Փաստ ինֆո

Փաշինյանի այսօրվա ասուլիսը ավելի շատ տակտիկական բնույթ էր կրում և միտված էր իշխանության ռեյտինգը մի քիչ բարձրացնելուն։ Այս մասին «Փաստինֆոյի» հետ զրույցում ասաց ՀՀ ԱԺ նախկին պատգամավոր, քաղաքագետ Արմեն Աբովյանն՝ ընդգծելով, որ այսօրվա ասուլիսում Փաշինյանը մանևերելու փորձեր էր անում, ընդ որում՝ մանևերելու՝ թե ռուսական, թե ադրբեջանական ուղղությամբ։

«Այն, ինչ մասին այսօր Նիկոլ Փաշինյանը հնչեցրեց՝ մենք ասում էին արդեն գրեթե մեկ տարի, երբ ասում էինք, որ Ադրբեջանի պայմանները հնազանդ կատարելու դեպքում մենք կանգնելու ենք ծանրագույն ճգնաժամի առջև։

Հիմա մենք արդեն կանգնած ենք ծանրագույն ճգնաժամի առջև։ Հաշվի առնելով բոլոր քայլերը՝ մենք պետք է հետագան հետևյալ տրամաբանության մեջ դիտարկենք․ Ներկա իշխանությունը պայքարում է միայն մեկ բանի համար․ իր իշխանությունը պահպանելու։ Քանի որ ժողովրդական լեզվով ասած՝ «դանակը հասել է ոսկորին», հիմա փորձում են ճշմարտությունը ի վերջո հնչեցնելով՝ տպավորություն ստեղծել, թե իրենք ուժեղ ու ինքնիշխան ՀՀ-ի ջատագովն են»։

Նա ընդգծեց, որ առաջիկայում Փաշինյանը կարող է փորձել ստորագրել գլխավոր պայմանագրի հետ կապված ինչ-որ մի թուղթ, որտեղ նշված է լինելու, որ ՀՀ իշխանությունները փոխելու են Սահմանադրությունը։ «Այդ թուղթը վերցնելու են ու գալու Հայաստան՝ ասելով, որ ժողովուրդ ջան, սա է, մնացել է փոխենք Սահմանադրությունը՝ դրանում առկա թուրքերին ու ադրբեջանցիներին դուր չեկած դրույթները և շարժվենք առաջ։

Բայց դա չի լինի Խաղաղության պայմանագիր, դա կլինի «աֆյորա», որովհետև կլինի փաստաթուղթ , որտեղ գրված կլինի խաղաղության պայմանագիրը ստորագրելու համար իրականացվելիք հիմնական դրույթներ։ Այսինքն, տակը նշվելու է, որ այդ պայմանագիրը ուժի մեջ կմտնի միայն, եթե ՀՀ-ն կատարի որոշակի քայլեր, օրինակ, փոխի Սահմանադրությունը։ Տեքստը մաքսիմում լղոզված է լինելու, որպեսզի այս իշխանությունը էլ ավելի շատ ճգնաժամի մեջ չխորանա, քանի որ Թուրքիան և Ադրբեջանը հետաքրքրված են այս իշխանության կենսունակության մեջ։

Այստեղ հարկ է նշել նաև որ շատ զարմանալի էր Փաշինյանի պտույտը «ատլանտյան վեկտորից» դեպի «ռուսական վեկտոր»։

Հարցին, թե որ հիմնական կետի շուրջ կողմերը չեն կարողանում գալ համաձայնության՝ Աբովյանն ասաց, որ դա կարող է լինել ադրբեջանցիների՝ Հայաստանում վերաբնակեցման հարցը։

«Այս իշխանությունը հետաքրքրված է ադրբեջանցիների վերաբնակեցմամբ, բայց ուղղակի մեջբերումը փաստաթղթի մեջ կարող է պայթեցնել իրավիճակը Հայաստանում և դա այս իշխանությունը հասկանում է»։

ՀԻշեցենք, այսօրվա ասուլիսում Փաշինյանը նշել էր, որ Խաղաղության պայմանագրի 17 հոդվածներից 13-ը համաձայնեցված է, ևս 3 հոդվածի բովանդակության մի զգալի մասը համաձայնեցված է այնքան, որ իրենք կարող են լինել ինքնուրույն հոդվածներ՝ համաձայնեցված մասով։

Աղբյուր` Փաստինֆո