Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր շարունակվել է ՀՀԿ փոխնախագահ Արմեն Աշոտյանի և մյուսների գործով դատավարությունը, որի ընթացքում շարունակվեց առանցքային վկայի՝ Կարեն Հակոբյանի հարցաքննությունը, որով փաստացի փլուզվել է քրեական գործը։

Նիստի ավարտին Ռուբեն Մելիքյանը հայտարարությամբ հանդես եկավ՝ Աշոտյանին դատարան ուշ բերելու և ԱԱԾ-ի գրության հետ։ Պարզվում է՝ առ այս պահը Արմեն Աշոտյանին չեն տրամադրել գործի նյութերը,այդ թվում՝ Կարեն Հակոբյանի արտաքին ու ներքին դիտման նյութերի այն հատվածները, որոնք վերաբերում են իր անձին: Հայտարարությամբ հանդես եկավ նաև Արմեն Աշոտյանը։

«Երկու նիստ առաջ ես այստեղ հրապարակավ բարձրաձայնեցի, որ ուղեկցող գումարտակի հետ կապված ոչ իրենց մեղքով՝ իշխանության թողտվության արդյունքում մարդիկ ունեն թափուր աշխատատեղեր՝ մեքենայի պրոբլեմ։ Դուք ասում եք՝ հայտարարություն արեցին, հայտարարությունը լուծե՞ց հարց, քանի որ ես այսօր ևս 45 րոպե ուշացել եմ»,- հայտարարեց Աշոտյանը՝ նշելով, որ եթե դրան գումարեն նախորդ 45 րոպե ուշացումը, ապա կստացվի 1,5 ժամ, ինչը մեկ դատական նիստի ժամանակ է։

«Եվ հայտարարություն են արել, թե գիշերը մատին թել են կապել, բան են լուծել, կոֆեի բաժակ են նայել, իրենց վարչապետին են զեկուցել, փաստն այն է, որ հարցը չի լուծվել»,- ասաց Աշոտյանը, ինչին արձագանքեց նախագահողը, Աշոտյանն էլ ավելացրեց՝ գիտեր, որ նախագահողը կարձագանքի վարչապետ բառին։

Արմեն Աշոտյանը մտահոգություն հայտնեց նաև իր՝ ազատության մեջ հայտնվելը ձգձգելու առնչությամբ, նշում է՝ իր մասով գաղտնի քննչական գործողությունների հետ կապած հարցումը, որը դեռևս երկու ամիս առաջ բավարարվել էր, դեռ չի կատարվել, թեև երկու ամիս է անցել։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո