Փաստ ինֆո

ՍԴ դատավոր Հրայր Թովմասյանը ներկայացել է դատական նիստին, նշում է՝ սպասել, սպասել է․ որ բերման ենթարկեն, բայց՝ բերման չեն ենթարկել։

Նշենք, որ նախորդ դատական նիստում դատարանը որոշում է կայացրել Թովմասյանի նկատմամբ հարկադրանքի միջոց կիրառելու մասին։

Հրայր Թովմասյանը մինչ դատարան մուտք գործելը լրագրողների հետ զրույցում զերծ մնաց դատավորի գործողությունների մասին խոսելուց։ Ինչ վերաբերում է դատական նիստերի ձգձգումներին, որն իբրև իր մեղքով է եղել՝ Թովմասյանը նախ արձանագրեց՝ բացակայություններից քանիս՞ն է եղել անհարգելի, ապա՝ նշեց, որ չորս անգամ է եղել, որ ինքը եղել է եռյակի նախագահողը և նիստերը նշանակել հինգշաբթի օրերին, քանի որ երեքշաբթի օրերը ՍԴ դատական նիստերն են։
Իսկ թե ինչու է առարկում լուսաբանմանը, Հրայր Թովմասյանը պատասխանեց. «Ունեմ երկու խնդիր՝ պայքար դրսում, և պայքար մաքուր իրավական դատարանում և ես կարծում եմ, որ այն արհավիրքները, որ ՀՀ-ին սպառնում են, չպետք է ես փորձեմ իմ անձով օրակարգ ստեղծել և լցնել դրանով, շատ կարևոր գործեր կան, քան իմ դատական գործն է»։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։
Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո