Փաստ ինֆո

Հրապարակված կանոնակարգի առաջնային խոցելիությունն այն է, որ սա Ադրբեջանի ապահովագրությունն է այն դեպքի համար, երբ Հայաստանում իշխանության գան հայրենասերները։ Այս մասին «Փաստինֆո»-ի հետ զրույցում ասաց «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով սեպտեմբերի 2-ին հրապարակված Հայաստանի և Ադրբեջանի սահմանազատման և սահմանագծման հանձնաժողովների կանոնակարգին։

Այն վավերացնելու մասին Հայաստանի Հանրապետության օրենքի նախագծի հարցը ներառված է կառավարության սեպտեմբերի նիստի օրակարգում։

Հ. Մամիջանյանի արձանագրմամբ՝ կանոնակարգի հետ կապված բազմաթիվ հարցեր կան, որոնցից մեկն էլ այն է, թե ինչու հիմա ներկայացվեց այն, եթե ավելի վաղ ժամկետ էր նշվում հուլիսի 1-ը։

«Կարծում եմ, ամենագլխավոր վտանգավորությունը կայանում է նրանում, որ կանոնակարգի ընդունումից և վավերացումից հետո այն հիմնարար փաստաթուղթ է լինելու, որը կապելու է հաջորդ իշխանությունների ձեռքերը՝ որևէ այլ բանակցային ֆորմատի անցնելու։ Այսինքն, հետագայում նույնիսկ, եթե ՀՀ իշխանությունները հետ կանգնեն Ալմա-Աթայի փաստաթղթից՝ որպես բանակցային փաստաթղթի, ապա դա այնքան էլ էական չի լինի, քանի որ կանոնակարգում նշված է, որ ցանկացած սկզբունք կամ փաստաթուղթ, որն ընդունվում է 2 կողմերի կողմից՝ դառնալու է հիմնարար և ցանկացած այլ փաստաթուղթ, որն առկա է երկկողմ իրավական հարաբերություններում՝ դառնալու է զրոյական։ Օրինակ, եթե առաջարկվի հիմք ընդունել որևէ քարտեզ՝ իր իրավական հիմնավորմամբ և պահանջ դրվի դրանով որևէ հատվածի դելիմիտացիա իրականացնել, ապա դա կդառնա անհնարին։ Առաջին հերթին, այս փաստաթուղթը Ադրբեջանի ապահովագրությունն է ապագայի նկատմամբ, երբ Հայաստանում լինեն հայրենասիր իշխանություններ և փորձեն շտկել իրավիճակը»,- արձանագրեց Մամիջանյանը։

Նա նաև ընդգծեց, որ համաշխարհային ամենահիմնարար փաստաթուղթը դեմարկացիայի և դելիմիտացիայի հետ կապված՝ ԵԱՀԿ-ի ընդունած ուղեցույցն է, որտեղ ամենագլխավոր սկզբունքն այն է, որ դեմարկացիա-դելիմիտացիան չի կարող իրականացվել ուժի կիրառմամբ կամ ուժի սպառնալիքով։

«Երբ ՀՀ տարածքում առնվազն մի քանի հատվածներում ադրբեջանցի զինվորներ են, որոնք հրաժարվում են հետ քաշվել, իսկ Ադրբեջանի տարբեր կալիբրի իշխանավորները անդադար պատերազմական հռետորաբանությամբ սպառնում են Հայաստանին՝ ի՞նչ կանոնակարգերի մասին կարող է խոսք գնալ։ Ստացվում է՝ դեմարկացիայի և դելիմիտացիայի հիմնարար սկզբունքը արդեն խախտված է»,-ասաց նա՝ ընդգծելով, որ այլ խնդիրներ ևս տեսնում է և առաջիկայում դրանց առավել ամփոփ կանդրադառնա։

Աղբյուր` Փաստինֆո