Փաստ ինֆո

Այն սահմանված նշաձողը, որ դուք նշել եք, այսօր շատ ցածր մակարդակի վրա է, որովհետև այն օրերին երբ լրանում է Ադրբեջանի կողմից Արցախի ժողովրդի բռնբագաղթեցման մեկ տարին՝ երկրի կառավարումն իրականացրել եք աշխարհաքաղաքական զարգացումների, տարածաշրջանային զարգացումների պայմաններում ռազմաքաղաքական ոչ համարժեք գնահատականներով և գերակայությունների սխալ որոշմամբ, ինչի արդյունքում Հայաստանը և Արցախը ներքաշվեցին պատերազմի մեջ, պարտադրվեց պարտություն, այժմ էլ Արցախը ամբողջությամբ հայաթափված է։ Այս մասին ԱԺ-ում հարցուպատասխանի ժամանակասաց «Հայաստան» խմբակցության ղեկավար Սեյրան Օհանյանը:

«Որքան էլ դուք ու ջեր կողմնակիցները փորձեք արդարացնել տարբեր բառախաղերով ու մեղքը բարդել նախկինների, ընդդիմադիրների ու արցախցիների վրա՝ իրականությունն այն է, որ պետական բոլոր լծակները այսօր ձեր ձեռքերում են, բոլոր ռեսուրսները ձերն են՝ արդեն 6 տարի։ Հարցս այն է, թե ի՞նչ հիմնարար փաստաթղթերով են ամրագրվում ՀՀ առաջնահերթությունները, ինչ գործողություններ են իրականացվում մեր երկրի համար կարեւոր ռազմավարական փաստաթղթերը մշակելու և իրագործելու ուղղությամբ: Հատկապես անվտանգության ոլորտում»,-ասաց Օհանյանը:

Ի պատասխան Նիկոլ Փաշինյանն անդրադարձավ մեղքն ուրիշների վրա բարդելուն՝ ընդգծելով, որ այդ խոսույթի նպատակը ամենևին էլ մեղքը որևէ մեկի վրա բարդելը չի: «Դրա առանցքային նպատակն է լուծել բոլորովին ուրիշ շատ կարևոր մի հարց՝ հասկանալ, թե ինչ է տեղի ունեցել, ինչու է տեղի ունեցել, որն է դրա պատճառը, և որքանով մենք կարող էինք ազդել, ինչ գործիքներով, ինչ պարագայում և ինչ կարող ենք ստանալ դրա արդյունքում: Ի վերջո, մենք պե՞տք է հասկանանք, թե որտեղ է ճշմարտությունը, որտեղ այնքան էլ ճշմարտություն չէ:
Ինչ վերաբերում է ռազմավարական փաստաթղթերին, այդ ռազմավարական որոշումները կայացվում են ԱԽ-ում, այլ տեղերում: Բայց ես կուզեի ընդգծել փոփոխվող աշխարհում մեր քաղաքականությունների ճշգրտման տեղն ու հարթակը: Հանգամանքների բերումով ստացվել է այնպես, որ այդ տեղը դարձել է ՀՀ ԱԺ-ն, և իմ գնահատմամբ, ձեր նշած խնդիրները արտահայտվում են կառավարության ծրագրի կատարման ընթացքի վերաբերյալ տարեկան զեկույցում, որի շուրջ 2022-2024 թ-ին ճշգչտումների են ենթարկվել»:

Սեյրան Օհանյանը նկատեց, որ շատ կարևւոր է փոփոխվող աշխարհում ճիշտ որոշումներ ընդունելը, ճիշտ ռազմավարական փաստաթղթեր ձևավորելը. «Կառավարության ծրագրում նշված են դրույթներ անվտանգության և Արցախի վերաբերյալ, որոնք չեն իրականացվել և չեն իրականացվում: Ոտքի վրա և ձեռի հետ չի ղեկավարվում երկիրը: Երկիրը ղեկավարվում է ինստիտուցիոնալ, ինստիտուտներ կան, որոնք պիտի մշակեն փաստաթուղթ։ Այդ փաստաթուղթը չի համապատասխանում իրականությանը»,-ասաց Օհանյանը։

Նիկոլ Փաշինյանն ասաց. «Մենք սկզբից թուղթ ենք ստեղծում, հետո բովանդակություն: Դրա համար միշտ թղթերը հաճախ չեն համապատասխանում: Դուք նշեցիք Անվտանգության խորհուրդը, այդտեղ տեղի են ունենում շատ լուրջ ռազմավարական հարցերի քննարկումներ, ռազմավարական որոշումներ, որոնք արձանագրվում են: Կան ինստիտուտներ, որոնք այդ ուղղությամբ աշխատում են: Մենք աշխատում ենք ազգային անվտանգության ռազմավարության վրա, բայց կներեք, այդ ռազմավարության բովանդակությունը պետք է ձևավորվի և նոր ինստիտուտների միջին օղակի աշխատողները այնպետք է դնեն թղթի վրա, ոչ թե հակառակը: Հիմա դա տեղի է ունենում շատ ինտենսիվ և ոչ հրապարակային»:

Աղբյուր` Փաստինֆո