Փաստ ինֆո

Հայաստանի և Ադրբեջանի սահմանազատման հանձնաժողովների կանոնակարգը պիտի լիներ մինչև ՀՀ-ի թեկուզ մեկ զինվորի հետքաշումը շփման գծից։ Մասնավորապես Շուռնուխից, որտեղ GPS-ի հիման վրա ադրբեջանցիները պահանջեցին, որ հայկական ստորաբաժանումները Ադրբեջանին հանձնեն մեր ինքնիշխանության և իրավազորության տակ գտնվող տարածքը։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Արթուր Խաչատրյանը՝ ընդգծելով, որ առանց կանոնակարգի առկայության նաև Կիրանցում եղավ սահմանազատում, բայց այն ինչ եղել է առանց այդ կանոնակարգի՝ ապօրինի է եղել։

Անդրադառնալով բովանդակությանը՝ Խաչատրյանն ասաց, որ իր համար անհասկանալի է, թե ինչու է հղում կատարվում Ալմա Աթայի հռչակագրին։ «Ալմա Աթայի հռչակագրում որևէ հղում չկա վարչական սահմաններին։ Ալմա Աթայի հռչակագիրը Ադրբեջանը վկայակոչում է, որ ցույց տա թե իբրև թե Սովետական Միության փլուզման պահին Արցախը եղել է Ադրբեջանի կազմում, հետևաբար, Արցախի հարցը պետք է լուծվի Ադրբեջանի ներքին օրենքների շրջանակներում, ինքը մերժվեց, թե ՄԱԿ-ի , թե ԵԱՀԿ-ի կողմից։ Սա է պատճառը, թե ինչու է այդ թղթի կտորն առաջ մղում։ Այդ թղթում ուղղակի գրված է, որ բոլոր երկրները ճանաչում եմ միմյանց տարածքային ամբողջականությունը, բայց դա ունիվերսալ օրենք է, մինչդեռ ՄԱԿ Արդարադատության դատարանը տվել է խորհրդատվական կարծիք, ըստ որի՝տարածքային ամբողջականության սկզբունքը չի կարող խոչընդոտ հանդիսանալ, որևէ ազգի կողմից անկախության հռչակման համար, ինչն արվել է Արցախի Հայրապետության կողմից։ Հետևաբար այս սկզբունքը մեզ համար անհասկանալի է»։

Նա նաև նշեց, որ անհասկանալի է սահմանների հատվածական սահմանազատումն ու սահմանագծումն է։ «Մենք կարծում ենք, որ դա պետք է արվի ամբողջ պարագծով, որովհետև Ադրբեջանը կարող է Հայաստանին պարտադրել ինչ որ մի զիջում՝ ինչ-որ հատվածում, խոստանալով համարժեք զիջման գնալ ինչ-որ այլ հատվածում; Հայաստանը կարող է հավատալ դրան, բայց Ադրբեջանը կարող է հերթական անգամ խաբել ու ծուղակը գցել, դրա համար կարծում ենք, որ պետք է լինի ամբողջ պարագծով։ Եթե կան վիճելի հատվածներ, ապա դրանց պետք է անդրադառնալ վերջում»։

Դիտարկմանը, թե արդյոք հատվածական սահմանազատումը պատերազմի սանձազերծման ռիսկեր է պարունակում՝ Խաչատրյանը պատասխանեց, որ այո, քանի որ բացառապես Ադրբեջանի պահանջ է այն, որ սահմանազատումը պետք է լինի հատվածական, մեր շահերից պետք է բխի ամբողջական սահմանագծումը, որպեսզի եթե փոփոխության խնդիր լինի՝ ինչ որ բան տալ կամ վերցնել ինչը տրամաբանական է, հնարավոր լինի անել։

«Ես կարծում եմ, որ եթե ամեն ինչ համաձայնեցված չէ, ուրեմ ոչինչ համաձայնեցված չէ։ Այսինքն, պետք է ամբողջ սահմանը սահմանազատված լինի, բոլոր հատվածների նկարագիրը պետք է լինի, հետո ամեն բան միասին ստորագրվի»։

Նա նաև ընդգծեց, որ ճիշտ լինի որ կանոնակարգում նաև հրվի որ Հայաստանի և Ադրբեջանի միջև սահմանագծի ճշգրտումը չի կարող վերաբերվել Արցախի Հանրապետության քաղաքական կարգավորմանը։

Աղբյուր` Փաստինֆո