Փաստ ինֆո

Չեմ կարծում Սահմանադրության նախաբանից «Անկախության հռչակագրին» հղումը արժե հանել։ «Փաստինֆոյի» հետ զրույցում ասաց «Իրազեկ քաղաքացիների միավորում» ՀԿ հիմնադիր ու ծրագրերի համակարգող Դանիել Իոաննիսյանն, ով Սահմանադրական փոփոխությունների խորհրդի անդամ է։

Անդրադառնալով Ադրբեջանի կողմից հնչող պահանջներին՝ նա նշեց, որ Ադրբեջանի նախագահը ՀՀ քաղաքացի չէ։ «Ես որպես խորհրդի անդամ պատրաստ եմ լսել ՀՀ ցանկացած քաղաքացու առաջարկությունը և պահանջը Սահմանադրության հետ կապված, որովհետև ՀՀ քաղաքացիներն են, ի վերջո, ընտրական տեղամասում որոշում, թե ինչ Սահմանադրություն ունենանք։ Իլհամ Ալիևը ՀՀ քաղաքացի չէ և ես չեմ կարծում, որ ես կամ մեր խորհուրդը պետք է իր հետ Սահմանադրություն քննարկենք»։

Դիտարկմանը, թե «Անկախության հռչակագրին» հղումը հանելու մասին խոսում է նաև Նիկոլ Փաշինյանը, ու գրեթե ամբողջ ՔՊ-ն՝ նա պատասխանեց, որ Սահմանադրության բարեփոխումների խորհրդում այդ հարցը չի քննարկվել։ «Խորհրդի որևէ անդամ այդ հարցն օրակարգ չի բերել, անգամ կուլուարներում այդ հարցի քննարկում ես գոնե չեմ տեսել։ Այդ հարցը քննարկում է մեկ Ալիևը, մեկ էլ ընդդիմադիր մամուլը»։

Հակադարձմանը, թե այդ հարցը օրակարգ է բերել Նիկոլ Փաշինյանը, իսկ իշխանական պատգամավորներից շատերն էլ հենց մեզ  հետ զրույցում ասել են, որ խնդիր չեն տեսնում, որպեսզի այդ հղումը հանվի՝ նա նշեց, որ նորմալ է վերաբերվում հարցին, ուղղակի այդ մասին արդեն խոսել է ու իր տեսակետը չի փոխվել։

«Ես կարծում եմ, որ չարժե հանել։ Ամեն դեպքում՝ երբեք այդ հարցը չի քննարկվել, այդ հարցի քննարկումը առաջիկայում նախատեսված չի։ Կարող է վաղը, օրինակ, Գրիգոր Մինասյանը բերի դա խորհուրդ, եթե բերեն, ես հավանաբար դեմ եմ լինելու, որովհետև ես կարծում եմ, որ Անկախության հռչակագիրը մեր պատմության մաս է, ու չարժի այն Սահմանադրությունից հանել, առավել ևս չարժի Սահմանադրությունից հանել ինչ-որ բան Ալիևի պահանջով, բայց ամեն դեպքում արժի նաև հստակ ուղերձ հղել միջազգային հանրությանը, որ Հայաստանը ռևաշիստական պետություն չէ։ Դա կարելի է այլ կերպ անել, օրինակ, Սահմանադրության մեջ ամրագրելով, որ Հայաստանը տարածաքային պահանջներ չունի հարևանների նկատմամբ, որ ՀՀ քաղաքականությունը հիմնված է իր և հարևանների տարածքային ամբողջականության հարգանքի վրա ու սրանով ընդգծել, որ այո ընդգծել, որ մենք սահմանադրության մակարդակում ռևանշիստական պետություն չենք և դրանով փորձել մեզ ռազմատեխնիկական աջակցություն ցույց տվող պետությունների մտավախությունները ցրենք այն բանի շուրջ, թե մեզ մատակարարված զենքը կարող է ռևանշի նպատակով օգտագործվել, քանի որ Ադրբեջանի դիվանագիտությունը ամեն օր մեր սահմանադրության վրա հղումով արևմուտքի մոտ փորձում է վախեր առաջացնել»։

Աղբյուր` Փաստինֆո