Փաստ ինֆո

Տավուշի Կիրանց գյուղի դպրոցում, որը թշնամու հետ սահմանից ընդամենը 40-50 մետր հեռավորության վրա է, ուսումնական տարվա մեկնարկը դեռ չի տրվել, առաջին զանգը չի հնդել, աշակերտները դեռ չեն մտել դպրոց։

Կիրանցի բնակիչ Անդրանիկ Նազարյանը «Փաստինֆո»-ին հայտնեց, որ այս պահի դրությամբ նորակառույց, Ադրբեջանի հետ սահմանից ընդամենը 40 մետր հեռավորության վրա գտնվող դպրոցի շուրջը ու գյուղի շրջակայքում հարյուրներով ոստիկաններ կան։ Վերջիններիս ներկայությունից գյուղում ենթադրում են, որ դպրոցի հանդիսավոր բացման համար սպասում են Փաշինյանին։ Ինչպես նկատեց բնակիչը՝ դասապրոցեսը սկսելն այնքան էլ կարևոր չէ, որքան քարոզչական նպատակով նկարահանումներ կատարելն ու տարածելը, որ Կիրանցում՝ սահմանամերձ գյուղի դպրոցում, աշակերտներ կան։
Նազարյանը շեշտեց, որ առավոտյան, տեսնելով ոստիկանների քանակը, դուրս է եկել գյուղից, որ Փաշինյանի շքախմբին չհանդիպի ու ներկայացումը չդիտի։

Նշենք, որ բազմաթիվ դպրոցներում գիտելիքի օրը հատուկ առաջին դասարանցիների ընդունելու համար նշվել էր դեռ երեկ, իսկ այսօր հանրապետության մի շարք դպրոցներում՝ թե պետական, թե մասնավոր, առաջին զանգը հնչել է 8։30, որոշներում՝ 09։00-ին։ Փաշինյանը եւս առավոտյան իր կնոջ հետ գնացել է Հերացու ավագ դպրոց ու տեսանյութ տարածել։

Աղբյուր` Փաստինֆո