Փաստ ինֆո

Այն, ինչ տեղի ունենալու սեպտեմբերից, դուք մասնակից եք լինելու. ինչ պետք է լինի՝ պետք է լինի: Այս մասին Եռաբլրում լրագրողների հետ զրույցում ասաց Բագրատ Սրբազանը՝ անդրադառնալով հարցին, թե ինչ գործողություններ է առաջիկայում իրականացնելու ընդդիմությունը:

«Մենք ոչ ժամանակ ունենք կորցնելու, ոչ էլ մեզ այդ հնարավորությունը տրված է շարունակելու նույն ընթացքը մեր կյանքի: Մենք պետք է փոխենք մեր ընթացքը, որը ոչ միայն ներկային է կապված, այլ ամբողջ պատմությունը բեկելու մասին է: Մենք շատ լավ ենք հասկանում թե ծանրությունը, թե բարդությունը, թե դժվարությունը, բայց ինչպես Եռաբլուրում մեր տղաներն են, մենք իրենց հետ նույնանալու պատմություն ունենք։ Այլ հնարավորություն չունենալը մեզ մղելու է այս ընթացը կասեցնելու և բեկելու, որովհետև շատ բան է կախված այսօրվանից։ Նժարին ոչ միայն մեր գոյությունն է դրված, այլև մեր պատիվը»,-ասաց նա:

Հարցին՝ ի՞նչ ծրագիր կա Արցախ վերադառնալու, Բագրատ Սրբազանը պատասխանեց. «Արցախի վերադարձը աշխարհաքաղաքական բոլոր կենտրոնների քաղաքական եւ բարոյական հիմքերում է գտնվում: Չկա մի ազդեցություն ունեցող պետություն կամ ներկայացուցիչ, որ այդ մասին խոսած չլինի, որ սա պարզ, մարդային իրավունքից մինչեւ հավաքական իրավունքի իրացում է նշանակում: Այո, դա շատ իրական է, նույնիսկ թշնամի պետության ղեկավարն է դրա մասին խոսել:

Նախ բանակցային օրակարգում դա պետք է լինի: Այսօր բանակցություններ գոյություն չունեն: Էս մարդիկ սուտ են խոսում, մենք գիտենք, որ գոյություն ունի հարկադրանք, թելադրանք, պարտադրանք, իսկ բանակցություններ, որպես այդպիսին, գոյություն չունեն: Բանակցություններում ամեն գնով պետք է ներառվի արցախցիների Արցախ վերադարձի իրավունքը՝ միջազգային անվտանգային երաշխիքներով: Սա իրատեսական է: Ցավոք սրտի, այս բոլորին խոչնդոտողը ՀՀ իշխանություն կոչվածն է»:

Աղբյուր` Փաստինֆո