Փաստ ինֆո

Օրեր առաջ «Փաստինֆոն» անդրադարձել էր ստացած ահազանգին, ըստ որի՝ «Հայէկոնոմբանկի» մասնաճյուղերում գործարք իրականացնելիս հաճախորդին հարցեր են ուղղվել քաղաքական գործունեության վերաբերյալ։

Քաղաքացին պատմել էր, որ իր ընկերության հաշվից գումարի կանխիկացման ընթացքում բանկի աշխատակիցը սկսել էր հարցեր տալ, թե արդյոք ինքը կամ իր ընտանիքի անդամներից որևէ մեկը քաղաքական գործունեություն իրականացնում է, թե՝ ոչ։ նա նաև հայտնել էր, որ խոսքը բավական համեստ գումարի մասին էր և որ ինքը առաջին անգամ է ականատես լինում նման իրավիճակի։

Մենք պարզաբանում էինք խնդրել «Հայէկոնոմբանկից», որը տեղ էր գտել մեր հոդվածում, բայց բանկից կարծում են, որ լրացուցիչ պարզաբանման կարիք կա։

Մեզ հետ կապ հաստատեց բանկի միջազգային և զարգացման գծով գործադիր տնօրենի տեղակալ Աստղիկ Մանրիկյանը, ով ընդգծեց, որ ոչ թե քաղաքական գործունեության, քաղաքական հայացքների մասին է խոսքը, այլ քաղաքական ազդեցության։

«Ոչ միայն մեր, այլև միջազգային նորմերով, որոնց հետևում են բոլոր բանկերը, որոնք պատշաճ կերպով իրականացնում են փողերի լվացման և ահաբեկչության դեմ պայքարի գործունեություն, հետևում են պարտադիր ընդունված օրենսդրական պահանջին, ըստ որի՝ հաճախորդի հետ գործարք կատարելու և գործարար հարաբերություն ստեղծելու ժամանակ տալիս ենք հարցաթերթիկ, որոնց մեջ ներառված է նաև հարց, թե արդյոք անձը քաղաքական ազդեցություն ունեցող է կամ, որևէ կապվածություն ունի նման ազդեցություն կրող անձի հետ։ Ըստ այդմ՝ պահանջվում է հաճախորդի պատշաճ ուսումնասիրություն։

Այսինքն, ոչ թե քաղաքական հայացքների մասին է խոսքը, այլև քաղաքական ազդեցություն ունեցող մարդկանց։ Սա հետագայում բանկին թույլ է տալիս գրադացիա իրականացնել և հաճախորդների պատշաճ ուսումնասիրություն կատարել։ Այստեղ տարօրինակ ոչինչ չկա, ընունված իրավական նորմ է, որին տարիներ շարունակ հետևում են, ոչ միայն հայաստանյան բանկերը, այլև միջազգային բոլոր այն բանկերը, որոնք պատշաճ իրականացնում են փողերի լվացման և ահաբեկչության դեմ պայքարի գործառույթները»։

Մանրիկյանը պարզաբանեց, որ քաղաքական ազդեցություն ունեցող անձ կարող է լինել օրինակ քաղաքապետը, դատախազը, նախարարները, նրանք, ովքեր քաղաքական ազդեցություն ունեն տվյալ պետությունում։

«Անգամ ցանկ ունենք, թե ովքեր են այդ քաղաքական ազդեցություն ունեցող անձինք։ Բանկը պարտավոր է պատշաճ ուսումնասիրություն իրականացնի տվյալ անձանց գործարքների հետ կապված, ավելի ուշադիր լինի, քան օրինակ թոշակառուների նկատմամբ է։ Եթե օրինակ տվյալ անձը քաղաքական ազդեցություն կրող անձ է, ուրեմն պետք է իր գործարքների պատշաճ ուսումնասիրություն իրականացվի, որովհետև տվյալ անձը քաղաքականապես պատասխանատու անձ է, այսինքն, բացարձակապես քաղաքական հայացքների մասին չի խոսքը»։

Հարցին, թե արդյոք ընդդիմադիր գործիչները, նախկին նախագահները կամ նախկին պաշտոնյաները ըստ ընդունված ցանկի համարվո՞ւմ են քաղաքական ազդեցություն ունեցող անձինք, նա պատասխանեց, որ եթե ընդդիմադիր գործիչները Ազգային Ժողովի պատգամավորներ են, ապա այո, նրանք քաղաքական ազդեցություն ունեցող անձինք են, նախկին նախագահները և նրանց հարազատները նույնպես քաղաքական ազդեցություն ունեցող անձինք են։

Աղբյուր` Փաստինֆո