Փաստ ինֆո

Ես ձեզ վստահեցնում եմ՝ եթե չլինեի ՍԴ նախագահ, այս գործը չէր հարուցվի։ Այս մասին հայտարարեց Հրայր Թովմասյանը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության քրեական դատարանը՝ դատավոր Տաթևիկ Գրիգորյանի նախագահությամբ, շարունակվում է ՍԴ նախկին նախագահ․ ՍԴ դատավոր Հրայր Թովմասյանի գործով դատավարությունը, որի ընթացքում Թովմասյանը շարունակեց ներկայացնել իր պաշտպանական ճառը։

Թովմասյանը նկատեց՝ տպավորություն չստեղծվի, թե մեղսագրվող արարքը կատարվել է, բայց պաշտպանվում են թույլ տրված խախտումներով։

«Ես հասկանում եմ, այնպես չէ, որ ամեն օր մեր դատախազությունը, դատարանները քննել են դատավորի հետ կապված ինչ-որ հանցակազմ։ Կա և փորձի պակաս, և գիտելիքի պակաս, ինչը զգացվում է՝ ամենասկզբից։ Այնպես չէ, որ ամեն օր ՍԴ նախագահ են դատում, միայն ՀՀ պատմության մեջ չէ, ամբողջ համաաշխարհային պատմության մեջ գործող ՍԴ նախագահ չեն դատում։ Ես այստեղ դիտավորություն եմ տեսնում, որովհետև պարզ բաներ կան, որոնք գլխավոր դատախազը չէր կարող չիմանալ: Ես, լինելով ՍԴ նախագահ, անդամ, պետք է օժտված լինեի լրացուցիչ երաշխիքներով՝ զերծ մնայի քրեական հետապնդումից, դատարանի առաջ կանգնելու ու պատասխանատվության ենթարկվելու»,- ասաց Թովմասյանը՝ նշելով, որ ստացվում է, որ այն մարմինները, որոնք պետք է իրեն օգնեին ու այն ինստիտուտը, որը կոչվում է անձեռնմխելիություն, այս երկուսը միասին են պատճառ դարձել, որ իր գլխին գործ հարուցվի:

Ըստ Թովմասյանի՝ եթե ինքը չլինեի ՍԴ-ում, իր դեմ քրեական գործ չէր հարուցվի: Բացի այդ, Թովմասյանը, անդրադառնալով սահմանադրական փոփոխություններին, որոնք իրեն պաշտոնից ազատելու համար էր արվել, թե ինքը ՍԴ անդամ էր, ուժի մեջ մտնելուց հետո՝ պետք է դառնար ՍԴ դատավոր։

«Լավ, դատախազությունը չէր հասկացել՝ ես ՍԴ անդամ եմ, թե դատավոր, կարո՞ղ էր չէ գալ հետո հրաժարվել, ասեր՝ սխալ եմ հասկացել, հասկացել եմ, որ նա ՍԴ դատավոր է, կիրառել եմ 2015թ սահմանադրական փոփոխությունները, որի ժամանակ ունի միայն ֆունկցիոնալ անձեռնմխելիություն, հիմա պարզվեց, ես էլ եմ ասել, որ ես այդ ժամանակ ՍԴ անդամ եմ եղել։ Ասում են՝ Հրայր Թովմասյանը Սահմանադրությունը կարեց իր հագով։ Այ ախպեր, դուք եք իմ վրա Սահմանադրություն գրել, որ ինձ ազատեք քրեական պատասխանատվությունից։ Ուրիշ բան էին ուզում անել, ուրիշ բան ստացվեց։ Այս գրել էին, որ ինձ գործից հանեին, բայց ասացին՝ դատախազություն, սխալ ես արել․ ձեր կողմից մեղադրանք առաջադրելու պահին Թովմասյանը եղել է ՍԴ անդամ, ՍԴ անդամն էլ օգտվել է 2005թ․ խմբագրության ՍԴ դատավորի երաշխիքներից։ Հիմա այս պայմաններում՝ ասեք, թե իմ դեպքում որն է կիրառելի»,- նշեց Թովասյանը՝ հավելելով, որ սահմանադրական փոփոխություններն արվել են իրեն հեռացնելու համար, դա իր օգտին չի եղել։

Հրայր Թովմասյանի խոսքով՝ խախտումները՝ մեկը չէ, երկուսը չէ, խեղդվողի համար ի՞նչ տարբերություն, թե գլխավերևում քանի մետր ջուր է։ Թովմասյանը նշում է՝ ինքը կարող է դիմանալ, կարող է պայքարել, շատերը չեն կարող, պետք է վերջ տալ այս անօրինականություններին։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո