Փաստ ինֆո

Գյումրու դրամատիկական թատրոնի ճեմասրահից' Գյումրու քաղաքապետարան տեղափոխվող Հակոբ Հակոբյանի «Սարերում» որմնանկարը բաժանվել է մասերի։ «Գյումրու քանդակագործության ազգային պարկ» թանգարանի ղեկավար Արթուր Գրիգորյանը «Փաստինֆոյի» հետ զրույցում պատմեց, որ դեռ 2009 թ-ին Գյումրիից 4 որմնանկար տեղափոխել էին Երևան։ Բարձրացված աղմուկից հետո որոշում կայացվեց Հակոբ Հակոբյանի «Սարերում» որմնանկարը թողնել Գյումրու դրամատիկական թատրոնի շենքում, քանի որ դրա չափսերը 4.60-ը 12.40-ի վրա էր՝ նման դուռ կամ պատուհան չկար, որով հնարավոր լիներ որմնանկարը ներս մտցնել ու վերականգնել։

«Երբ Հուշարձանների պահպանության գործակալությունը ստացավ համապատասխան մասնագիտական առաջարկ՝ որմանանկարը տեղադրել Գյումրիի քաղաքապետարանում, ամեն դեպքում՝ որմնանկարը ամբողջական հանելը թատրոնից հնարավոր չէր։

Անցած անգամ որմնանկարի վերականգնման համար Ամերիկյան կողմը տրամադրել է 88 000 դոլար, որը ներառում է տեղափոխումը, ամրացումը հատուկ պլանշետի վրա, որն ահռելի միջոցներ է պահանջում, դա Գյումրիի բյուջեի 2-3 տոկոսն է, միաժամանակ ՀՀ կառավարությունը ևս պետք է տրամադրի որոշակի գումար, քանի որ եթե օտարերկրյա կազմակերպությունը մշակութային նպատակներով գումար է տրամադրում՝՝ կառավարությունն էլ ըստ պահանջի նույնպես գումար է տրամադրում որմնանկարի տեղափոխման ու վերականգնման համար։ Այսինքն այս գործընթացը կազմակերպելու համար հսկայական միջոցներ են հատկացվել՝ այն պատշաճ անելու համար, մինչդեռ այսօր տուն գնալիս տեսնում եմ, որ որմնանկարը 5 մասի է բաժանված, խոսվում էր այն ևս մեկ՝ հորիզոնական կտրվածք անելու համար։ Ես ասել եմ, որ եթե նման բան արվի՝ դիմելու եմ դատարան»։

Նա նաև նշեց, որ զանգել է Երևան՝ «Հուշարձանների պահպանության կոմիտեի» տնօրենին, սակայն նա հեռախոսն անջատում է ու որևէ համագործակցության չի գնում։

«Վերականգնումը չի ենթադրում պատից իջեցում, գետնին պառկեցում, 2 հոգին չեն կարող այդ գործընթացն իրականացնել։ Ես տեսել եմ 4.5 մետրանոց որմնակնարը ճկված, մասնատված, բնականաբար, դրա վրայի ներկերը թափվելու են, ոչնչանալու են, եթե որևէ մեկին թվում է, որ մասնատումը ավելացնելու է որմնանկարի որակը, ապա սխալվում է, մասնատումը ենթադրում է 2-րդ անգամ վերականգնում, թե դրանից հետո Հակոբ Հակոբյանից ինչ կմնա՝ դժվար է ասել»։

Նա նաեւ նշեց, որ հարց է՝ եթե տեղափոխման և վերականգնման նախագիծ են ներկայացրել, ապա գիտատեխնիկական խորհուրդը հաստատե՞լ է այն, թե ոչ։

«Ահռելի գումար է ներդրվել որմնանկարի վերականգնման համար, բայց այդ գումարը չեն տվել, որ այն մասնատեն, բաժանեն մասերի, տանեն՝ կպցնեն, վնասվածքների վրայով վրձինով անցնեն։ Որմնանկարի վերականգնումը ենթադրում է հատուկ մեթոդաբանություն, հատուկ գործիքակազմ ու մասնագետների ներգրավվածություն, 2-3 հոգով որմանկար չեն տեղափոխում կամ վերականգնում»,- ասաց մեր զրուցակիցը։

Աղբյուր` Փաստինֆո