Փաստ ինֆո

Նիկոլ Փաշինյանին տրամաբանական մեկնաբանություն տալը դժվար է, քանի որ նա իր պաշտոնավարման տարիներին իրար հաջորդող հայտարարություններ չի արել։ Նրա հայտարարությունները ժամանակագրական առումով իրարամերժ են։ Այս մասին «Փաստինֆո»-ի տաղավարում հայտարարել է Արցախի ԱԺ «Արդարություն» խմբակցության ղեկավար Դավիթ Գալստյանը՝ անդրադառնալով Փաշինյանի հայտարարությանը, թե առկա փաստաթղթերով անհնարին է արցախցիների վերադարձի հարցը։

«Այդ նույն մարդը խոսում էր, որ Արցախը հանձնում էին, ինքը եկավ իշխանության, որ փրկի Արցախը, հետո՝ տեսանք, թե ինչպես էր նա գոռում-գոչում, որը և բերեց Արցախի հայաթափմանը, այսինքն՝ Ադրբեջանի ձեռքերն ազատ արձակեց, Հայաստանը երաշխավորի դերից դարձավ կողմ»,- նշեց Գալստյանը՝ հավելելով, որ արցախցիները՝ ՀՀ իշխանությունների հետ միասին ընտրել էին անկախության ճանաչման ճանապարհը, իհարկե՝ որևէ մեկը չէր կասկածում, որ անկախությունից անմիջապես հետո վերամիավորման հարց կլիներ, բայց այնպես արեց, որ Ադրբեջանը կարողացավ ռազմական ճանապարհով զավթել Արցախը և միջազգային հանրության կողմից համապատասխան գնահատականների չարժանացավ։

Դա, Գալստյանի դիտարկմամբ, Նիկոլ Փաշինյանի սխալ քաղաքականության հետևանք է։

«Նա խոսում է իբր թե Արցախը լուծարված համարելու փաստաղթղթի մասին, բայց ես տեղյակ եմ, որ իր սեղանին կա փաստաթուղթ, որ գոյություն չունի Արցախի լուծարման փաստաթուղթ։ Նա մոլորեցնում է հանրությանը։ Այն պարտության սիմվոլ իշխանությունը, որն ունենք այսօր, պետք է արդարացնեն իրենց անգործությունը կամ հակահայ գործողությունները, հերթական մեղավորներն են փնտրում»,- նշեց Գալստյանը՝ ընդգծելով, որ այսօր իշխանությունները չեն խոսում արցախցիների իրավունքների մասին և անիրատեսական է համարում, իսկ առհասարակ ո՞ր փաստաթղթերով է իրատեսական համարում։

«Նա իր անկարողությունը փորձում է անիրատեսական ներկայացնել հանրությանը։ Այն, ինչի մասին խոսվում է, իրատեսական է հայրենանվեր իշխանությունների օրոք։ Նիկոլ Փաշինյանի օրոք, այո, ես էլ եմ գտնում, որ անիրատեսական է»,- նշեց Գալստյանը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո