Փաստ ինֆո

Հայաստանում սեպտեմբերի 11-13-ը կկազմակերպվի Միացյալ Ազգերի Կազմակերպության Զբոսաշրջության Գինու զբոսաշրջության 8-րդ համաշխարհային համաժողովը։

Համաժողովը Հայաստանում անցկացնելու որոշումը կայացվել է 2023 թվականի նոյեմբերի 24-ին Իսպանիայի Լա Ռիոխա քաղաքում կայացած ՄԱԿ Զբոսաշրջության Գինու զբոսաշրջության 7-րդ համաշխարհային համաժողովի ընթացքում։ Համաժողովը Հայաստանում հյուրընկալելու հայտը Կազմակերպություն է ներկայացվել դեռևս 2022 թվականին։

Համաձայն Կազմակերպության ընթացակարգի՝ Համաժողովը Հայաստանում կազմակերպելու համար անհրաժեշտ է ՀՀ կառավարության և Կազմակերպության միջև մոդելային համաձայնագրի կնքում։ Համաձայնագրով սահմանված են պարտավորություններ, որոնք վերաբերում են նաև ՀՀ արտաքին գործերի, ՀՀ առողջապահության, ՀՀ կրթության, գիտության, մշակույթի և սպորտի, ՀՀ տարածքային կառավարման և ենթակառուցվածքների նախարարությունների, ՀՀ ներքին գործերի նախարարության, ՀՀ քաղաքացիական ավիացիայի կոմիտեի և այլ շահագրգիռ կողմերի իրավասություններին: Այդ նպատակով ՀՀ վարչապետի հանձնարարականով ձևավորվել է վերոնշյալ գերատեսչությունների ներկայացուցիչներից բաղկացած աշխատանքային խումբ։

Համաժողովին նախատեսվում է ՄԱԿ Զբոսաշրջության գլխավոր քարտուղարի և մոտ 10 ներկայացուցիչների, Կազմակերպության անդամ պետությունների զբոսաշրջության ոլորտի լիազոր մարմինների ղեկավարների և ներկայացուցիչների, գինու զբոսաշրջության ոլորտի մասնագետների, դոնոր կազմակերպությունների, միջազգային և տեղական խոսնակների ու բանախոսների, միջազգային և տեղական մամուլի ներկայացուցիչների և ինֆլուենսերների, պետական, մասնավոր և այլ շահագրգիռ կողմերի մասնակցություն:

Ակնկալվում է, որ համաժոովը Հայաստանում կազմակերպումն էապես կնպաստի Հայաստանի՝ որպես գինու հնագույն օրրանի ճանաչելիության բարձրացմանն ու միջազգային հարթակում որպես գինու զբոսաշրջության ուղղություն դիրքավորմանը, Հայաստանի ներուժը ոլորտի գիտակներին ներկայացնելուն, ոլորտում տեղեկատվության և փորձի փոխանակմանը, առկա մարտահրավերներին, նոր զարգացումներին և միտումներին ծանոթանալուն, Հայաստանի՝ միջազգային մեդիայի ուշադրության կենտրոնում հայտնվելուն՝ լրատվամիջոցներին, ինֆլուենսերներին, այցելուներին և տեղացիներին հաղորդակցության և խթանման գործընթացում որպես «դեսպան» ներգրավելու միջոցով։

Այն կնպաստի նաև ՄԱԿ Զբոսաշրջության անդամ պետությունների հետ գինու զբոսաշրջության ոլորտում համագործակցության զարգացմանն ուղղված առկա ծրագրերի, ինչպես նաև համագործակցության նոր հնարավորությունների քննարկմանը, ՄԱԿ Զբոսաշրջության հետ համագործակցության ընդլայնմանը, մասնավորապես՝ առաջիկա տարիներին կազմակերպության գործունեությանը մասնակցության ապահովմանը՝ որպես ՄԱԿ Զբոսաշրջության գործադիր խորհրդի անդամ, ինչպես նաև Կազմակերպության կողմից իրականացվող ծրագրերին և նախաձեռնություններին ակտիվ մասնակցությանը, կազմակերպության հետ համատեղ նոր միջոցառումների կազմակերպմանը։

Աղբյուր` Փաստինֆո