Փաստ ինֆո

Բռնի տեղահանված արցախցիները չեն կարողանում Շենգենյան վիզա ստանալ՝ «070» կոդով անձնագրեր ունենալու պատճառով։ Դեսպանատները մերժում են դիմումները։ Մեդիա կենտրոնում «070 կոդ․ ինչու՞ արցախցիները չեն կարողանում Շենգենյան վիզա ստանալ» թեմայով քննարկման ժամանակ բռնի տեղահանված արցախցի Լիզա Մաթևոսյանը մանրամասնեց, որ Արցախում անձնագիր ստանում էին «070» կոդով, 2020թ․ առաջին տեղահանումից հետո Երևանում անձնագիր է ստացել՝ 001 կոդով, սակայն, այն բանից հետո, երբ արդեն օրենք է ընդունվել, որ Արցախից բոլոր տեղահանվածներին տալիս են ժամանակավոր պաշտպանության վկայականը, ստիպված է եղել ևս մեկ անգամ անձնագիր փոխել, որ ստանա այդ վկայականը։

«Դրանից հետո վիզա ստանալու համար դիմել եմ Լիտվայի դեսպանատուն և այնտեղ իմ թղթերն ուղղակի չվերցրեցին՝ հիմք ընդունելով 070 կոդը: Պարզաբանեցին, որ Լիտվայի ԱԳՆ-ն նման որոշում ունի: Արդյունքում իմ թղթերն ընդհանրապես չվերցրեցին, որ մերժեն կամ չմերժեն»,-ասաց Լիզա Մաթևոսյանը:

Արցախի ՄԻՊ Գեղամ Ստեփանյանն էլ ավելացրեց, որ այս տարվա սկզբին նման խնդիր չի եղել։ Նա դեսպանատների մոտեցումները բացանեց երեք մասի. դեսպանատներ, որոնք առանց որևէ խոչընդոտի տրամադրում են շենգենյան վիզա, խոսքը մասնավորապես Ֆրանսիայի դեսպանատան մասին է:

«Դեսպանատներ, որոնք երբեմն տարբերակված մոտեցում են ցուցաբերում, օրինակ, գիտեմ, որ նույն անձին Գերմանիայի դեսպանատունը մերժել է, ընթացք չի տվել, հետո հրավիրող կողմը առանձին նամակով դիմել է Գերմանիայի դեսպանատուն, որից հետո տվյալ անձին կանչել են նորից հարցազրույցի և տրամադրել են վիզան: Եվ կան դեսպանատներ, որոնք որևէ ձևով չեն ընթացքավորում և վիզա չեն տրամադրում: Այդ շարքում են Լեհաստանի, Լիտվայի, Չեխիայի, Իսպանիայի դեսպանատները»,- ասաց նա:

Նրա խոսքով՝ «070» անձնագրի դեպքում դիմումները ոչ թե մերժում են, այլ՝ առհասարակ չեն ընդունում, չեն քննարկում։

Աղբյուր` Փաստինֆո