Փաստ ինֆո

Այս դատավարությունը Հրայր Թովմասյանի մասին չէ։Այս դատավարության սկիզբը, ընթացքը, ավարտը շատ ավելի խորքային է և այս դատավարության ավարտից հետո էլ դրա հետևանքները շատ ավելի են խորանալու։ Այս մասին դատարանում հայտարարեց ՍԴ նախկին նախագահ Հրայր Թովմասյանը՝ ներկայացնելով իր պաշտպանական ճառը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, այսօրվա նիստում պաշտպանական ճառով է հանդես գալիս ՍԴ նախկին նախագահ Հրայր Թովմասյանը։

Նա նշեց, որ իր պաշտպանների ճառի ժամանակ դատարանն անհաղորդ էր, հաղորդակից էր դառնում միայն այն ժամանակ, երբ խոսքը վերաբերում էր դատարանին, իսկ մեղադրանքի կողմի մասին չի էլ ասում, մեղադրանքի կողմն ի սկզբանե դատարան էր եկել մի նպատակով՝ կանխորոշված, որ այն փաստերը, ինչ կա Թովմասյանի օգտին, հիմնավորում են անմեղությունը, հերքում՝ մեղսագրվող փաստերը՝ դրանք սուտ են, գոյություն ունենալ չեն կարող, ճիշտ են միայն այն փաստերը, որոնք ուղղված են՝ ապացուցելու մեղավորությունը։ Թովմասյանի խոսքով՝ արդար կլիներ, եթե ինքը մեղավոր լիներ և դատվեր, բայց այս դատավարությունը, որը ֆորմալ առումով, իր շուրջ է, իր մասին չէ, իսկ դատավարության բացասական հետևանքները չարորակ գոյացության պես մետաստազներ են տվել հանրային բոլոր ոլորտներում։
«Այս դատավարության վերաբերյալ իմ կանխատեսումները՝ վատ կանխատեսումները, իրականություն են դարձել, արդեն վախենում եմ կանխատեսումներ անել։ Ես կանխատեսումներն անում եմ ոչ թե այն պատճառով, որ գերբնական ունակություններ ունեմ, այլ՝ այն պարզ պատճառով, որ մի քիչ միջազգային փորձ գիտեմ, հասկանում եմ երևույթների պատճառահետևանքային կապը»,- նշեց նա։

Թովմասյանի խոսքով՝ եթե չիմանար դատավարության պատճառը, ակնկալիքը, ապա այն կլիներ դեժավյու։
«Չգիտեմ, թե ինչու եմ դատվում։ Ինչը արել եմ՝ ՔՕ-ում չկա, ինչը ինձ մեղագրվում է՝ չեմ արել, ինչում մեղադրում են՝ հանցագործություն չէ»,- հայտարարեց նա՝ նշելով, որ ինքը չէ այս ֆիլմի հերոսը, իր փոխարեն ՍԴ այլ նախագահ լիներ, նա կլիներ այս իրավիճակում։ Թովմասյանը նշեց, որ եթե հարցն իր անձը լիներ, ինքն անմիջապես հրաժարական կտար, բայց խնդիրն իր անձը չէր, ուստի, պատախսանատու էր երեխաների, ընտանիքի, երկրի վաղվա օրվա համար։

«Էսպես ասեմ՝ սա շախմատային խաղ է, և իմ դիրքը վատ է, որովհետև ես ո՞վ եմ, ամենաթույլ կողմն եմ, ամբաստանյալն եմ, բայց կարևոր չէ, թե դու ինչ դիրքում ես, կարևոր է, թե ինչ ֆիգուր ես։ Ես Հրայր Թովմասյանն եմ՝ պարզ, հասարակ, սովորական մի իրավաբան։ Ես էստեղ եմ շատ պարզ պատճառով․ ինձ առաջարկվել է արժանապտվությունս նվաստացնող գործարք, ինձ առաջարկվել է արդարադատության վրայով անցնելու գործարք, ինձ առաջարկվել է մեղսակից դառնալ մեր երկիրը լատինաամերիկյան, ասիական, աֆրիկյան շատ երկրների ճանապարհով տանելու մասնակից դառնալ։ Ինձ առաջարկվել է մասնակից դառնալ մի վառ ավանդույթի ներդրման՝ կամ ամեն իշխանությունից հետո դատական իշխանությունը հավատարմության երդում է տալու քաղաքական իշխանույթուններին, կամ ամբողջությամբ փոխվելու է, պատասխանը եղել է մեկը՝ արժանապատվության ու արդարության հետ գործարքներ չեն կատարվում, խղճի հետ գործարքներ չեն կատարվում»,- հայտարարեց նա։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։

Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո