ-ի մուտքերը և ելքերը արգելափակելու համար: Ակցիային միանում է 1100 մարդ, այդ թվում պատգամավորներ, պաշտոնյաներ, կուսակցականներ: Մայիսի 21-ին մամուլում հայտնվում է «Իմ քայլը» խմբակցության պատգամավորների փակ նիստից հետևյալ ձայնագրությունը. «Արտակ Զեյնալյանին էդքան ասեցինք՝ ցրեք ԲԴԽ-ն, ցրեք ՍԴ-ն, դա կարող եք անել անցումային արդարադատություն իրականացնելով: Արդարադատության նախարարն ասում է՝ նշանակված պաշտոնատար անձինք ունեն լեգիտիմ ակնկալիք»:

Մայիս-հունիսին հրաժարական են ներկայացնում ԲԴԽ 5 անդամներ: Մայիս-հունիսին կոնկրետ անձը դիմումներ է ներկայացնում ՍԴ, որոնք վարույթ են ընդունվում: Այդ անձը, ում կողմից ընդհանուր առմամբ ՍԴ է ներկայացվել 7 դիմում, որտեղ ինձ հետագայում մեղսագրվում է, որ ես ունեցել եմ առանձնահատուկ կողմնակալ դիրքորոշում այդ անձի նկատմամբ: Ես հատուկ չեմ տալիս այդ անձի անունը, որովհետև իր համաձայնությունը չունեմ, շփում էլ չունեմ»,- Ռոբերտ Քոչարյանի անունը տալուց զերծ մնալով ասաց Թովմասյանը, ապա նշեց, որ այդ 7 դիմումներից 5-ն ընդհանրապես վարույթ չի ընդունվել, դիմումներից մեկը բավարարվել է մասանբ և մեկով որոշում է ընդունվել այն ժամանակ, երբ ՍԴ-ի կազմը փոխված էր և ինքն այլևս ՍԴ նախագահ չէր։

Պաշտպանական ճառում Թովմասյանն իր դեմ հարուցված քրեական գործը համեմատեց «ապօրինի զավակի» հետ, որն, ի սկզբանե ապօրինի լինելով, ապագա ունենալ չէր կարող։ Հատկանշական է, որ այսօրվա դատական նիստի ընթացքում իրավիճակը հաճախ լարվում էր, դատական սանկցիա է կիրառվել սահմանադրագետ Վարդան Պողոսյանի, Սամվել Ֆարմանյանի նկատմամբ, բացի այդ, տպավորություն էր ստեղծվել, թե դատավորը ճառի ընթացքում կարող է՝ ննջել է, համենայն դեպս՝ գլուխը ցած էր, աչքերը՝ առերևույթ փակ, իսկ քնելու «փաստը» արձանագրել էր նաև Թովմասյանը։

Հաջորդ դատական նիստը սպասվում է վաղը՝ սեպտեմբերի 13-ին, ժամը 11։30-ին։ Դատական նիստի ավարտից հետո լրագրողների հետ զրույցում Թովմասյանն ասաց, որ այս ողջ քրեական գործը, անկախ հիմքերից, դրդապատճառներից, վստահեցնում է՝ առնվազն տասը մահացու հիվանդություն ունի։

«Դրանցից մեկի առկայությունը բավարարել է, որպեսզի այս քրեական գործը մահանա, կարճվի։ Բայց դեռ 4,5 տարի է դեռ արհեստական շնչառություն ենք տալիս, արյուն ենք տալիս, ամեն կերպ բրդում ենք՝ էս գործը բերել և հասցնել ինչ-որ հանգրվանի։ Ինձ համար այդ բոլոր մոտիվները պարզ են, բայց որ չլինի, որ ուղղակի հայտարարում էի, հիմա անցանք փաստերի դաշտ և ես մեկ առ մեկ կասեմ»,- ասաց Թովմասյանը։

Նշենք, որ մեղադրանքի կողմը միջնորդել է՝ մեղավոր ճանաչել Թովմասյանին և դատապարտել ազատազրկման՝ յոթ տարի ժամկետով։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո