Փաստ ինֆո

Այս ընդդիմության պայմաններում Ավինյանը միանշանակ կրկին կընտրվի։ «Փաստինֆոյի» հետ զրույցում նման կարծիք հայտնեց քաղտեխնոլոգ Կարեն Քոչարյանը՝ անդրադառնալով Երևանի քաղաքապետ Տիգրան Ավինյանի հայտարարությանը, թե պատրաստ է գնալ նոր ընտրությունների։

«Երեկ ընդդիմությունը խիստ կառուցողական էր տրամադրված, ուստի, այո, եթե այս ընդդիմությունը լինի՝ Ավինյանը կընտրվի»,- նշեց քաղտեխնոլոգը։

«GALLUP International Association»-ի Հայաստանում լիիրավ անդամ Էմ Փի ՋԻ ՍՊԸ տնօրեն Արամ Նավասարդյան էլ նշեց, որ եթե Ավինյանը կրկին գնա ընտրությունների, ապա 10 տոկոսից ավելի ձայն չի հավաքի։

«Մինչև անցած տարվա քարոզարշավն սկսելը մեր հարցումները ցույց են տվել, որ նրանք 9 տոկոս ձայն ունեն, քարոզարշավի ընթացքում որոշակի աճեց, բայց ընտրություններին արձանագրված արդյունը ցույց է տվել, որ ՔՊ-ն Երևանում ունի 9-10 տոկոս։ Եթե Ավինյանը վստահ է, որ խնդիր չունի նոր ընտրությունների հետ կապված, ապա պետք է հորդորել, որ գնան նոր ընտրությունների, գուցե գնան ու 11 տոկոս հավաքե՞ն, բայց այն, որ իրենք խոսում են նոր ընտրությունների պատրաստակամության մասին, դա խոսում է իրենց ներքին վախերի մասին։ Կարծում եմ, իրենք իրենց հարցումներն ունեն ու գիտեն, թե ինչ խայտառակ ռեյտինգներ ունեն»,- ասաց Ա. Նավասարդյանը։

Ըստ նրա՝ այստեղ մեկ այլ խնդիր էլ կա, եթե մենք խոսում ենք իշխող ուժի վարկանիշի մասին, ապա պետք է ուշադրություն դարձնենք, որ ընդդիմադիր դաշտում ավելի վատ ցուցանիշներ ունեն։ «Այստեղ կարևոր է հասկանալ, թե որ քաղաքական ուժերն են պատրաստ գնալ ընտրությունների։ Ամեն դեպքում՝ կարծում եմ, իշխող ուժն առավել պատրաստ է գնալ նոր ընտրությունների, քան հիմնական տիտղոսակիր ընդդիմությունը, որ այսօր կա»։

Նա նշեց որ ընդդիմությունից դժգոհությունը կապված է նրա պասիվությամբ։ «Ես հիշում եմ, որ երբ մեր վերջին հարցումներով Փաշինյանի ռեյտինգը 1.6 տոկոսով աճել էր, շատերի համար դա զարմանալի էր։ Բայց հարցն այն է, որ կա աշխատանք և կա պասիվություն։ Նիկոլ Փաշինյանին սիրենք, թե չսիրենք, բայց նա որոշակի աշխատանք անում է՝ սկսած հեծանիվից, մինչև գյուղերում հանդիպումներ, նա որոշակի նախընտրական քարոզարշավ է իրականացնում, այսինքն, որոշակի գործողություն անում է։ Մինչդեռ նայենք, թե ինչ է անում ընդդիմությունը՝ ընդ մերթ հարցազրույցներ, քննարկումներն ու հանդիպումներն են ունենում էին, ես չեմ բացառում, որ այս ամենի ֆոնին նրանք, որոշակի ակտիվություն ունենան, բայց դա ամեն դեպքում կրիտիկական չէ»,- նշեց Ա. Նավասարդյանն ու ընդգծեց՝ «ՔՊ-ի ռեյտինգը բավական ցածր է, այստեղ պետք է շեշտել, որ ավանդաբար իշխող ուժ լինելը 5-6 տոկոսով ավելացնում է նրանց ռեյտինգը, քանի որ կան պետական ծառայողներ, ոստիկանություն, բանակ, այսինքն, եթե չունենան այդ լծակները ապա կունենան 5-6 տոկոս միայն»։

Նա նաև ընդգծեց, որ վերջին հարցումները, որ մեկ տարվա պաշտոնավարման արդյունքները գնահատելուն են միտված եղել՝ հարցվածների 51 տոկոսը նշել է, որ Ավինյանը պետք է հրաժարական տա։

Աղբյուր` Փաստինֆո