Փաստ ինֆո

Իրական բանակցությունները վաղուց են մտել փակուղի։ Այս մասին «Փաստինֆոյի» հետ զրույցում ասաց քաղաքական մեկնաբան Արմեն Բաղդասարյանն՝ անդրադառնալով Նիկոլ Փաշինյանի այսօրվա հայտարարությանը, թե վերահաստատում է իր պատրաստակամությունը ստորագրել խաղաղության պայմանագրի համաձայնեցրած կետերը, այն բանից հետո, երբ երեկ Ադրբեջանը մերժել էր Փաշինյանի այդ առաջարկը։

«Այստեղ խնդիրը բոլորովին այլ է, խնդիրը առաջիկայում ստորագրվելիք փաստաթղթի անվանումն է։ Եթե հիշում եք Ադրբեջանի նախագահը մոտ 2-3 ամիս առաջ հայտարարեց, որ Ադրբեջանը պատրաստ է նախաստորագրել ինչ-որ փաստաթուղթ։ Խոսքը, ոչ թե ստորագրելու, այլ նախաստորագրելու մասին էր։

Այսինքն, դա պիտի ընդամենը մի փաստաթուղթ լիներ, որը պիտի արձանագրի այն շրջանակը, որի հիման վրա հետագայում, պիտի ստորագրվեր խաղաղության պայմանագիրը»։

Բաղդասարյանն ընդգծեց, որ Ադրբեջանի համար շատ կարևոր է մինչև COP 29-ը ինչ-որ բան ստորագրել, ՀՀ իշխանությունները փորձում են այդ ինչ-որ բանը դնել սեղանին և դրա անունը դնել «Խաղաղության համաձայնագիր»։

«Ադրբեջանը դեմ է ոչ թե գաղափարին, այլ նրան, որ դա չկոչվի Խաղաղության համաձայնագիր, այլ ընդամենը նախաստորագրվի։ Հակասությունն այստեղ է։ Եթե անգամ ինչ -որ բան ստորագրվի կամ չստորագրվի՝ դա կարևոր չէ, կարևորն այն է, որ այդ թուղթը լինի Խաղաղության։

Արդյո՞ք մենք կարող ենք հասնել խաղաղության, ոչ, չենք կարող, որովհետև Ադրբեջանին պետք չի խաղաղություն, Ադրբեջանին պետք է խաղաղության իմիտացիա։ Հայաստանը փորձում է ինչ-որ կերպ օգտվելով նրանից, որ Ադրբեջանը պարտադրված է մինչև նոյեմբեր շատ «քաղաքակիրթ» ու «խաղաղասեր» լինել ու ինչ-որ բան առաջ մղել։ Ես չեմ կարծում, որ դա կհաջողվի»։

Աղբյուր` Փաստինֆո